ഉന്നാൽ മുടിയുമോ തമ്പീ: തമിഴക രാഷ്ട്രീയം ഇളക്കിമറിക്കാൻ തെരഞ്ഞെടുപ്പ് പ്രചാരണ യാത്രയുമായി വിജയ്

ഭാമനാവത്ത് 

ചെന്നൈ: (KVARTHA) തമിഴക വെട്രി കഴകം അധ്യക്ഷൻ വിജയ്‌യുടെ തെരഞ്ഞെടുപ്പ് പ്രചാരണ യാത്ര ഈ മാസം 13ന് ആരംഭിക്കും. തിരുച്ചിറപ്പള്ളിയിൽ നിന്നാണ് യാത്ര തുടങ്ങുന്നത്. മറ്റ് മൂന്നിടങ്ങളിൽ കൂടി വിജയ് അന്ന് പര്യടനം നടത്തും.

പോലീസ് അനുമതി കണക്കിലെടുത്താകും വിജയ് പ്രസംഗിക്കുന്ന സ്ഥലങ്ങളിൽ തീരുമാനമെടുക്കുക. പര്യടനത്തിനായി പ്രത്യേക വാഹനം തയ്യാറാക്കി കഴിഞ്ഞു. എഐഎഡിഎംകെയിൽ തർക്കം രൂക്ഷമാകുന്നതിനിടെയാണ് വിജയ്‌യുടെ യാത്ര തുടങ്ങുന്നത്.

അതുകൊണ്ടുതന്നെ അതിന് ഏറെ രാഷ്ട്രീയ പ്രാധാന്യമുണ്ട്. 2026ലെ തെരഞ്ഞെടുപ്പിൽ തമിഴ്‌നാട്ടിൽ ഡിഎംകെയെ അട്ടിമറിച്ച് അധികാരത്തിൽ വരികയാണ് വിജയ്‌യുടെ ലക്ഷ്യം. ഇതിനായി സ്വയം മുഖ്യമന്ത്രിയായി പ്രഖ്യാപിച്ചുകൊണ്ടാണ് നാടിളക്കിയുള്ള പത്ത് ദിവസത്തെ രാഷ്ട്രീയ പ്രചാരണ ജാഥ നടത്തുന്നത്.

അതേസമയം, എഐഎഡിഎംകെയിലെ പൊട്ടിത്തെറിക്ക് പിന്നാലെ മുതിർന്ന നേതാവ് കെ.എ. സെങ്കോട്ടയ്യനെതിരെ നടപടി സ്വീകരിച്ചത് തമിഴക രാഷ്ട്രീയത്തെ കലക്കിമറിച്ചിട്ടുണ്ട്. മുതിർന്ന നേതാവായ സെങ്കോട്ടയ്യനെ പാർട്ടി പദവികളിൽ നിന്ന് നീക്കിയതായി എഐഎഡിഎംകെ ജനറൽ സെക്രട്ടറി എടപ്പാടി പളനിസ്വാമി അറിയിച്ചിട്ടുണ്ട്.

ഏകപക്ഷീയമായ നടപടിയെന്നായിരുന്നു ഇതിന് സെങ്കോട്ടയ്യന്റെ മറുപടി. ഇപിഎസിനെ മുഖ്യമന്ത്രി സ്ഥാനാർഥിയായി ഉയർത്തിക്കാട്ടിയാൽ എൻഡിഎയിലേക്ക് തിരികെ വരില്ലെന്ന് ടിടിവി ദിനകരനും പ്രതികരിച്ചു.

പാർട്ടി വിട്ടുപോയ ശശികല, ഒ. പനീർ സെൽവം, ടിടിവി ദിനകരൻ എന്നിവരെ 10 ദിവസത്തിനകം തിരികെ കൊണ്ടുവരണമെന്ന് ആവശ്യപ്പെട്ട സെങ്കോട്ടയ്യന് 24 മണിക്കൂർ തികയും മുൻപാണ് പാർട്ടി സ്ഥാനങ്ങൾ നഷ്ടമായത്.

സെങ്കോട്ടയ്യൻ തനിക്കെതിരെ ഉയർത്തിയ വിമർശനങ്ങളിൽ എടപ്പാടി പളനിസ്വാമി അസ്വസ്ഥനായിരുന്നു. ചില മുതിർന്ന നേതാക്കളുമായി ചർച്ച നടത്തിയ ശേഷമാണ് ഓർഗനൈസിങ് സെക്രട്ടറിയടക്കമുള്ള പദവികളിൽ നിന്ന് സെങ്കോട്ടയ്യനെ നീക്കിയത്.

ഇതേ ആവശ്യമുന്നയിച്ച് എഐഎഡിഎംകെ പ്രവർത്തകർ ഇപിഎസ് സംസ്ഥാന പര്യടനം നടത്തുന്ന വാഹനം തടഞ്ഞിരുന്നു. ഇപിഎസിനെ മുഖ്യമന്ത്രി സ്ഥാനാർഥിയായി ഉയർത്തിക്കാട്ടിയാൽ എൻഡിഎയിലേക്ക് തിരികെ പോകില്ലെന്ന് എഎംഎംകെ ജനറൽ സെക്രട്ടറി ടിടിവി ദിനകരൻ പറഞ്ഞു.

എഐഎഡിഎംകെയിലെ പ്രശ്നങ്ങളിൽ ഘടകകക്ഷിയായ ബിജെപിക്ക് കടുത്ത അതൃപ്തിയുണ്ട്. വിജയ്‌യുടെ വി.ടി.കെ പാർട്ടി ഡിഎംകെക്കെതിരെയുള്ള പ്രതിപക്ഷ വോട്ടുകൾ ഭിന്നിപ്പിക്കുമോയെന്ന ആശങ്കയും ശക്തമാണ്.

ചതുഷ്ക്കോണ മത്സരത്തിലേക്കാണ് തമിഴക രാഷ്ട്രീയം നീങ്ങുന്നത്. യുവജനങ്ങളുടെയും ഇടത്തരക്കാരുടെയും ന്യൂനപക്ഷങ്ങളുടെയും വോട്ടുകൾ ലക്ഷ്യമിട്ടുകൊണ്ടാണ് ജോസഫ് വിജയ് നീങ്ങുന്നത്. അത് ഫലം കാണണമെങ്കിൽ തമിഴ് മണ്ണ് ഇളക്കിമറിക്കുക തന്നെ വേണം.

വിജയ്‌യുടെ ഈ രാഷ്ട്രീയ പ്രവേശനത്തെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യൂ, സുഹൃത്തുക്കൾക്ക് ഷെയർ ചെയ്യൂ.

Article Summary: Actor Vijay begins his political campaign, creating new challenges for DMK and AIADMK.

#Vijay #TamilNaduPolitics #DMK #AIADMK #VTK #2026Election