ഇതാണ് യഥാർത്ഥ കേരള സ്റ്റോറി! മെട്രോ തൂണിൽ കുടുങ്ങിയ പൂച്ചയെ രക്ഷിച്ച് ഫയർഫോഴ്സും നാട്ടുകാരും; ജാതിയും മതവും നോക്കാതെ ജീവന് വിലകൽപ്പിക്കുന്ന നാട്

കൊച്ചി: (KVARTHA) ജാതിയുടെയും മതത്തിന്റെയും പേരിൽ മനുഷ്യർക്കിടയിൽ മതിലുകൾ തീർക്കാൻ ശ്രമിക്കുന്നവർക്കുള്ള ഏറ്റവും വലിയ മറുപടിയാണ് ഇപ്പോൾ ഇൻസ്റ്റാഗ്രാമിൽ വൈറലായിക്കൊണ്ടിരിക്കുന്ന ഒരു കൊച്ചു വീഡിയോ. ഓരോ ജീവനും ഇവിടെ എത്രത്തോളം വിലപ്പെട്ടതാണെന്നും, ആപത്ത് ഘട്ടങ്ങളിൽ പരസ്പരം എങ്ങനെ സഹായിക്കണമെന്നും ഈ വീഡിയോ വരച്ചുകാട്ടുന്നു. ഇതാണ് യഥാർത്ഥ 'കേരള സ്റ്റോറി' എന്ന് ഉറക്കെ പ്രഖ്യാപിക്കുകയാണ് ഇപ്പോൾ സോഷ്യൽ മീഡിയ ലോകം.

മെട്രോ റെയിൽ തൂണിന് മുകളിൽ കുടുങ്ങിപ്പോയ ഒരു മിണ്ടാപ്രാണിയെ രക്ഷിക്കാൻ എത്തുന്ന അഗ്നിരക്ഷാ സേനയുടെയും നാട്ടുകാരുടെയും ദൃശ്യങ്ങളാണ് വീഡിയോ വരച്ചുകാട്ടുന്നത്. 'സുഭാഷ്' എന്ന് സമൂഹമാധ്യമങ്ങൾ പേരിട്ട ഈ പൂച്ച ദിവസങ്ങളാണ് താഴെയിറങ്ങാൻ കഴിയാതെ നിസ്സഹായവസ്ഥയിൽ ഉയരത്തിൽ കഴിഞ്ഞത്. മൃഗസ്നേഹികളും ഫയർഫോഴ്സ് ഉദ്യോഗസ്ഥരും നാട്ടുകാരുടെയും ദയയിൽ ക്രെയിൽ ഉപയോഗ്ഇച്ചാണ് ഈ പൂച്ചയെ ജീവിതത്തിലേക്ക് തിരികെക്കൊണ്ടുവന്നത്. ഇൻസ്റ്റാഗ്രാമിൽ സ്പാർക്ക് ഒറിജിനൽസ് എന്ന അക്കൗണ്ടിൽ പങ്കുവെക്കപ്പെട്ട ഈ റീൽ ചുരുങ്ങിയ സമയം കൊണ്ടാണ് ലക്ഷക്കണക്കിന് ആളുകളുടെ ഹൃദയം കീഴടക്കിയത്. ചെറിയ ഒരു സംഭവമാണെന്ന് തോന്നാമെങ്കിലും വളരെ നന്നായി എഡിറ്റ് ചെയ്ത് നല്ലൊരു സന്ദേശം വീഡിയോയിലൂടെ അവതരിപ്പിക്കാനായത് ക്രിയേറ്ററുടെ മിടുക്ക് തന്നയാണ്.

ഒരു മിണ്ടാപ്രാണിയുടെ ജീവന് പോലും ഇത്രയേറെ വിലകൽപ്പിക്കുന്ന നാടാണ് കേരളമെന്ന് ഈ ദൃശ്യങ്ങൾ അടിവരയിടുന്നു. മനുഷ്യർ പരസ്പരം സഹായിക്കുന്നതിനോ ഒരു ജീവൻ രക്ഷിക്കുന്നതിനോ മലയാളികൾ ഒരിക്കലും ജാതിയോ മതമോ ചോദിക്കാറില്ല. നാരായണ ഗുരു, അയ്യങ്കാളി, വക്കം മൗലവി തുടങ്ങിയ സാമൂഹിക പരിഷ്കർത്താക്കൾ പതിറ്റാണ്ടുകൾക്ക് മുൻപ് പാകിയ സമത്വത്തിന്റെ അടിത്തറയാണ് ഇന്നും കേരള സമൂഹത്തെ നയിക്കുന്നത്. 'ഞങ്ങൾ ഇവിടെ ജാതിയുടെ പേരിൽ തല്ലുകൂടാറില്ല, മറിച്ച് പരസ്പരം സഹായിക്കാൻ മത്സരിക്കുന്നവരാണ്' എന്ന സന്ദേശമാണ് ഈ വീഡിയോ നൽകുന്നത്.

