പോലീസിനും വേണം എഐ ക്യാമറ; മർദ്ദിച്ചാൽ സസ്പെൻഷൻ ഓർഡർ ഓട്ടോമാറ്റിക്കായി വീട്ടിലെത്തണം - മുരളി തുമ്മാരുകുടി

കൊച്ചി: (KVARTHA) രാജ്യത്തെ നഗരങ്ങളിലെല്ലാം റോഡിലെ നിയമലംഘനങ്ങൾ കണ്ടെത്താൻ എ.ഐ. (ആർട്ടിഫിഷ്യൽ ഇൻ്റലിജൻസ്) ക്യാമറകൾ സ്ഥാപിക്കുന്നത് പോലെ, പോലീസ് സ്റ്റേഷനുകൾക്കുള്ളിലും ഉദ്യോഗസ്ഥരുടെ പ്രവർത്തനങ്ങൾ നിരീക്ഷിക്കാനും സമാനമായ സാങ്കേതികവിദ്യ വേണമെന്ന് ഐക്യരാഷ്ട്ര സഭയുടെ ദുരന്ത നിവാരണ വിഭാഗം തലവൻ മുരളി തുമ്മാരുകുടി. എറണാകുളം നോർത്ത് പോലീസ് സ്റ്റേഷനിൽ പരാതിയുമായെത്തിയ സ്ത്രീയെ സി.ഐ. മർദ്ദിച്ച ദൃശ്യങ്ങൾ പുറത്തുവന്ന സാഹചര്യത്തിലാണ് ഫേസ്ബുക്കിലൂടെയുള്ള അദ്ദേഹത്തിന്റെ പ്രതികരണം. 

ഇരുപത്തി ഒന്നാം നൂറ്റാണ്ടിലും മെട്രോ നഗരത്തിലെ ഒരു പോലീസ് സ്റ്റേഷനിൽ വച്ച് എല്ലാവരും നോക്കിനിൽക്കെ ഒരു ഉദ്യോഗസ്ഥന് സ്ത്രീയുടെ കരണത്തടിക്കാൻ സങ്കോചമില്ലാത്തത് അധികാരത്തിൻ്റെ ഹുങ്ക് കൊണ്ടാണെന്ന് അദ്ദേഹം വിമർശിച്ചു. ഇത് നിയമത്തിൻ്റെ നഗ്നമായ ലംഘനമാണ്. ഇതേ പോലീസ് സ്റ്റേഷനിൽ ഇതേ ഉദ്യോഗസ്ഥൻ മുൻപും പലരെയും മർദ്ദിച്ചിട്ടുണ്ടാകാമെന്നും ഇത്തരം സംഭവങ്ങൾ ഒറ്റപ്പെട്ടതല്ലെന്നും അദ്ദേഹം തന്റെ കുറിപ്പിൽ വ്യക്തമാക്കി.

പോലീസുകാർ പരസ്യമായി മർദ്ദിക്കാൻ ധൈര്യം കാണിക്കുന്നത് മറ്റുള്ളവർ അവരെ സംരക്ഷിക്കുമെന്ന ഉറപ്പുള്ളതുകൊണ്ടാണ്. ഇതിനെ 'ബൗണ്ട് ബൈ ബ്രദർഹുഡ്' എന്നാണ് വിശേഷിപ്പിക്കുന്നത്. രാജാധിപത്യം മാറി ജനാധിപത്യം വന്നിട്ടും പോലീസിൻ്റെ ഈ അടിസ്ഥാന സ്വഭാവം മാറ്റാൻ കഴിയാത്തത് സംസ്കാരമുള്ള ഒരു ജനതയ്ക്ക് നാണക്കേടാണെന്നും അദ്ദേഹം പറഞ്ഞു. നിലവിൽ മൊബൈൽ ഫോണുകളും സി.സി.ടി.വികളും ഉള്ളതുകൊണ്ടാണ് പല നരാധമന്മാരുടെയും പ്രവർത്തികൾ പുറംലോകം അറിയുന്നത്.

