ADVERTISEMENT
സൂപ്പര്താരം ക്രിസ്റ്റ്യാനോ റൊണാള്ഡോ നിരവധി അവസരങ്ങള് തുലച്ചിട്ടും പോരാട്ടമികവുകൊണ്ട് പറങ്കിപട അവസാന നിമിഷം ഡെന്മാര്ക്കില് നിന്നും വിജയം പിടിച്ചുവാങ്ങി. കളിയുടെ തുടക്കംമുതല് പറങ്കികളുടെ ആധിപത്യമായിരുന്നു കളിയില്. 25ാം മിനിറ്റില് പെപെയുടെ വക ആദ്യ ഗോള്. ജാവോ മൊട്ടീന്യൊ എടുത്ത കോര്ണറില് പെപ്പെയുടെ തകര്പ്പന് ഹെഡ്ഡര് ഡെന്മാര്ക്ക് ഗോളി ആന്ഡേഴ്സനെ കാഴ്ചക്കാരനാക്കി വലയിലേക്ക്.
അധികം വൈകിയില്ല വീണ്ടും പറങ്കികളുടെ കടന്നാക്രമണം. 36ാം മിനിറ്റില് പോസ്റ്റിഗയുടെ ഹെഡ്ഡര് ഡെന്മാര്ക്കിനെ ഞെട്ടിച്ചു. നാനിയുടെ പാസാണ് ഗോളിന് വഴിതെളിച്ചത്. രണ്ട് ഗോള് വഴങ്ങിയതോടെ ഡെന്മാര്ക്ക് ഉണര്ന്ന് കളിച്ചു. യാക്കൂബ് പോള്സണും മൈക്കല് ഡെലിയും നടത്തിയ മനോഹര മുന്നേറ്റം ഗോളിന് വഴിവച്ചു. ബെന്ഡ്നറുടെ വക ഡെന്മാര്ക്കിന്റെ ആദ്യ ഗോള്. ആദ്യപകുതിയില് പോര്ച്ചുഗല് ഒരുഗോളിന് മുന്നില്. രണ്ടാംപകുതിയിലും ആവേശകരമായ പോരാട്ടം. പക്ഷെ മികച്ചുകളിക്കുന്നതിനിടെ രണ്ട് തവണ റൊണാള്ഡോയ്ക്ക് പിഴച്ചു. രണ്ടാംപകുതിയുടെ തുടക്കത്തില് ഡെന്മാര്ക്ക് ഗോളിയുടെ തകര്പ്പന് സേവാണ് ഗോള് നിരസിച്ചതെങ്കില് 78ാം മിനിറ്റില് റൊണാള്ഡോ വരുത്തിയ പിഴവാണ് വിനയായത്. സൂപ്പര്താരത്തിന്റെ മുന്നേറ്റം കണ്ട് ആര്ത്തിരമ്പിയ ഗ്യാലറി അതോടെ നിശബ്ദമായി.
തൊട്ടുപിന്നാലെ ആ പിഴവിന് പോര്ച്ചുഗല് വലിയ വില കൊടുക്കേണ്ടിവന്നു. മൂന്ന് മിനിറ്റിനുള്ളില് ഡെന്മാര്ക്ക് തിരിച്ചടിച്ചു. ബെന്ഡ്നറുടെ രണ്ടാംഗോള് ഡെന്മാര്ക്കിനെ ഒപ്പമെത്തിച്ചു. അതോടെ വീണ്ടും ആവേശനിമിഷങ്ങള്. കളി സമനിലയില് കലാശിക്കുമെന്ന് തോന്നിച്ച ഘട്ടത്തില് 87ാം മിനിറ്റില് സില്വസ്റ്റര് വരേല പറങ്കികളുടെ രക്ഷകനായി. ഫാബിയോ കോണ്ട്രാവോയുടെ വക നീട്ടികുറുക്കിയ പാസ്. ആര്ത്തുവിളിച്ച ആരാധകരെ സാക്ഷിനിര്ത്തി വരേല പോര്ച്ചുഗലിന് ഉജ്ജ്വല വിജയം സമ്മാനിച്ചു.
Keywords: World, Football, Sports, Winner, Portugal, Denmark, Euro 2012
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്സ്ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
