ഇടംകയ്യിൽ മാന്ത്രികത ഒളിഞ്ഞിരിപ്പുണ്ടെന്ന് തെളിയിച്ച യുവരാജൻ; കാത്തിരിക്കുന്നു പുതിയ ഇന്നിങ്‌സുകൾക്കായി

ശ്രീജേഷ് കെ

ബ്രെറ്റ് ലീ, ജോൺസൺ, ബ്രോഡ് തുടങ്ങിയ ലോകോത്തര ബൗളർമാരെ അദ്ദേഹം ഒരു കൂസലുമില്ലാതെ അടിച്ചു പറത്തിയിട്ടുണ്ട്. യുവിയെ ഒരു നോട്ടം കൊണ്ടുപോലും പ്രകോപിപ്പിക്കാൻ ആരായാലും ഒന്ന് ആലോചിക്കും. അതിൻറെ ചൂട് നന്നായി അറിഞ്ഞവനാണ് ഇംഗ്ലണ്ട് ടീമിലേക്ക് പിച്ചവെച്ച് തുടങ്ങിയ സ്റ്റുവർട്ട് ബ്രോഡ്. ഒരു ഓവറിലെ ആറ് പന്തും നിലംതൊടാതെ ഗ്യാലറിയിൽ എത്തിച്ചു. പിന്നീടുള്ള ആ ബൗളറുടെ കരിയർ നോക്കിയാൽ മതി, അയാൾ ഒരു മോശം ബൗളറോ ആ എറിഞ്ഞ പന്തുകൾ മോശമോ ആയിരുന്നില്ല…. പക്ഷെ യുവരാജ് അങ്ങനെയാണ്.

മുൻനിര തകർന്നപ്പോൾ ആ നാലാം നമ്പർ ബാറ്റ്സ്മാനായിരുന്നു എല്ലാവരുടെയും പ്രതീക്ഷ. ആ പ്രതീക്ഷ മിക്കപ്പോഴും അയാൾ കാത്തിട്ടുണ്ട്. ഇന്ത്യയുടെ രണ്ട് പ്രധാന ലോകകപ്പ് നേട്ടത്തിലെ പ്രധാനി. മൈതാനത്ത് ചോര തുപ്പിയിട്ടും കളം വിടാതെ ടീമിൻറെ വിജയത്തിനുവേണ്ടി പൊരുതി നിന്നു. രാജ്യത്തിനു വേണ്ടി എന്തും സഹിക്കാൻ അയാൾ തയ്യാറായിരുന്നു. ആവനാഴിയിലെ അവസാന അസ്ത്രം എടുത്തിട്ട് പോലും അദ്ദേഹത്തെ കീഴ് പ്പെടുത്താൻ എതിരാളികൾക്കായിട്ടില്ല.

2011 ലെ വേൾഡ് കപ്പ്, വേദി ഇന്ത്യ, വിജയത്തിൽ കുറഞ്ഞതൊന്നും ഇന്ത്യ പ്രതീക്ഷിക്കുന്നില്ല. യുവി അങ്കത്തട്ടിൽ വീരഗാഥ രചിച്ചു കൊണ്ടിരിക്കുന്ന സമയം. ക്രിക്കറ്റ് ദൈവത്തിന്റെ അവസാന വേൾഡ് കപ്പ്. ഇന്ത്യയ്ക്ക് ബ്രേക്ക് ത്രൂ ആവശ്യമായി വരുമ്പോൾ ധോണിക്ക് വിശ്വസിച്ച് പന്തെൽപ്പിക്കാൻ അയാൾ ഉണ്ടായിരുന്നു. തൻറെ സ്പിൻ മാന്ത്രികതയിൽ എതിരാളികളെ അയാൾ കറക്കി വീഴ്ത്തുമായിരുന്നു. ഫൈനൽ മത്സരത്തിൽ വാങ്കഡെയുടെ മണ്ണിൽ ധോണി അടിച്ച കൂറ്റൻ സിക്സർ കാണികളെ ചുംബിക്കുമ്പോൾ, മറുവശത്ത് ആ 12-ാം നമ്പർ ജേഴ്സികാരൻ ആഹ്ലാദത്താൽ ആർപ്പു വിളിക്കുകയായിരുന്നു. യുദ്ധഭൂമിയിൽ വിജയഗാഥ രചിച്ച് പടനായകനെ പോലെ. സച്ചിൻ എന്ന ക്രിക്കറ്റ് ദൈവത്തിനു വേണ്ടി പോരാളികൾ നേടിക്കൊടുത്ത വിജയം.

ഇല്ല യുവി നിങ്ങൾ ഇന്ത്യൻ ജനതയുടെ മനസ്സിൽനിന്ന് മാഞ്ഞുപോയിട്ടില്ല. അസ്തമിക്കാത്ത സൂര്യനെപ്പോലെ കത്തി ജ്വലിക്കുകയാണ്. യുവി…. നിങ്ങൾ ഒരു വികാരമാണ്. നിങ്ങൾക്കു മേൽ ഒരു ഇടംകൈയ്യൻ ബാറ്റ്സ്മാനെയും ഞങ്ങൾ ഇത്രയും സ്നേഹിച്ചിട്ടില്ല.

സച്ചിനെ കണ്ടു വലങ്കയ്യിൽ ബാറ്റുമേന്തി നടന്ന ഒരു ജനതയെ ഇടംകയ്യിൽ മാന്ത്രികത ഒളിഞ്ഞിരിപ്പുണ്ടെന്ന് അറിയിച്ച യുവരാജൻ. സിക്സറുകളുടെ തോഴൻ. വിശേഷണങ്ങൾ ഏറെയാണ്. ക്യാൻസറിനെ അതിജീവിച്ച് തിരിച്ചു വന്നെങ്കിലും, പ്രതാപകാലത്തിലേ യുവിയെ എവിടെയോ വെച്ച് നഷ്ടപ്പെട്ടിരിക്കുന്നു. ഇതിനു മുമ്പ് കണ്ട യുവി അല്ലായിരുന്നു പിന്നീട് .

വീണ്ടും ക്രിക്കറ്റിന്റെ അംഗതട്ടിലേക്ക് തിരിച്ചു വരുമ്പോൾ പ്രതീക്ഷയോടെ ഒരുപറ്റം ആരാധകർ കാത്തിരിപ്പുണ്ട്. നിങ്ങളുടെ ബാറ്റിംഗ് വിസ്ഫോടനത്തിനായി. ഇന്ന് ഇന്ത്യൻ ടീം നാലാം നമ്പർ കളിക്കാരനെ മാറ്റി മാറ്റി പരീക്ഷിക്കുകയാണ്. ഒരുകാലത്ത് യുവിയുടെ കൈയിൽ ഭദ്രമായിരുന്നു ആ സ്ഥാനം കാലചക്രത്തിന്റെ ചക്രവാളങ്ങൾ എത്ര കടന്നു പോയാലും നിങ്ങൾക്ക് പകരം മറ്റൊരാൾ, അത് അത്ര എളുപ്പമാവില്ല.
< !- START disable copy paste -->