വന്ദേഭാരതിൽ പ്ലാസ്റ്റിക് കവറോടെ ഭക്ഷണം ചൂടാക്കി നൽകുന്നു; സുരക്ഷാ ആശങ്കയുമായി യാത്രക്കാരി, വിശദീകരണവുമായി ഐആർസിടിസി

ന്യൂഡൽഹി:(KVARTHA) വന്ദേഭാരത് എക്‌സ്പ്രസ് ട്രെയിനുകളില്‍ വിതരണം ചെയ്യുന്ന ഭക്ഷണത്തിന്റെ സുരക്ഷയെക്കുറിച്ച് ആശങ്കയുമായി യാത്രക്കാരി. പ്രയാഗ്‌രാജില്‍ നിന്ന് ഡല്‍ഹിയിലേക്കുള്ള യാത്രയ്ക്കിടെ ലഭിച്ച റൊട്ടിയും കച്ചോരിയും പ്ലാസ്റ്റിക് കവറുകളില്‍ സീല്‍ ചെയ്ത നിലയില്‍ നേരിട്ട് ചൂടാക്കിയാണ് നല്‍കുന്നതെന്ന് ചൂണ്ടിക്കാട്ടി അവാനി ബന്‍സാല്‍ എന്ന യാത്രക്കാരിയാണ് രംഗത്തെത്തിയത്. സംഭവത്തിന്റെ വീഡിയോ ഇവര്‍ എക്‌സില്‍ പങ്കുവെച്ചതോടെ റെയില്‍വേയിലെ ഭക്ഷണ വിതരണ രീതികളെക്കുറിച്ച് സോഷ്യല്‍ മീഡിയയില്‍ വലിയ ചര്‍ച്ചകള്‍ക്ക് തുടക്കമായി.

ജീവനക്കാരന്റെ വെളിപ്പെടുത്തല്‍

ഭക്ഷണം പാക്ക് ചെയ്ത പ്ലാസ്റ്റിക് കവറുകള്‍ മൈക്രോവേവ് ഓവനിലിട്ട് നേരിട്ട് ചൂടാക്കാറുണ്ടോ എന്ന അവാനിയുടെ ചോദ്യത്തിന് ട്രെയിനിലെ ജീവനക്കാരന്‍ അതെ എന്ന് മറുപടി നല്‍കുന്നതായി വീഡിയോയിലുണ്ട്. എന്നാല്‍ ഈ കവറുകളില്‍ മൈക്രോവേവ് സേഫ്  ആണെന്ന യാതൊരു സൂചനയും രേഖപ്പെടുത്തിയിട്ടില്ലെന്ന് യാത്രക്കാരി ചൂണ്ടിക്കാട്ടുന്നു. ഒരു ദിവസം മുന്‍പ് രാജധാനി എക്‌സ്പ്രസില്‍ യാത്ര ചെയ്തപ്പോഴും സമാനമായ അനുഭവം ഉണ്ടായതായും ഇവര്‍ വ്യക്തമാക്കി.

ആരോഗ്യപ്രശ്‌നങ്ങള്‍ ഉയര്‍ത്തുന്ന ചോദ്യങ്ങള്‍

ഭക്ഷണം പൊതിഞ്ഞിരുന്ന പ്ലാസ്റ്റിക് കവറുകളില്‍ 'തണുത്തതും ഉണങ്ങിയതുമായ സ്ഥലത്ത് സൂക്ഷിക്കുക' എന്ന് മാത്രമാണ് നിര്‍ദ്ദേശമുള്ളത്. പ്ലാസ്റ്റിക് കവറുകള്‍ നേരിട്ട് ചൂടാക്കുമ്പോള്‍ രാസവസ്തുക്കള്‍ ഭക്ഷണത്തില്‍ കലരാന്‍ സാധ്യതയുണ്ടെന്നും ഇത് പൊതുജനാരോഗ്യത്തെ ബാധിക്കുന്ന ഗൗരവകരമായ വിഷയമാണെന്നും അവാനി ബന്‍സാല്‍ തന്റെ പോസ്റ്റില്‍ കുറിച്ചു. പ്ലാസ്റ്റിക് കവറുകള്‍ 'ഫുഡ് ഗ്രേഡ്' ആണെന്ന് പറയുന്നത് അവ നേരിട്ട് ചൂടാക്കാന്‍ അനുയോജ്യമാണെന്നതിന് തുല്യമല്ലെന്നും അവര്‍ കൂട്ടിച്ചേര്‍ത്തു.

