ഹുലുൻബുയർ: (KVARTHA) ഏഷ്യൻ ചാമ്പ്യൻസ് ട്രോഫി ഹോക്കി ടൂർണമെന്റിലെ അവസാന ലീഗ് മത്സരത്തിൽ ഇന്ത്യൻ ഹോക്കി ടീം ബദ്ധവൈരികളായ പാകിസ്താനെ 2-1ന് പരാജയപ്പെടുത്തി. ചൈനയിലെ ഹുലുൻബുയറിൽ നടന്ന മത്സരത്തിൽ പാകിസ്ഥാൻ ആദ്യം ലീഡ് നേടിയെങ്കിലും ക്യാപ്റ്റൻ ഹർമൻപ്രീതിന്റെ മികച്ച പ്രകടനമാണ് ഇന്ത്യയെ വിജയത്തിലേക്ക് നയിച്ചത്. 

അഹ്‌മദ്‌ നദീമിലൂടെ (എട്ടാം മിനിറ്റ്) പാകിസ്ഥാൻ ലീഡ് നേടിയപ്പോൾ ഹർമൻപ്രീത് (13, 19) രണ്ട് പെനാൽറ്റി കോർണറുകൾ ഗോളാക്കി. ആറ് ടീമുകൾ പങ്കെടുത്ത മത്സരത്തിൽ ഇന്ത്യയുടെ തുടർച്ചയായ അഞ്ചാം വിജയമാണിത്. ഈ ടൂർണമെൻ്റിൽ പാകിസ്‌താൻ്റെ ആദ്യ തോൽവി കൂടിയാണിത്. ഇന്ത്യയും പാകിസ്ഥാനും നേരത്തെ തന്നെ സെമിഫൈനൽ യോഗ്യത നേടിയിരുന്നു.

മത്സരത്തിനിടെ ഹർമൻപ്രീതും പാകിസ്ഥാന്റെ അഷ്‌റഫ് വഹീദ് റാണയും തമ്മിൽ തർക്കമുണ്ടായി. ഇന്ത്യൻ സർക്കിളിനുള്ളിൽ ജുഗ്‌രാജ് സിങ്ങിനെ തോളിലേറ്റിയതിന് ശേഷമാണ് ഈ സംഘർഷം ഉണ്ടായത്. അമ്പയർമാർ സ്ഥിതിഗതികൾ നിയന്ത്രിച്ചു. റാണയ്ക്ക് മഞ്ഞക്കാർഡും 10 മിനിറ്റ് സസ്പെൻഷനും ലഭിച്ചു.

ഈ വിജയത്തോടെ 2016 മുതൽ പാക്കിസ്ഥാനെതിരെ ഇന്ത്യ നിലനിർത്തിപ്പോരുന്ന ആധിപത്യം തുടരാനായി. കഴിഞ്ഞ വർഷം നടന്ന ഹാംഗ്‌ഷൗ ഏഷ്യൻ ഗെയിംസിൽ ഇന്ത്യൻ ഹോക്കി ടീം പാകിസ്ഥാനെ 10-2 എന്ന സ്‌കോറിൽ തകർത്തിരുന്നു. ഇതിന് തൊട്ടുമുമ്പ്, ചെന്നൈയിൽ നടന്ന ഏഷ്യൻ ചാമ്പ്യൻസ് ട്രോഫിയിൽ ഇന്ത്യ പാകിസ്ഥാനെ 4-0ന് ജയിച്ചിരുന്നു.

#hockey #India #Pakistan #AsianChampionsTrophy #HarmanpreetSingh #sports