ന്യൂഡൽഹി: (KVARTHA) ഇന്ത്യ 76-ാമത് റിപ്പബ്ലിക് ദിനം അടുത്തിടെയാണ് ആഘോഷിച്ചത്. ഇതിനിടെ 144 വർഷത്തിലൊരിക്കൽ നടക്കുന്ന പ്രയാഗ് രാജിലെ മഹാകുംഭമേളയും നടക്കുകയാണ്. ഡൽഹി നിയമസഭാ  തിരഞ്ഞെടുപ്പ് പ്രചാരണവും അടുത്തിടെ അവസാനിച്ചു. ഈ പരിപാടികളിൽ രാജ്യത്തുടനീളമുള്ള നേതാക്കൾ സജീവമായി പങ്കെടുക്കുമ്പോൾ, പ്രതിപക്ഷ നേതാവായ രാഹുൽ ഗാന്ധിയുടെ ഇടപെടലുകൾ ഇല്ലെന്നും അദ്ദേഹത്തിന്റെ അസാന്നിധ്യവും രാഷ്ട്രീയമേഖലയിൽ ചർച്ചകൾക്ക് വഴി വെച്ചിരിക്കുകയാണ്.  

മഹാകുംഭമേള ലോകത്തിലെ ഏറ്റവും വലിയ മതപരമായ സംഗമങ്ങളിൽ ഒന്നാണ്. ബിജെപി നേതാക്കൾ മഹാകുംഭമേളയിൽ  സജീവമായി പങ്കെടുക്കുന്നു. പ്രധാനമന്ത്രി നരേന്ദ്ര മോദിയും, ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ നേതൃത്വത്തിൽ മുഴുവൻ മന്ത്രിമാരും പ്രയാഗ്രാജിലെ ത്രിവേണിസംഗമത്തിൽ പുണ്യസ്നാനം നടത്തുകയും, ആഭ്യന്തര മന്ത്രി അമിത് ഷാ ഉൾപ്പെടെ മറ്റ് ബിജെപി നേതാക്കളും പങ്കെടുക്കുകയും ചെയ്തു. രാഷ്ട്രപതി ദ്രൗപദി മുര്‍മു, ഉപരാഷ്ട്രപതി ജഗ്ദീപ് ധൻഖർ എന്നിവരും അടുത്ത ദിവസങ്ങളിൽ മഹാകുംഭമേളയിൽ പങ്കെടുക്കും.  

എന്നാൽ, രാഹുൽ ഗാന്ധി ഈ സാംസ്കാരിക ഉത്സവം പൂർണമായും അവഗണിച്ചുവെന്നാണ് വിമർശനം. ഇന്ത്യയുടെ ആത്മീയമായ പൈതൃകത്തോടുള്ള ഈ അവഗണന, അദ്ദേഹത്തിന്റെ മനോഭാവം വ്യക്തമാക്കുന്നതാണ് എന്നാണ് ഹിന്ദുത്വ നേതാക്കളുടെ ആരോപണം. താൻ 'ജന്മനാ ബ്രാഹ്മണൻ' ആണെന്ന് പലപ്പോഴും പറയാറുണ്ടെങ്കിലും, പ്രധാന സാംസ്കാരിക ആഘോഷങ്ങളിൽ നിന്നൊക്കെ അദ്ദേഹം ഒഴിഞ്ഞുമാറുന്നതായി ആക്ഷേപമുണ്ട്. ഗണേശചതുർത്ഥി, നവരാത്രി പോലുള്ള ഉത്സവങ്ങളിൽ നിന്നും അകലം പാലിക്കുന്നതും, രാമക്ഷേത്ര പ്രതിഷ്ഠ ചടങ്ങിൽ നിന്ന് വിട്ടുനിന്നതും ഹിന്ദുത്വ വാദികൾ ചർച്ചയാക്കിയിരുന്നു.

