Om Birla | ആരാണ് ലോക്‌സഭാ സ്പീക്കർ ഓം ബിർള? പുതിയൊരു ചരിത്രവും സൃഷ്ടിച്ചു!
ADVERTISEMENT
ന്യൂഡെൽഹി: (KVARTHA) പതിനെട്ടാം ലോക്സഭയുടെ സ്പീക്കറായി ഓം ബിർള തിരഞ്ഞെടുക്കപ്പെട്ടിരിക്കുകയാണ്. ബിജെപിയുടെ മുതിർന്ന നേതാവാണ് അദ്ദേഹം, പതിനേഴാം ലോക്‌സഭയിലും സ്പീക്കർ പദവി വഹിച്ചിട്ടുണ്ട്. . ഇതോടെ അദ്ദേഹമൊരു ചരിത്രവും സൃഷ്ടിച്ചു. രാജ്യത്തിൻ്റെ ചരിത്രത്തിൽ ഇതുവരെ ഒരു എംപിയും തുടർച്ചയായി രണ്ട് തവണ സ്പീക്കറായിട്ടില്ല. അതാണ് ഓം ബിർള മറികടന്നത്.
18-ാം ലോക്സഭയുടെ സ്പീക്കറായി ഓം ബിർലയെ തെരഞ്ഞെടുത്തു@ombirlakota @LokSabhaSectt pic.twitter.com/V8pCkxBvqZ
— PIB in KERALA (@PIBTvpm) June 26, 2024
മൂന്ന് തവണ എംപി
രാജസ്ഥാനിലെ കോട്ട സ്വദേശിയാണ് ഓം ബിർള. കോട്ട ലോക്‌സഭാ മണ്ഡലത്തിൽ നിന്നാണ് അദ്ദേഹം മൂന്നാം തവണയും ലോക്‌സഭാ തിരഞ്ഞെടുപ്പിൽ വിജയിച്ചത്. ബിജെപിയിൽ നിന്ന് കോൺഗ്രസിൽ ചേർന്ന മുൻ എംഎൽഎ പ്രഹ്ലാദ് ഗുഞ്ജനെ 41,974 വോട്ടിന് പരാജയപ്പെടുത്തിയാണ് അദ്ദേഹം തുടർച്ചയായ മൂന്നാം തവണയും പാർലമെൻ്റിലെത്തിയത്.
ആർഎസ്എസ് ശക്തികേന്ദ്രമായി കണക്കാക്കപ്പെടുന്ന കോട്ട മണ്ഡലത്തിൽ ബിജെപി ഓം ബിർളയിൽ ആത്മവിശ്വാസം പ്രകടിപ്പിച്ചിരുന്നു. കോട്ടയുടെ ചരിത്രത്തിൽ വൈദ്യ ദാവൂദ്യാൽ ജോഷിക്ക് ശേഷം മൂന്ന് തവണ നിയമസഭാ തെരഞ്ഞെടുപ്പിലും മൂന്ന് തവണ ലോക്‌സഭാ തെരഞ്ഞെടുപ്പിലും വിജയിച്ച ആദ്യ നേതാവാണ് അദ്ദേഹം.
ഓം ബിർളയുടെ രാഷ്ട്രീയ ജീവിതം
2003ന് ശേഷം ഒരു തിരഞ്ഞെടുപ്പിലും ഓം ബിർള തോറ്റിട്ടില്ല. 2003-ൽ കോട്ടയിൽ നിന്ന് ആദ്യമായി നിയമസഭാ തിരഞ്ഞെടുപ്പിൽ മത്സരിച്ച് വിജയിച്ചു. 2008ൽ കോട്ട സൗത്ത് സീറ്റിൽ നിന്ന് കോൺഗ്രസ് നേതാവ് ശാന്തി ധരിവാളിനെ പരാജയപ്പെടുത്തി. 2013-ൽ കോട്ട സൗത്ത് സീറ്റിൽ നിന്ന് മൂന്നാം തവണയും അദ്ദേഹം തിരഞ്ഞെടുപ്പിൽ വിജയിച്ചു.
