ചാമ്പ്യൻസ് ബോട്ട് ലീഗ് 2025: അഴീക്കോടൻ അച്ചാംതുരുത്തിക്ക് കിരീടം

കണ്ണൂർ: (KVARTHA) അഞ്ചരക്കണ്ടി പുഴയിലെ ഓളങ്ങൾ ആവേശത്തിൻ്റെ കൊടുമുടിയിൽ എത്തിച്ച പകൽ, പതിനായിരങ്ങളെ സാക്ഷിയാക്കി അഴീക്കോടൻ അച്ചാംതുരുത്തി ചാമ്പ്യൻസ് ബോട്ട് ലീഗ് ജേതാക്കളായി. 1.54.221 മിനിറ്റിലാണ് അവർ ഫിനിഷ് ലൈൻ കടന്നത്.

ആകെ 15 ചുരുളൻ വള്ളങ്ങൾ അണിനിരന്ന മത്സരത്തിൽ വയൽക്കര വെങ്ങാട്ടിനെയും പാലിച്ചോൻ അച്ചാംതുരുത്തിയെയും പിന്നിലാക്കിയാണ് അഴീക്കോടൻ അച്ചാംതുരുത്തി കപ്പിൽ മുത്തമിട്ടത്. അണിയത്ത് സജിരാജും അമരത്ത് കെ.പി വിജേഷുമാണ് വള്ളം നിയന്ത്രിച്ചത്. ദിപേഷ് ആയിരുന്നു ടീം മാനേജർ.

വൻ ജനാവലിയെ സാക്ഷിയാക്കി മുഖ്യമന്ത്രി പിണറായി വിജയനിൽ നിന്ന് വിജയികൾ ട്രോഫി ഏറ്റുവാങ്ങി. മൂന്ന് വള്ളങ്ങൾ വീതം പങ്കെടുത്ത അഞ്ച് ഹീറ്റ്‌സ് മത്സരങ്ങളിൽ ഏറ്റവും കുറഞ്ഞ സമയത്തിൽ ഫിനിഷ് ചെയ്ത ഒൻപത് ടീമുകളാണ് ലൂസേഴ്‌സ്, ഫൈനൽ മത്സരങ്ങളിൽ മാറ്റുരച്ചത്. 

ഹീറ്റ്‌സ് മത്സരങ്ങളിൽ ഓരോ റൗണ്ടിലും ആർപ്പുവിളികളും ആരവങ്ങളുമായി കാണികൾ തുഴച്ചിലിൻ്റെ വേഗം കരയിലേക്കും പടർത്തി. ഹീറ്റ്‌സ് മത്സരത്തിൽ രണ്ട് മിനിറ്റിൽ താഴെ സമയത്തിൽ ഫിനിഷിങ് ലൈൻ കടന്ന അഞ്ച് ടീമുകളിൽ ഏറ്റവും കുറഞ്ഞ സമയം കുറിച്ച മൂന്ന് ടീമുകളാണ് ഫൈനലിൽ തുഴയെറിഞ്ഞത്.

1.54.611 ന് ഫിനിഷ് ചെയ്താണ് വയൽക്കര വെങ്ങാട്ട് രണ്ടാം സ്ഥാനം കരസ്ഥമാക്കിയത്. പാലിച്ചോൻ അച്ചാംതുരുത്തി എ ടീം 1.56.052 ന് മൂന്നാം സ്ഥാനവും നേടി.

ന്യൂ ബ്രദേഴ്‌സ് മയ്യിച്ച നാല്, എ.കെ.ജി പോടോത്തുരുത്തി എ ടീം അഞ്ച്, നവോദയ മംഗലശ്ശേരി ആറ്, കൃഷ്ണപിള്ള കാവുംചിറ ഏഴ്, എ.കെ.ജി മയ്യിച്ച എട്ട്, വയൽക്കര മയ്യിച്ച ഒൻപത് എന്നിങ്ങനെ സ്ഥാനങ്ങൾ കരസ്ഥമാക്കി.

