നേതാക്കൾ വാക്ക് തന്നു, യൂത്ത് കോൺഗ്രസ് കരിങ്കൊടി കാട്ടി, പാർട്ടി കൈമലർത്തി; 'പിരിവ്' പുതിയ സമരമാർഗ്ഗം!
 

പഴയങ്ങാടി: (KVARTHA) മുഖ്യമന്ത്രി പിണറായി വിജയൻ നയിച്ച നവകേരള യാത്ര പഴയങ്ങാടി പിന്നിട്ട് തളിപ്പറമ്പ് മണ്ഡലത്തിലേക്ക് കടക്കുമ്പോൾ, എരിപുരം ഇലക്ട്രിക്കൽ സെക്ഷൻ ഓഫീസിനു സമീപം വെച്ച് മുഖ്യമന്ത്രിയും മന്ത്രിമാരും സഞ്ചരിച്ച ബസ്സിന് നേരെ കരിങ്കൊടി പ്രതിഷേധം നടത്തിയ യൂത്ത് കോൺഗ്രസ് പ്രവർത്തകരെ നേതൃത്വം പെരുവഴിയിലാക്കിയതായി പരാതി ഉയരുന്നു. 

കരിങ്കൊടി പ്രതിഷേധത്തിനിടെ ഡിവൈഎഫ്ഐ പ്രവർത്തകരുടെ ക്രൂരമായ മർദ്ദനമേറ്റ കല്യാശ്ശേരി നിയോജക മണ്ഡലം പ്രസിഡന്റ്, യൂത്ത് കോൺഗ്രസ് ജില്ലാ വൈസ് പ്രസിഡന്റ്, ഒരു വനിതാ പ്രവർത്തക ഉൾപ്പെടെ ആറോളം പേർ ചികിത്സ തേടിയിരുന്നു.

ഇവർ ആറുപേരും ഇപ്പോൾ പോലീസ് കേസുകളിൽ പ്രതികളായതോടെ കടുത്ത പ്രതിസന്ധിയിലാണ്. ചികിത്സയിൽ കഴിയുമ്പോൾ ഡിസിസി പ്രസിഡന്റ്, കെപിസിസി പ്രസിഡന്റ് ഉൾപ്പെടെയുള്ള നേതാക്കൾ നേരിട്ടെത്തി പാർട്ടി സംരക്ഷിക്കുമെന്ന വാഗ്ദാനങ്ങൾ നൽകിയിരുന്നെങ്കിലും, കേസ് നടത്തിപ്പിന് ആവശ്യമായ സഹായങ്ങൾ ചെയ്യാൻ ജില്ലാ കോൺഗ്രസ് നേതൃത്വം തയ്യാറായില്ലെന്നാണ് ആരോപണം. 

ഇതോടെ, പ്രവർത്തകർ സ്വന്തം നിലയിൽ പണം കണ്ടെത്താനായി പിരിവിന് ഇറങ്ങിയിരിക്കുകയാണ്. കേസിന് പലതവണ ഹാജരായെങ്കിലും ഇപ്പോൾ കേസ് അദാലത്തിന് വെച്ചിരിക്കുകയാണ്, ഓരോരുത്തരും 7000 രൂപ വീതം അടയ്ക്കണമെന്നാണ് നിർദ്ദേശം.

ഈ വിവരം ബ്ലോക്ക്, ജില്ലാ നേതൃത്വങ്ങളെ അറിയിച്ചപ്പോൾ അവർ കൈമലർത്തിയെന്നും പരാതിയുണ്ട്. ബ്ലോക്ക് പ്രസിഡന്റ് അടക്കമുള്ള ഉത്തരവാദിത്തപ്പെട്ട നേതാക്കന്മാർ പോലും ഫോൺ എടുക്കാതായതോടെയാണ് യൂത്ത് കോൺഗ്രസ്സുകാർ തങ്ങളുടെ ഗ്രൂപ്പുകളിൽ പണപ്പിരിവിനായുള്ള പ്രചാരണം ആരംഭിച്ചത്. ‘പാർട്ടിക്ക് വേണ്ടി സമരം ചെയ്തിട്ട് കിട്ടിയ കൂലി ഇതാണോ?’ എന്ന വിമർശനം യൂത്ത് കോൺഗ്രസ് പ്രവർത്തകർക്കിടയിൽ വലിയ ചർച്ചകൾക്കും പ്രതിഷേധത്തിനും വഴിയൊരുക്കിയിട്ടുണ്ട്.

ഈ വാർത്തയെക്കുറിച്ച് നിങ്ങളുടെ അഭിപ്രായം താഴെ കമൻ്റ് ചെയ്യുക.

Article Summary: Youth Congress workers abandoned after protest, raising funds for legal costs.

#YouthCongress #KeralaPolitics #Protest #Fundraising #PoliticalBetrayal #Pazhayangadi