ഐആര്‍സിടിസിയുടെ മറുപടി

യാത്രക്കാരിയുടെ പോസ്റ്റ് വൈറലായതോടെ വിശദീകരണവുമായി ഇന്ത്യന്‍ റെയില്‍വേ കാറ്ററിംഗ് ആന്‍ഡ് ടൂറിസം കോര്‍പ്പറേഷന്‍  രംഗത്തെത്തി. നിലവിലുള്ള താപനില മാനദണ്ഡങ്ങള്‍ അനുസരിച്ച് ട്രെയിനിലെ ഭക്ഷണ വിതരണത്തിന് ഇത്തരം പാക്കിംഗ് അനുയോജ്യമാണെന്ന് ഐആര്‍സിടിസി മറുപടി നല്‍കി. ഈ പാക്കിംഗ് ആരോഗ്യത്തിന് ഹാനികരമല്ലെന്നും ഭക്ഷണം കഴിക്കുന്നത് സുരക്ഷിതമാണെന്നും അവര്‍ എക്‌സിലൂടെ അറിയിച്ചു.

Public Health Issue Alert 🚨

Travelling on Vande Bharat today (Allahabad → Delhi) and yesterday was travelling on Rajdhani (Delhi → Allahabad), I was served rotis/kachoris heated directly inside sealed plastic packaging. While at Rajdhani, I was hungry and so ate the hot… pic.twitter.com/gIxM4U1d5N

— Avani Bansal (@bansalavani) February 18, 2026

സോഷ്യല്‍ മീഡിയ പ്രതികരണം

ഐആര്‍സിടിസിയുടെ വിശദീകരണത്തില്‍ തൃപ്തരല്ലാത്ത നിരവധി യാത്രക്കാരാണ് വിമര്‍ശനവുമായി രംഗത്തെത്തിയത്. ഫ്‌ലാഗ്ഷിപ്പ് ട്രെയിനുകളില്‍ കുറഞ്ഞ നിലവാരമുള്ള വിതരണക്കാരെയാണ് ഐആര്‍സിടിസി തിരഞ്ഞെടുക്കുന്നതെന്ന് ചിലര്‍ കുറ്റപ്പെടുത്തി. നിശ്ചയിച്ച മെനുവിലെ വിഭവങ്ങള്‍ പലപ്പോഴും മാറ്റുകയോ അളവ് കുറയ്ക്കുകയോ ചെയ്യുന്നുണ്ടെന്ന ആരോപണവും ഉയര്‍ന്നു. പാക്ക് ചെയ്ത ഭക്ഷണം നേരിട്ട് ചൂടാക്കുന്നുണ്ടെങ്കില്‍ അത് കൃത്യമായ മൈഗ്രേഷന്‍ ടെസ്റ്റിംഗിന് വിധേയമാക്കണമെന്നും സുരക്ഷാ സര്‍ട്ടിഫിക്കറ്റുകള്‍ പരസ്യപ്പെടുത്തണമെന്നും സോഷ്യല്‍ മീഡിയ ഉപയോക്താക്കള്‍ ആവശ്യപ്പെട്ടു.

പുതിയ വാര്‍ത്തകള്‍ സമയബന്ധിതമായി അറിയാന്‍ ഞങ്ങളുടെ വാട്‌സ്ആപ്പ് ചാനല്‍ ഫോളോ ചെയ്യുക.

ഈ വാര്‍ത്ത സുഹൃത്തുകള്‍ക്കും കുടുംബാംഗങ്ങള്‍ക്കും വാട്‌സ്ആപ്പ് ഗ്രൂപ്പുകളിലും ഷെയര്‍ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A Vande Bharat passenger raised concerns over food safety after being served rotis and kachoris heated directly inside plastic packaging, prompting a response from IRCTC.

#VandeBharat #IRCTC #Food Safety #IndianRailways #PlasticWaste #PublicHealth #RailwayCatering