അയോധ്യയിലെ രാമക്ഷേത്രത്തിലെ പ്രാണപ്രതിഷ്ഠ ചടങ്ങിൽ നിന്ന് രാഹുൽ ഗാന്ധിയും, കോൺഗ്രസ് നേതൃത്വവും പൂര്‍ണമായും വിട്ടുനിന്നത് രാജ്യത്തെ മതനിരപേക്ഷ വോട്ടബാങ്ക് സംരക്ഷിക്കാനുള്ള ശ്രമമായി ഹിന്ദുത്വ വാദികൾ വിലയിരുത്തി.  2025-ലെ റിപ്പബ്ലിക് ദിനത്തിൽ പ്രതിപക്ഷ നേതാവായ രാഹുൽ ഗാന്ധിയും, കോൺഗ്രസ് അധ്യക്ഷൻ മല്ലികാർജുന്‍ ഖാർഗെയും പങ്കെടുക്കാതിരുന്നത് ബിജെപിയുടെ വലിയ വിമർശനങ്ങൾക്ക് കാരണമായി.  

പ്രധാനമന്ത്രി നരേന്ദ്ര മോദി പ്രളയബാധിത പ്രദേശങ്ങൾ സന്ദർശിക്കുകയും, സൈനികരുമായി നേരിട്ട് കൂടിക്കാഴ്ച നടത്തുകയും ചെയ്തപ്പോൾ, രാഹുൽ ഗാന്ധി വിദേശത്ത് അവധിയാഘോഷിച്ചതായാണ്  ബിജെപി നേതാക്കൾ ആരോപിക്കുന്നത്. 2022-ലെ ഭരണഘടനാ ദിനത്തിൽ രാഹുൽ ഗാന്ധി ഔദ്യോഗിക ചടങ്ങുകളിൽ പങ്കെടുക്കാതിരുന്നത് വലിയ വിവാദമായിരുന്നു. രാഷ്ട്രപതി ദ്രൗപദി മുര്‍മുവിനെ അഭിനന്ദിക്കാനോ, ഔദ്യോഗിക ചടങ്ങുകളിൽ പങ്കെടുക്കാനോ അദ്ദേഹം തയാറായില്ലെന്നും ആക്ഷേപമുണ്ട്.

രാഹുൽ ഗാന്ധിയുടെ അസാന്നിധ്യം സ്വന്തം പാർട്ടിയുടെ വിജയാഘോഷങ്ങളിലും പ്രകടമായിരുന്നുവെന്ന് വൺ ഇന്ത്യ പോർട്ടൽ റിപ്പോർട്ട് ചെയ്യുന്നു. കഴിഞ്ഞതവണ കോൺഗ്രസ് മധ്യപ്രദേശിലും രാജസ്ഥാനിലും  മികച്ച വിജയം നേടിയപ്പോൾ, വിജയാഘോഷങ്ങളിൽ രാഹുൽ ഗാന്ധി പങ്കെടുക്കാത്തതും ചർച്ചയായിരുന്നു. ഡൽഹി നിയമസഭാ തിരഞ്ഞെടുപ്പിലും കോൺഗ്രസ് പ്രചാരണ രംഗത്ത് പ്രധാന നേതാക്കളുടെ അഭാവം, പ്രത്യേകിച്ച് രാഹുൽ ഗാന്ധിയുടെ സമീപനം, പാർട്ടിയെ കാര്യമായി ദുർബലമാക്കിയെന്നും ആക്ഷേപമുണ്ട്.
രാഹുൽ ഗാന്ധി ഒളിച്ചോടുന്നുവെന്ന വിമർശനവുമായി അദ്ദേഹത്തിന്റെ നേതൃത്വഗുണത്തെ ചോദ്യം ചെയ്യുകയാണ് ബിജെപി അനുകൂലികൾ ഇപ്പോൾ.

Rahul Gandhi’s absence from key national events, including Maha Kumbh, Republic Day, and Delhi elections, has sparked political debates and BJP criticism.

#RahulGandhi #Politics #RepublicDay #MahaKumbh #BJP #Congress