2014-ൽ ആദ്യമായി ലോക്‌സഭാ തിരഞ്ഞെടുപ്പിൽ മത്സരിക്കുകയും വിജയിക്കുകയും ചെയ്തു. 2019ലും 2024ലും വിജയം ആവർത്തിച്ചു. 2019ൽ ബിജെപി അദ്ദേഹത്തെ സ്പീക്കറാക്കിയപ്പോൾ എല്ലാവരും അമ്പരന്നു. നീണ്ട പാർലമെൻ്ററി അനുഭവം ഇല്ലെങ്കിലും, ഓം ബിർള സഭ നടത്തിയ രീതി ശ്രദ്ധേയമായിരുന്നു.
വഹിച്ച പദവികൾ
2019 ജൂൺ 19 ന്, 17-ാം ലോക്സഭയുടെ സ്പീക്കറായി അദ്ദേഹം ഏകകണ്ഠമായാണ് തിരഞ്ഞെടുക്കപ്പെട്ടത്. 2003, 2008, 2013 വർഷങ്ങളിൽ കോട്ട, കോട്ട സൗത്ത് അസംബ്ലി മണ്ഡലങ്ങളിൽ നിന്ന് തുടർച്ചയായി മൂന്ന് തവണ രാജസ്ഥാൻ നിയമസഭയിലേക്ക് തിരഞ്ഞെടുക്കപ്പെട്ടു. 1997-2003 കാലഘട്ടത്തിൽ ഭാരതീയ ജനതാ യുവമോർച്ചയുടെ ദേശീയ വൈസ് പ്രസിഡൻ്റായിരുന്നു. 1993-1997ൽ ഭാരതീയ ജനതാ യുവമോർച്ച രാജസ്ഥാൻ സംസ്ഥാന പ്രസിഡൻ്റായും 1987-1991 കാലഘട്ടത്തിൽ ഭാരതീയ ജനതാ യുവമോർച്ചയുടെ കോട്ട ജില്ലാ പ്രസിഡൻ്റായും പ്രവർത്തിച്ചിട്ടുണ്ട്.
ഓം ബിർളയുടെ കാലയളവ്
പുതിയതും പഴയതുമായ പാർലമെൻ്റ് കെട്ടിടങ്ങളിൽ പ്രവർത്തിച്ചതിൻ്റെ റെക്കോർഡുള്ള ആദ്യ ലോക്‌സഭാ സ്പീക്കറാണ് ഓം ബിർള. പതിനേഴാം ലോക്‌സഭയിലെ അദ്ദേഹത്തിൻ്റെ ഭരണകാലം ഏറെ ചർച്ച ചെയ്യപ്പെട്ടിരുന്നു. വലിയൊരു വിഭാഗം എംപിമാരെ സസ്‌പെൻഡ് ചെയ്തത് വിവാദമായിരുന്നു. അദ്ദേഹത്തിൻ്റെ കാലയളവിൽ, ആർട്ടിക്കിൾ 370 റദ്ദാക്കൽ, പൗരത്വ ഭേദഗതി നിയമം (സിഎഎ), മൂന്ന് ക്രിമിനൽ നിയമങ്ങൾ നടപ്പാക്കൽ തുടങ്ങി നിരവധി സുപ്രധാന നിയമങ്ങൾ പാസായി. 17-ാം ലോക്‌സഭയിൽ 222 ബില്ലുകൾ നിയമമായി, കഴിഞ്ഞ മൂന്ന് ലോക്‌സഭകളിലെ ഏറ്റവും ഉയർന്ന കണക്കാണിത്.
കുടുംബ ജീവിതം
1962 നവംബർ 23നാണ് രാജസ്ഥാനിലെ കോട്ടയിൽ ഓം ബിർള ജനിച്ചത്. അച്ഛൻ്റെ പേര് ശ്രീകൃഷ്ണ ബിർള എന്നും അമ്മയുടെ പേര് ശ്രീമതി ശകുന്തള ദേവി എന്നുമാണ്. 1986-ൽ മഹർഷി ദയാനന്ദ സരസ്വതി സർവകലാശാലയിൽ നിന്ന് എം.കോം ബിരുദം നേടിയിട്ടുണ്ട്. 1991 മാർച്ച് 11-ന് അദ്ദേഹം ഡോ. അമിതാ ബിർളയെ വിവാഹം കഴിച്ചു. ഇവർക്ക് ആകാൻക്ഷ, അഞ്ജലി ബിർള എന്നിങ്ങനെ രണ്ട് പെൺമക്കളുണ്ട്.
