ആദ്യ ട്വന്റി 20 യില്‍ ദിനേഷ് കാര്‍ത്തികോ മനീഷ് പാണ്ഡെയോ? റെയ്‌നയുടെ തിരിച്ചുവരവ് കാത്ത് ആരാധകര്‍

ജൊഹാനസ്ബര്‍ഗ്:(www.kvartha.com 18/02/2018) ചരിത്രം തിരുത്തി കോഹ്ലിപ്പട ദക്ഷിണാഫ്രിക്കയില്‍ ഏകദിന പരമ്പര നേടിയതിന് പിന്നാലെ ഞായറാഴ്ച ആദ്യ ട്വന്റി 20 മത്സരത്തിന് ഇരുടീമും കച്ചകെട്ടുകയാണ്. ഏറെ നാളുകള്‍ക്കുശേഷം ഇന്ത്യന്‍ ടീമില്‍ ഇടംനേടിയ സുരേഷ് റെയ്‌ന ഇന്ന് പാഡ് കെട്ടുമെന്ന പ്രതീക്ഷയിലാണ് ആരാധകര്‍. അതേസമയം, സുരേഷ് റെയ്‌നയോ മനീഷ് പാണ്ഡെയോ അവസനാ പതിനൊന്നില്‍ ഇടംനേടുക എന്ന കാര്യം വ്യക്തമല്ല. മധ്യനിര ബാറ്റ്‌സ്മാന്‍ സുരേഷ് റെയ്‌ന, ഇടങ്കയ്യന്‍ ഫാസ്റ്റ്ബൗളര്‍ ജയ്‌ദേവ് ഉനദ്കട്ട് എന്നിവരുടെ തിരിച്ചുവരവ് ടീമിന്റെ കരുത്താകും.

ഞായറാഴ്ച വൈകീട്ട് ആറ് മണിക്ക് വാണ്ടറേഴ്‌സില്‍ ആണ് ഒന്നാം ട്വന്റി 20 മത്സരം നടക്കുക. മൂന്ന് കളികളുടെ ടി20 മത്സരങ്ങളാണ് പരമ്പരയിലുള്ളത്. ആറ് മത്സരങ്ങളടങ്ങിയ ഏകദിന പരമ്പരയില്‍ 5-1 ന്റെ നാണംകെട്ട തോല്‍വി ഏറ്റുവാങ്ങിയാണ് ദക്ഷിണാഫ്രിക്കയുടെ നില്‍പ്പ്. ചരിത്രത്തിലാദ്യമായി ദക്ഷിണാഫ്രിക്കയില്‍ ഏകദിന പരമ്പര നേടിയതിന്റെ ആത്മവിശ്വാസവും ഇന്ത്യയ്ക്ക് മുതല്‍കൂട്ടാവും. അതേസമയം, ദക്ഷിണാഫ്രിക്ക ഇന്നുവരെ സ്വന്തം തട്ടകത്തില്‍ സന്ദര്‍ശക ടീമിനോട് തുടരെ രണ്ട് പരമ്പര തോറ്റിട്ടില്ലെന്ന വസ്തുതയും അവര്‍ക്കൊപ്പമുണ്ട്.


ഏകദിനത്തിലെ തോല്‍വിയുടെ ആഘാതത്തില്‍ നിന്ന് കരകയറാന്‍ ആവശ്യത്തിന് സമയം കിട്ടാതെയാണ് ദക്ഷിണാഫ്രിക്ക ടി20 പരമ്പരയ്ക്ക് ഇറങ്ങുന്നത്. വെടിക്കെട്ട് ബാറ്റിംഗിന് പേരുകേട്ട എ ബി ഡിവില്ലിയേഴ്‌സും മറ്റും ഉണ്ടെങ്കിലും ബാറ്റിങ്ങിലും ബൗളിങ്ങിലും ഇന്ത്യന്‍ ടീം പ്രകടിപ്പിക്കുന്ന സ്ഥിരത ആതിഥേയര്‍ക്ക് വെല്ലുവിളി സൃഷ്ടിക്കുന്നതാണ്.

ബുധനാഴ്ച സെഞ്ചൂറിയനിലും ശനിയാഴ്ച കേപ്ടൗണിലുമാണ് ശേഷിക്കുന്ന രണ്ട് മത്സരങ്ങള്‍ നടക്കുക. രാത്രി 9.30 മണിക്കാണ് ഈ രണ്ട് മത്സരങ്ങളും നടക്കുന്നത്.