ഒന്നാം സ്ഥാനം നേടിയ ടീമിന് ഒന്നര ലക്ഷം രൂപയും രണ്ടാം സ്ഥാനത്തെത്തിയ ടീമിന് ഒരു ലക്ഷം രൂപയും മൂന്നാം സ്ഥാനത്തിന് 50,000 രൂപയുമാണ് സമ്മാനതുകയായി നൽകിയത്. ഇതിന് പുറമേ, പങ്കെടുത്ത മുഴുവൻ ടീമുകൾക്കും ഒരു ലക്ഷം രൂപ വീതം പാരിതോഷികവും ലഭിച്ചു.

പൊതുമരാമത്ത് ടൂറിസം വകുപ്പ് മന്ത്രി പി.എ. മുഹമ്മദ് റിയാസ് ചടങ്ങിൽ അധ്യക്ഷനായി. രജിസ്‌ട്രേഷൻ മ്യൂസിയം വകുപ്പ് മന്ത്രി രാമചന്ദ്രൻ കടന്നപ്പള്ളി, നിയമസഭ സ്പീക്കർ അഡ്വ. എ.എൻ. ഷംസീർ എന്നിവർ മുഖ്യാതിഥികളായി. 

ജില്ലാ പഞ്ചായത്ത് പ്രസിഡൻ്റ് കെ.കെ. രത്നകുമാരി, ജില്ലാ കലക്ടർ അരുൺ കെ. വിജയൻ, എടക്കാട് ബ്ലോക്ക് പഞ്ചായത്ത് പ്രസിഡൻ്റ് പി.കെ. പ്രമീള, തലശ്ശേരി ബ്ലോക്ക് പഞ്ചായത്ത് പ്രസിഡൻ്റ് സി.പി. അനിത, പഞ്ചായത്ത് പ്രസിഡൻ്റുമാരായ ടി. സജിത, കെ.കെ. രാജീവൻ, എൻ.കെ. രവി, എ.വി. ഷീബ, കെ.പി. ലോഹിതാക്ഷൻ, പി.വി. പ്രേമവല്ലി, കെ. ഗീത, കെ. ദാമോദരൻ, മുൻ എം.പി കെ.കെ. രാഗേഷ്, ജില്ലാ ജഡ്ജ് നിസാർ അഹമ്മദ്, ടൂറിസം ഡയറക്ടർ ശിഖ സുരേന്ദ്രൻ, ജില്ലാ പഞ്ചായത്ത് അംഗങ്ങളായ കോങ്കി രവി, കെ.വി. ബിജു, കെ.ടി. ഫർസാന, മുഖ്യമന്ത്രിയുടെ മണ്ഡലം പ്രതിനിധി പി. ബാലൻ, ടൂറിസം ജോയിൻ്റ് ഡയറക്ടർമാരായ ഡി. ഗിരീഷ് കുമാർ, ടി.ജെ. അഭിലാഷ്, ടൂറിസം ഡെപ്യൂട്ടി ഡയറക്ടർ ടി.സി. മനോജ്, ഡി.ടി.പി.സി സെക്രട്ടറി ടി.കെ. സൂരജ്, രാഷ്ട്രീയ പാർട്ടി പ്രതിനിധികളായ ടി. പ്രകാശൻ, മാസ്റ്റർ, വി.സി. വാമനൻ, കെ.കെ. ജയപ്രകാശ്, വി.കെ. ഗിരിജൻ, പി.പി. നാസർ, കെ.കെ. അബ്ദുൽ സത്താർ തുടങ്ങിയവർ പങ്കെടുത്തു.

കണ്ണൂരിൻ്റെ ആവേശം ഇനി നിങ്ങൾക്കും പങ്കുവെക്കാം! ഈ വാർത്ത നിങ്ങളുടെ സുഹൃത്തുക്കളുമായി ഷെയർ ചെയ്യുക. 

Article Summary: Azheekodan Achamthuruthy wins the Champions Boat League 2025 in Kannur.

#ChampionsBoatLeague #CBL2025 #Vallamkali #Kannur #BoatRace #KeralaTourism