ന്യൂഡൽഹി: (KVARTHA) 2024-ൽ ഇന്ത്യൻ രാഷ്ട്രീയ രംഗത്ത് നിന്ന് നിരവധി നേതാക്കളെ നഷ്ടമായി. ഏറ്റവും ഞെട്ടിച്ചത് നാല് തവണ കോൺഗ്രസ് എംഎൽഎയായിരുന്ന മഹാരാഷ്ട്രയിലെ ബാബാ സിദ്ദിഖിന്റെ  മരണമാണ്. പിന്നീട് എൻസിപിയിൽ ചേർന്ന അദ്ദേഹത്തെ ലോറൻസ് ബിഷ്ണോയി ഗുണ്ടാസംഘം നിയമിച്ച കൊലയാളികൾ ഒക്ടോബർ 12-ന് മുംബൈയിൽ വെടിവെച്ചുകൊലപ്പെടുത്തി.

സിപിഎമ്മിന്റെ എക്കാലത്തെയും മുൻനിര നേതാക്കളിൽ ഒരാളായ സിതാറാം യെച്ചൂരി 72-ാം വയസിൽ സെപ്റ്റംബർ 12-ന് അന്തരിച്ചു. 2005 മുതൽ 2017 വരെ പശ്ചിമ ബംഗാളിൽ നിന്ന് രാജ്യസഭാംഗമായിരുന്നു. സിപിഎം ജനറൽ സെക്രട്ടറിയും 1992 മുതൽ പാർട്ടിയുടെ പോളിറ്റ്ബ്യൂറോ അംഗവുമായിരുന്നു.

മുൻ ബീഹാർ ഉപമുഖ്യമന്ത്രി സുശീൽ കുമാർ മോദി മെയ് 13-ന് അന്തരിച്ചു. 2005 മുതൽ 2013 വരെയും 2017 മുതൽ 2020 വരെയും ബീഹാർ ഉപമുഖ്യമന്ത്രിയായിരുന്ന 72 കാരനായ സീനിയർ ബിജെപി നേതാവ് കാൻസർ ബാധിച്ച് ഒരു മാസത്തിന് ശേഷമാണ് വിടവാങ്ങിയത്.

മുൻ പ്രധാനമന്ത്രി ഡോ. മൻമോഹൻ സിങ്ങിന്റെ ആദ്യ യുപിഎ സർക്കാരിൽ 2004 മുതൽ 2005 വരെ വിദേശകാര്യമന്ത്രിയായിരുന്ന സീനിയർ കോൺഗ്രസ് നേതാവ് നട് വർ സിംഗ് ഓഗസ്റ്റ് 10-ന് അന്തരിച്ചു. മുൻ ഡിപ്ലോമാറ്റായ സിംഗ് 1953-ൽ ഐഎഫ്എസ് ഉദ്യോഗസ്ഥനായി ജോലി ആരംഭിച്ചു, 1984-ൽ നേരത്തെ വിരമിച്ച് രാഷ്ട്രീയത്തിലേക്ക് കടന്ന് ലോക്‌സഭാംഗമായി.

ഭാരത് രാഷ്ട്ര സമിതി (ബിആർഎസ്) നേതാവ് ജിത്ത ബാലകൃഷ്ണ റെഡ്ഡി സെപ്റ്റംബർ ആറിന് 52-ാം വയസ്സിൽ വിടവാങ്ങി. ടിആർഎസിന്റെ യുവനേതാവായി രാഷ്ട്രീയ പ്രവർത്തനം ആരംഭിച്ച റെഡ്ഡി തെലങ്കാന സംസ്ഥാന രൂപവത്കരണ പ്രസ്ഥാനത്തിലെ പങ്ക് കൊണ്ട് പ്രശസ്തി നേടി.

കർണാടക മുൻ മുഖ്യമന്ത്രിയും കേന്ദ്രമന്ത്രിയുമായ എസ്എം കൃഷ്ണ ഡിസംബർ 10ന് മരണപ്പെട്ടു. അദ്ദേഹത്തിന് 92 വയസായിരുന്നു. 1999 ഒക്ടോബർ 11 മുതൽ 2004 മേയ് 20 വരെ കർണാടക മുഖ്യമന്ത്രിയായി സേവനമനുഷ്ഠിച്ചു. ശേഷം, 2004 ഡിസംബർ ആറ് മുതൽ 2008 മാർച്ച് എട്ട് വരെ അദ്ദേഹം മഹാരാഷ്ട്ര ഗവർണറായി നിയമിതനായി. കേന്ദ്ര വിദേശകാര്യ മന്ത്രിയായി സേവനമനുഷ്ഠിച്ചതുൾപ്പെടെ നിരവധി സുപ്രധാന പദവികൾ വഹിച്ചിട്ടുണ്ട്.

#PoliticalLosses, #India2024, #BabaSiddique, #SitaramYechury, #SushilKumarModi, #IndianPolitics