അതിരുകടന്ന പാപ്പരാസി മാധ്യമങ്ങൾ: കാമുകി മഹിക ശർമയുടെ സ്വകാര്യ ദൃശ്യങ്ങൾ പകർത്തിയതിനെതിരെ ഹാർദിക് പാണ്ഡ്യയുടെ രൂക്ഷ വിമർശനം

മുംബൈ: (KVARTHA) കാമുകി മഹിക ശർമയുടെ സ്വകാര്യ ദൃശ്യങ്ങൾ മോശമായ രീതിയിൽ പകർത്തി സോഷ്യൽ മീഡിയയിൽ പ്രചരിപ്പിച്ച പാപ്പരാസികൾക്കെതിരെ രൂക്ഷ വിമർശനവുമായി ഇന്ത്യൻ ക്രിക്കറ്റ് താരം ഹാർദിക് പാണ്ഡ്യ. മുംബൈയിലെ ബാന്ദ്രയിലുള്ള ഒരു റെസ്റ്റോറൻ്റിൽനിന്ന് മഹിക ശർമ ഗോവണി ഇറങ്ങി വരുന്ന ദൃശ്യങ്ങളാണ് സമൂഹമാധ്യമങ്ങളിൽ വൈറലായത്. ഒരു സ്ത്രീയും കാണാൻ ആഗ്രഹിക്കാത്ത ആംഗിളിലാണ് പാപ്പരാസികൾ ഈ രംഗങ്ങൾ ക്യാമറയിൽ പകർത്തിയതെന്നും ഇത് എല്ലാ അതിരുകളും ലംഘിച്ചെന്നും ഹാർദിക് പാണ്ഡ്യ ഇൻസ്റ്റഗ്രാം പോസ്റ്റിൽ വ്യക്തമാക്കി.

'സെലിബ്രിറ്റികളാവുമ്പോൾ പൊതുവേദികളിൽ ഞങ്ങളെ കൂടുതൽ പേർ ശ്രദ്ധിക്കുമെന്നും അത് ഞാൻ തിരഞ്ഞെടുത്ത ജീവിതത്തിൻ്റെ ഭാഗമാണെന്നും എനിക്കറിയാം. പക്ഷേ, ഇന്ന് സംഭവിച്ചത് എല്ലാ പരിധിയും ലംഘിക്കുന്നതായിരുന്നു. മുംബൈയിലെ ബാന്ദ്രയിലുള്ള ഒരു റെസ്റ്റോറൻ്റിലെ പടിക്കെട്ടുകൾ ഇറങ്ങുകയായിരുന്നു മഹിമ. ആ സമയം ലോകത്തൊരു സ്ത്രീയും കാണാൻ ആഗ്രഹിക്കാത്ത ഒരു പ്രത്യേക ആംഗിളിൽ പാപ്പരാസികൾ ചിത്രം പകർത്തി' - ഹാർദിക് പാണ്ഡ്യ ഇൻസ്റ്റഗ്രാം കുറിപ്പിൽ വ്യക്തമാക്കി.

🚨 INSTAGRAM STORY OF HARDIK PANDYA 🚨 pic.twitter.com/7XDRC5JodD

— Johns. (@CricCrazyJohns) December 9, 2025

പാപ്പരാസികളുടെ നടപടി വിലകുറഞ്ഞ പ്രചരണത്തിന് വേണ്ടിയുള്ളതാണെന്നും തലക്കെട്ടുകൾക്ക് വേണ്ടിയോ ക്ലിക്ക് ബൈറ്റുകൾക്ക് വേണ്ടിയോ ചെയ്യുന്ന ഇത്തരം പ്രവൃത്തികൾ ഒഴിവാക്കണമെന്നും താരം ആവശ്യപ്പെട്ടു. 'ഇത് ഒരിക്കലും തലക്കെട്ടുകളെക്കുറിച്ചോ അതിൽ ആരെല്ലാം ക്ലിക്ക് ചെയ്യുന്നു എന്നതിനെക്കുറിച്ചോ അല്ല. ഒരു സാമാന്യമായ മര്യാദയാണിത്. സ്ത്രീകൾ അന്തസ്സും മാന്യതയും അർഹിക്കുന്നുണ്ട്. അതുപോലെ എല്ലാവർക്കും അവരവരുടേതായ സ്വകാര്യതയുടെ അതിരുകളുണ്ട്. അടിസ്ഥാനപരമായ ബഹുമാനമാണ് ഇവിടെ വിഷയം' - താരം കൂട്ടിച്ചേർത്തു.

ദിവസവും കഠിനാധ്വാനം ചെയ്യുന്ന മാധ്യമ സുഹൃത്തുക്കളോടുള്ള ബഹുമാനം അറിയിച്ചുകൊണ്ടാണ് ഹാർദിക് തൻ്റെ അഭ്യർഥന വ്യക്തമാക്കിയത്. 'ദിവസവും കഠിന പ്രയത്നം ചെയ്യുന്ന മാധ്യമസഹോദരന്മാരോടാണ് ഇനി പറയുന്നത്, നിങ്ങളുടെ കഷ്ടപ്പാട് എനിക്ക് മനസിലാകും. ഞാൻ എപ്പോഴും സഹകരിക്കാറുമുണ്ട്. പക്ഷേ കുറച്ചുകൂടി ജാഗ്രതയോടെ പെരുമാറണമെന്ന് ഞാൻ അഭ്യർഥിക്കുകയാണ്. എല്ലാം ഇങ്ങനെ ക്യാമറക്കണ്ണുകളിലൂടെ ഒപ്പിയെടുക്കാനുള്ളതല്ല. എല്ലാ ആംഗിളുകളും പകർത്താനുള്ളതല്ല. നമുക്ക് കുറച്ചൊക്കെ മനുഷ്യത്വം നിലനിർത്താം' - ഹാർദിക് പാണ്ഡ്യ അഭിപ്രായപ്പെട്ടു.

സെർബിയൻ മോഡലും നടിയുമായ നടാഷ സ്റ്റാൻകോവിച്ചുമായുള്ള വിവാഹബന്ധം വേർപെടുത്തിയ ശേഷമാണ് ഹാർദിക് പാണ്ഡ്യ, മോഡലും യോഗ ട്രെയിനറുമായ മഹിക ശർമയുമായി അടുത്തത്. ഈ അടുപ്പം ഇന്ത്യൻ ക്രിക്കറ്റ് താരം പിന്നീട് സ്ഥിരീകരിക്കുകയും ചെയ്തിരുന്നു. മഹികയും ഹാർദിക്കും ഉടൻ വിവാഹിതരാകുമെന്ന് നേരത്തെ റിപ്പോർട്ടുകളുണ്ടായിരുന്നെങ്കിലും മഹിക ഈ അഭ്യൂഹങ്ങൾ തള്ളിയിരുന്നു.

സ്വകാര്യത മാനിക്കപ്പെടേണ്ടതിനെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Hardik Pandya blasts paparazzi for filming girlfriend Mahieka Sharma indecently.

 #HardikPandya #MahiekaSharma #Paparazzi #CelebrityPrivacy #SocialMedia #Cricket