ഓരോ പോലീസ് ഉദ്യോഗസ്ഥൻ്റെ തോളിലും ബോഡി ക്യാമറകൾ വെച്ച് നൽകേണ്ട കാലം അതിക്രമിച്ചിരിക്കുകയാണ്. സി.സി.ടി.വി. ദൃശ്യങ്ങൾക്കായി മാസങ്ങളോളം കോടതി കയറുന്ന രീതിക്ക് പകരം എ.ഐ. ഉപയോഗിച്ച് ദൃശ്യങ്ങൾ അപ്പോൾ തന്നെ വിശകലനം ചെയ്യണം. മർദ്ദനം, കൈക്കൂലി, അസഭ്യം എന്നിവ എ.ഐ. കണ്ടെത്തിയാൽ സസ്പെൻഷൻ ഓർഡർ ഉടൻ തന്നെ ഉദ്യോഗസ്ഥൻ്റെ വീട്ടിലെത്തണം. മൂന്ന് തവണ സസ്പെൻഷൻ കിട്ടുന്നവരെ സർവീസിൽ നിന്ന് സ്ഥിരമായി പുറത്താക്കണമെന്നും അദ്ദേഹം നിർദ്ദേശിച്ചു. മർദ്ദനം എന്നത് ഒരു ആർജിത സ്വഭാവമാണെന്നും കടുത്ത പ്രത്യാഘാതം ഉണ്ടാകുമെന്ന് ഉറപ്പായാൽ അത് മാറുന്ന രോഗമാണെന്നും മുരളി തുമ്മാരുകുടി കൂട്ടിച്ചേർത്തു.

മുരളി തുമ്മാരുകുടിയുടെ ഫേസ്ബുക്ക് പോസ്റ്റിൻ്റെ പൂർണരൂപം:

പോലീസിനും വേണം എ ഐ കാമറ

എറണാകുളത്ത് പോലീസ് സ്റ്റേഷനിൽ എത്തിയ സ്ത്രീയെ മർദ്ദിക്കുന്ന പോലീസ് ഓഫിസറുടെ വീഡിയോ കണ്ടു.

ഏറെ സങ്കടം തോന്നി.

ഇരുപത്തി ഒന്നാം നൂറ്റാണ്ടിലും കേരളത്തിലെ, അതും ഒരു മെട്രോ നഗരത്തിലെ, പൊലീസിലെ ഒരു ഓഫീസർക്ക് ചുറ്റും സഹപ്രവർത്തകരും നാട്ടുകാരും നോക്കി നിൽക്കെ സ്റ്റേഷനിൽ വന്ന ഒരു സ്ത്രീയുടെ കരണത്തടിക്കാൻ ഒരു സങ്കോചവുമില്ല.

അധികാരത്തിന്റെ ഹുങ്ക് ആണ്

നിയമത്തിന്റെ ലംഘനമാണ്

നിയമപാലനം ചെയ്യേണ്ട ആളാണ്

നിയമം എന്തെന്ന് അറിയാവുന്ന ആളാണ്, ചുരുങ്ങിയത് അറിഞ്ഞിരിക്കേണ്ട ആളാണ്

പക്ഷെ അതൊന്നും പറഞ്ഞിട്ട് കാര്യമില്ല. കാലം മാറിയിട്ടും പോലീസിന്റെ രീതികൾ മാറിയിട്ടില്ല.

ഒട്ടും അതിശയം തോന്നിയില്ല,

കാരണം ഇതൊരു ഒറ്റപ്പെട്ട സംഭവം ഒന്നുമല്ലല്ലോ.

ഇതേ പോലീസ് സ്റ്റേഷനിൽ ഇതേ ഓഫീസർ തന്നെ എത്രയോ ആളുകളെ മർദ്ദിച്ചിട്ടുണ്ടാകും

ഇദ്ദേഹത്തിന്റെ സർവ്വീസ് കാലഘട്ടത്തിൽ മറ്റിടങ്ങളിൽ വച്ച് എത്രയോ ആളുകളെ മർദ്ദിച്ചിട്ടുണ്ടാകാം ?

