വി എസ് അച്യുതാനന്ദൻ: പരാജയങ്ങളിൽനിന്ന് ഉയർത്തെഴുന്നേറ്റ നേതാവ്

സുജിത്ത് ലാൽ

കണ്ണൂർ: (KVARTHA) മലപ്പുറത്ത് നടന്ന സി.പി.എം. സംസ്ഥാന സമ്മേളനത്തിൽ പാർട്ടിയിൽ വി.എസ്. അച്യുതാനന്ദൻ നയിച്ച വിഭാഗം പരാജയപ്പെട്ടപ്പോൾ പ്രമുഖ മാർക്സിയൻ ചിന്തകനും നിരൂപകനുമായ എം.എൻ. വിജയൻ അഭിപ്രായപ്പെട്ടത്, ‘വി.എസ്. പരാജയം ഭക്ഷിച്ച് വളരുന്ന നേതാവാണ്’ എന്നായിരുന്നു. 

അത് വളരെ കൃത്യമായ വിലയിരുത്തലായിരുന്നു. ചിറകൊടിഞ്ഞു വീഴുകയും നിസ്സഹായനായി നിൽക്കുകയും ചെയ്യുമ്പോഴും ചാരത്തിൽനിന്ന് ഒരു ഫിനിക്സ് പക്ഷിയെപ്പോലെ പറന്നുയരാനുള്ള അസാമാന്യ കഴിവ് വി.എസിനുണ്ടായിരുന്നു. അദ്ദേഹത്തിന്റെ തിരഞ്ഞെടുപ്പുപോരാട്ടങ്ങൾ പരിശോധിച്ചാൽ ഈ കാര്യം വ്യക്തമാകും.

1965-ൽ വി.എസ്. അച്യുതാനന്ദൻ ആദ്യമായി നിയമസഭയിലേക്ക് മത്സരിച്ചെങ്കിലും അമ്പലപ്പുഴയിൽ പരാജയപ്പെട്ടു. പിന്നീട് 1967-ലും 1970-ലും അമ്പലപ്പുഴയിൽനിന്ന് വിജയിച്ചെങ്കിലും 1977-ൽ അമ്പലപ്പുഴ അദ്ദേഹത്തെ കൈവിട്ടു. പിന്നീട് 1991-ലായിരുന്നു വി.എസ്. തിരഞ്ഞെടുപ്പ് രംഗത്തേക്കുവന്നത്. 

അന്ന് മാരാരിക്കുളത്തുനിന്നായിരുന്നു മുഖ്യമന്ത്രി സ്ഥാനാർത്ഥിയായി വി.എസ്. മത്സരിച്ചത്. 1991-ൽ രാജീവ് ഗാന്ധിയുടെ ആകസ്മിക മരണം തുടർഭരണം പ്രതീക്ഷിച്ചിരുന്ന ഇടതുമുന്നണിക്ക് തിരിച്ചടിയായി. മാരാരിക്കുളത്തുനിന്ന് വിജയിച്ച വി.എസ്. അച്യുതാനന്ദൻ പിന്നീട് 1992-ൽ പ്രതിപക്ഷ നേതാവായി തിരഞ്ഞെടുക്കപ്പെട്ടു.

പിന്നീട് 1996-ൽ ഇടതുമുന്നണി അധികാരത്തിൽവന്നെങ്കിലും മാരാരിക്കുളത്ത് വി.എസ്. അച്യുതാനന്ദൻ വീണ്ടും പരാജയപ്പെട്ടു. സി.പി.എമ്മിലെ വിഭാഗീയതയുടെ തുടർച്ചയായിരുന്നു വി.എസ്. അച്യുതാനന്ദന്റെ ഈ പരാജയം. 

2001-ൽ മലമ്പുഴയിൽനിന്ന് വി.എസ്. തിരഞ്ഞെടുക്കപ്പെട്ടെങ്കിലും അന്ന് യു.ഡി.എഫ്. സർക്കാരാണ് അധികാരത്തിൽവന്നത്. അതോടെ വി.എസ്. വീണ്ടും പ്രതിപക്ഷ നേതാവായി.

2006-ൽ മലമ്പുഴയിൽനിന്ന് വിജയിച്ച് വി.എസ്. ആദ്യമായി കേരളത്തിന്റെ മുഖ്യമന്ത്രിയായി. പിന്നീട് 2011-ൽ വീണ്ടും മലമ്പുഴയിൽനിന്ന് തിരഞ്ഞെടുക്കപ്പെട്ടെങ്കിലും വിരലിലെണ്ണാവുന്ന സീറ്റുകളുടെ കുറവിൽ ഇടതുമുന്നണിക്ക് തുടർഭരണം നഷ്ടമായി. 

വി.എസ്. അച്യുതാനന്ദൻ വീണ്ടും പ്രതിപക്ഷ നേതാവായി തിരഞ്ഞെടുക്കപ്പെട്ടു. 2016-ൽ വി.എസ്. വീണ്ടും മലമ്പുഴയിൽനിന്ന് തിരഞ്ഞെടുക്കപ്പെട്ടെങ്കിലും പി.ബി. അംഗമായ പിണറായി വിജയനെ സി.പി.എം. പൊളിറ്റ്ബ്യൂറോ മുഖ്യമന്ത്രി സ്ഥാനത്തേക്ക് നിയോഗിക്കുകയായിരുന്നു. ഇതോടെ ഭരണപരിഷ്കാര കമ്മീഷൻ ചെയർമാൻ എന്ന ആലങ്കാരിക പദവിയിലേക്ക് വി.എസിന് ഒതുങ്ങേണ്ടിവന്നു.

വി.എസ്. അച്യുതാനന്ദന്റെ ഈ രാഷ്ട്രീയ ജീവിതത്തെക്കുറിച്ച്  നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: V.S. Achuthanandan's political journey, marked by numerous electoral defeats and comebacks.

#VSAchuthanandan #KeralaPolitics #ElectoralHistory #CommunistLeader #PoliticalComebacks #Kerala