View this post on Instagram

A post shared by Spark Originals (@spark.originals)

2018-19 വർഷങ്ങളിൽ കേരളം നേരിട്ട മഹാപ്രളയങ്ങളിലും ഉരുൾപൊട്ടലുകളിലും കണ്ടത് ഇതേ ഐക്യമാണ്. അന്ന് ദുരിതബാധിതർക്കായി മുസ്ലീം പള്ളികൾ ഹിന്ദുക്കൾക്കും, അമ്പലങ്ങൾ മുസ്ലീങ്ങൾക്കും, ക്രിസ്ത്യൻ പള്ളികൾ എല്ലാവർക്കുമായി തുറന്നുകൊടുത്ത ചരിത്രമാണ് കേരളത്തിനുള്ളത്. അയൽക്കാർ പരസ്പരം ഭക്ഷണം പങ്കുവെച്ചും തകർന്നടിഞ്ഞവ ഒന്നിച്ച് പടുത്തുയർത്തിയുമാണ് ദുരന്തങ്ങളെ നേരിട്ടത്. വ്യത്യസ്ത മതങ്ങളിൽ വിശ്വസിക്കുന്നവർ ഒരുമിച്ച് ജീവിക്കുന്നതും ആഘോഷങ്ങൾ പങ്കിടുന്നതും ഇവിടെ പതിവാണ്. ഇവിടെ നോമ്പും പെരുന്നാളും ക്രിസ്മസും ഓണവും ഉത്സവങ്ങളും എല്ലാം ഈ നാട്ടുകാരുടേതാണ്, മലയാളികളുടേതാണ്.

വിഭജനത്തിന്റെ വ്യാജ കഥകൾ പറയുന്ന ചില സിനിമകൾക്കും മാധ്യമ വാർത്തകൾക്കുമുള്ള കൃത്യമായ മറുപടിയാണ് ഈ സ്നേഹക്കാഴ്ച. വിദ്വേഷ പ്രചാരണങ്ങൾക്കിടയിലും മനുഷ്യത്വമാണ് തങ്ങളുടെ മതമെന്ന് മലയാളികൾ ഈ വീഡിയോയിലൂടെ വീണ്ടും തെളിയിക്കുകയാണ്. കേവലം ഒരു മൃഗത്തെ രക്ഷിക്കുന്നതിനപ്പുറം, സ്നേഹത്തിന്റെയും സാഹോദര്യത്തിന്റെയും ഈ യഥാർത്ഥ 'കേരള സ്റ്റോറി' കൂടുതൽ ആളുകളിലേക്ക് എത്തണമെന്നാണ് സോഷ്യൽ മീഡിയ ഒന്നടങ്കം ആവശ്യപ്പെടുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. കൂടുതൽ പേർക്ക് എത്തേണ്ട വിഷയമാണിത്. വാട്സ്ആപ്പ് ഗ്രൂപ്പുകളിലും സോഷ്യൽ മീഡിയയിലും ഈ വാർത്ത പങ്കുവെക്കുമല്ലോ. അഭിപ്രായം കമന്റായി രേഖപ്പെടുത്താനും മറക്കരുത്. ഇത്തരം വാർത്തകൾ അപ്പപ്പോൾ അറിയാൻ ഞങ്ങളുടെ ഇൻസ്റ്റഗ്രാം/ ഫെയ്സ്ബുക്ക് പേജ് ഫോളോ ചെയ്യൂ. 

Article Summary: A viral Instagram reel showing the rescue of a cat named Subhash from a metro pillar by the Fire Force and locals is being hailed as the 'Real Kerala Story', celebrating the state's secular fabric and humanity.

#RealKeralaStory #SecularKerala #FireForceKerala #HumanityFirst #KeralaNews #AnimalRescue #SayNoToHate #UnityInDiversity