ഇതിനി ഒരാളോ ഒരു പോലീസ് സ്റ്റേഷനോ ആണോ.

ഇതിന് മുൻപ് നമ്മൾ എത്രയോ അനുഭവങ്ങൾ അറിഞ്ഞിരിക്കുന്നു. കാഴ്ചകൾ കണ്ടിരിക്കുന്നു.

അറിയാത്തതും കേൾക്കാത്തതും കാണാത്തതും അതിൽ എത്രയോ മടങ്ങ് കാണും ?

എന്തുകൊണ്ടാണ് ഇന്നും പോലീസുകാർ പബ്ലിക്കായി ആളുകളെ മർദ്ദിക്കാൻ ധൈര്യം കാണിക്കുന്നത് ?

ഒറ്റ കാരണമേ ഉള്ളൂ.

മറ്റു പോലീസുകാർ അവരെ സംരക്ഷിച്ചുകൊള്ളും എന്ന ഉറപ്പ്.

അത് വെറുതെ ഉള്ള ഉറപ്പല്ല. തലമുറകളായി അങ്ങനെ ഉള്ള ഒരു പാരസ്പര്യത്തിന്റെ ഉറപ്പാണ്.

തല്ലാൻ മാത്രമല്ല കൊല്ലാനും പോലീസുകാർ ധൈര്യപ്പെടുന്നതിന് ഇതേ കാരണം മാത്രം.

ഇന്ത്യയിലെ കസ്റ്റഡിമരണങ്ങളെപ്പറ്റി രണ്ടായിരത്തി പതിനാറിൽ ഹ്യൂമൻ റൈറ്സ് വാച്ച് പുറത്തിറക്കിയ റിപ്പോർട്ടിന്റെ പേര് തന്നെ അതാണ് "Bound by Brotherhood: India's Failure to End Killings in Police Custody"

രാജാധിപത്യം മാറി ജനാധിപത്യം വന്നിട്ടും

പാർട്ടികൾ മാറി മാറി ഭരിച്ചിട്ടും

കസ്റ്റഡി മർദ്ദനം അനുഭവിച്ചവർ ആഭ്യന്തരമന്ത്രി ആയിട്ടും

പോലീസിന്റെ അടിസ്ഥാന സ്വഭാവം മാറ്റാനായില്ല എന്നത് ഒരു സംസ്കാരമുള്ള ജനത എന്ന് ചിന്തിക്കുന്ന നമ്മളെ നാണിപ്പിക്കേണ്ടതാണ്.

മുക്കിന് മുക്കിനും സ്റ്റേഷനകത്തും ഒക്കെ സി സി ടി വി വരുന്നത് കൊണ്ടും എല്ലാവരുടെ കയ്യിലും മൊബൈൽ ഉള്ളത് കൊണ്ടും

മാധ്യമങ്ങളുടെ പിന്തുണയില്ലാതെ മർദ്ദന വിവരങ്ങൾ ആർക്കും പബ്ലിക്കായി പങ്കവെക്കാനുള്ള സാമൂഹ്യമാധ്യമ സംവിധാനങ്ങൾ ഉള്ളത് കൊണ്ടും

ഇത്തരത്തിൽ ഉള്ള നരാധമന്മാരുടെ പ്രവർത്തികൾ ഇടക്കൊക്കെ നമുക്ക് നേരിട്ട് കാണാൻ സാധിക്കുന്നുണ്ട്.

നാട്ടുകാരുടെ സമ്മർദ്ദം കൊണ്ടാണെങ്കിലും കുറച്ചു നാളത്തേക്ക് മാത്രം ആണെങ്കിലും ഇവരിൽ കുറച്ചുപേരെങ്കിലും സസ്‌പെൻഷനിൽ ആകുന്നുണ്ട്.

ഓരോ പോലീസുകാരന്റെ തോളിലും കാമറ വച്ച് കൊടുക്കേണ്ട കാലം അതിക്രമിച്ചു.

എന്നിട്ടത് പൂട്ടി വച്ചാൽ പോരാ. സി സി ടി വി ഫൂട്ടേജ് കിട്ടാൻ ഒരു വർഷം കോടതി കയറണമെന്ന സ്ഥിതി ആണെങ്കിൽ അതുകൊണ്ട് വലിയ ഗുണം ഉണ്ടാകില്ല.

പകരം ട്രാഫിക് നിയമലംഘനത്തിന് വേണ്ടി ഉള്ള സി സി ടി വി കാമറകൾ എ ഐ വച്ച് ദിവസങ്ങൾക്കകം ഫൈൻ നോട്ടീസ് വീട്ടിൽ എത്തുന്ന പോലെ കേരളത്തിലെ ഓരോ പോലീസ് സ്റ്റേഷനിലും പോലീസ് ഉദ്യോഗസ്ഥരുടെ തോളിലും ഉള്ള ക്യാമറ രംഗങ്ങൾ എ ഐ വച്ച് അനലൈസ് ചെയ്ത് നിയമ ലംഘനം (മർദ്ദനം, കൈക്കൂലി, അസഭ്യം, എന്നിങ്ങനെ) കണ്ടാൽ ഉടൻ ഒരാഴ്ച സസ്‌പെൻഷൻ ഓർഡർ വീട്ടിൽ എത്തുന്ന സംവിധാനം ഉണ്ടാക്കാൻ സാങ്കേതിക വിദ്യ ഒക്കെ ഇപ്പോൾ തന്നെ ഉണ്ട്.

എടുത്ത് ഉപയോഗിച്ചാൽ മതി.

ഒരു മൂന്നു പ്രാവശ്യം സസ്‌പെൻഷൻ കിട്ടുന്നവർക്ക് സ്ഥിരമായി വീട്ടിൽ ഇരിക്കാനുള്ള സംവിധാനം ഉണ്ടാക്കണം.

മർദ്ദനം എന്നത് ഒരു അടിസ്ഥാന സ്വഭാവം ഒന്നുമല്ല, ആർജിത സ്വഭാവമാണ്. പ്രത്യാഘാതം ഉണ്ടാകുമെന്ന് കണ്ടാൽ പെട്ടെന്ന് മാറുന്ന രോഗമാണ്.

പ്രത്യാഘാതം ഉണ്ടാകണം

മുരളി തുമ്മാരുകുടി

(പോലീസ് ഓഫീസർ മർദ്ദിച്ച സ്ത്രീയെ പിടിച്ചു മാറ്റുന്ന സമയത്ത് അടുത്ത് നിൽക്കുന്ന മറ്റൊരു സ്ത്രീ (വനിതാ പോലീസ് ഓഫീസർ?) തക്കത്തിന് ഒരു അടി കൊടുക്കുന്നത് പോലെ തോന്നിയത് എനിക്ക് മാത്രമാണോ?. സസ്‌പെൻഷൻ ഒക്കെ മുഖ്യ അടിക്കാർക്ക് മാത്രമല്ല കൂട്ടത്തിൽ അടിക്കുന്നവർക്കും കൊടുക്കണം. പന്തിയിൽ പക്ഷഭേദം പാടില്ല)

പോലീസ് സ്റ്റേഷനുകളിൽ എ.ഐ. ക്യാമറ വേണമെന്ന ഈ നിർദ്ദേശത്തോട് നിങ്ങൾ യോജിക്കുന്നുണ്ടോ? പോലീസിൻ്റെ അധികാര ദുർവിനിയോഗം തടയാൻ സാങ്കേതികവിദ്യ സഹായിക്കുമെന്ന് കരുതുന്നുണ്ടോ? ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം താഴെ കമൻ്റ് ചെയ്യുക.

#KeralaPolice #MuraliThummadukudy #AICamera #PoliceAssault #KochiNews #HumanRights