'വർഷങ്ങളായി വേട്ടയാടി, ഒടുവിൽ നീതി'; എസ് കെ ആശുപത്രി കേസിൽ വി എസ് ശിവകുമാറിന് വിജിലൻസ് ക്ലീൻ ചിറ്റ്, മന്ത്രി വീണാ ജോർജ് മാപ്പ് പറയണമെന്ന് ആവശ്യം

തിരുവനന്തപുരം: (KVARTHA) സ്വകാര്യ ആശുപത്രിയായ എസ്.കെ ആശുപത്രി ബിനാമി പേരിൽ സ്വന്തമാക്കി എന്നത് ഉൾപ്പെടെയുള്ള അനധികൃത സ്വത്ത് സമ്പാദന കേസിൽ മുൻമന്ത്രി വി.എസ് ശിവകുമാറിന് വിജിലൻസ് ക്ലീൻ ചിറ്റ്. വിജിലൻസിന്റെ അന്വേഷണത്തിൽ കഴമ്പില്ലെന്ന് കണ്ടെത്തിയതോടെ സത്യം ഒടുവിൽ ജയിച്ചിരിക്കുകയാണെന്ന് വി.എസ് ശിവകുമാർ പ്രതികരിച്ചു. 

വർഷങ്ങളായി രാഷ്ട്രീയ പ്രേരിതമായി തന്നെ വേട്ടയാടിയ ഇടതു സർക്കാരിന്റെ നീക്കങ്ങൾക്കുള്ള വ്യക്തമായ മറുപടിയാണ് നിലവിലെ വിജിലൻസ് റിപ്പോർട്ടെന്നും അദ്ദേഹം പറഞ്ഞു.

മന്ത്രി വീണാ ജോർജ് മാപ്പ് പറയണം

എന്നെ രാഷ്ട്രീയമായി വേട്ടയാടാൻ നിരവധി ശ്രമങ്ങൾ നടന്നു. അതിൽ ഒടുവിലത്തേതാണ് നിയമസഭയിൽ വെച്ച് നിലവിലെ ആരോഗ്യമന്ത്രി വീണാ ജോർജ് നടത്തിയത്. നിയമസഭയിലെ പ്രസ്താവന പിൻവലിച്ച് മാപ്പു പറയാൻ വീണാ ജോർജ് തയാറാകണം. സ്വന്തം വകുപ്പിലെ കെടുകാര്യസ്ഥത മറച്ചുവെക്കാൻ ഒരു അടിയന്തര പ്രമേയ ചർച്ചയ്ക്കിടെ ഞാൻ സ്വകാര്യ ആശുപത്രി വാങ്ങിയാണ് വകുപ്പ് വികസിപ്പിച്ചതെന്ന തികച്ചും നിരുത്തരവാദപരമായ പ്രസ്താവനയാണ് മന്ത്രി നടത്തിയത്. 

ഇതേ പ്രസ്താവന നിയമസഭാംഗം എന്ന പ്രിവിലേജില്ലാതെ പൊതുവേദിയിൽ പറയാൻ വീണാ ജോർജിന് ധൈര്യമുണ്ടോയെന്നും ശിവകുമാർ ചോദിച്ചു. ഇല്ലെങ്കിൽ പ്രസ്താവന നിരുപാധികം പിൻവലിച്ച് അവർ മാപ്പു പറയണമെന്നും അദ്ദേഹം ആവശ്യപ്പെട്ടു.

രാഷ്ട്രീയ പ്രേരിതമായ കേസ്

പൊതുജന സേവകനെന്ന നിലയിലെ തന്റെ രാഷ്ട്രീയ ജീവിതത്തെയും പ്രതിഛായയെയും തകർക്കുക എന്ന ലക്ഷ്യത്തോടെ കള്ളപ്പേരിൽ അനോണിമസായി പെറ്റീഷൻ നൽകിയാണ് ഇത്തരമൊരു കേസ് ഉയർത്തിക്കൊണ്ടുവന്നത്. 

2016-ലാണ് തനിക്കെതിരായ കേസ് ഇടതു സർക്കാർ കൊണ്ടുവരുന്നത്. 2018-ൽ പ്രാഥമിക അന്വേഷണം പൂർത്തിയാക്കി. അതിൽ തന്നെ അനധികൃത സ്വത്തുസമ്പാദനമോ ബിനാമി ഇടപാടുകളോ കണ്ടെത്താൻ കഴിഞ്ഞിട്ടില്ല.

എന്നിട്ടും രണ്ട് വർഷം കഴിഞ്ഞ് 2020-ലാണ് എഫ്.ഐ.ആർ രജിസ്റ്റർ ചെയ്തത്. ഇത് 2021-ലെ തിരഞ്ഞെടുപ്പ് മുന്നിൽ കണ്ടായിരുന്നു. പ്രാഥമിക അന്വേഷണത്തിൽ എന്തെങ്കിലും മെറ്റീരിയൽ എവിഡൻസ് ഉണ്ടെങ്കിൽ മാത്രമേ എഫ്.ഐ.ആർ രജിസ്റ്റർ ചെയ്യാൻ സാധിക്കൂ എന്ന് വിജിലൻസ് മാനുവലിൽ പറഞ്ഞിട്ടുണ്ട്. എന്നാൽ ഈ നടപടിക്രമങ്ങളെല്ലാം കാറ്റിൽ പറത്തിയാണ് എഫ്.ഐ.ആർ രജിസ്റ്റർ ചെയ്തത്.

ഹൈക്കോടതി ഇടപെടൽ

2016-ൽ ആരംഭിച്ച കേസ് 2026-ലെ അസംബ്ലി തിരഞ്ഞെടുപ്പ് വരെ നീട്ടിക്കൊണ്ടുപോവുക എന്ന ഉദ്ദേശം മനസ്സിലാക്കിയാണ് 2023-ൽ ഹൈക്കോടതിയിൽ കേസ് ഫയൽ ചെയ്ത് കേസ് തീർപ്പാക്കണമെന്ന് ആവശ്യപ്പെട്ടത്. 

അന്വേഷണം പൂർത്തീകരിച്ച് റിപ്പോർട്ട് സമർപ്പിക്കണം എന്ന ഹൈക്കോടതിയുടെ അന്ത്യശാസനം ഉൾക്കൊണ്ടാണ് വിജിലൻസ് ഇപ്പോൾ റിപ്പോർട്ട് സമർപ്പിച്ചത്. കോടതിയുടെ ഇടപെടൽ കൊണ്ടാണ് ഈ റിപ്പോർട്ട് ഈ സമയത്തെങ്കിലും വന്നത്.

മാനനഷ്ടക്കേസ്

എന്നെയും എന്റെ കുടുംബത്തെയും വേട്ടയാടി എന്നെ അഴിമതിക്കാരനായി ചിത്രീകരിച്ച് മാനസികമായി തകർക്കാനുള്ള ശ്രമമാണ് നടത്തിയത്. ഇതിനിടയിൽ എനിക്കെതിരെ സോഷ്യൽ മീഡിയയിലൂടെ വ്യാജപ്രചരണം നടത്തിയവർക്കെതിരെ തിരുവനന്തപുരം സബ് കോടതിയിൽ 50 ലക്ഷം രൂപയുടെ നഷ്ടപരിഹാര കേസും മജിസ്ട്രേറ്റ് കോടതിയിൽ ക്രിമിനൽ കേസും കൊടുത്തിട്ടുണ്ടെന്നും വി.എസ് ശിവകുമാർ അറിയിച്ചു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Vigilance has given a clean chit to former minister V.S. Sivakumar in the illegal assets case related to SK Hospital.

#VSSivakumar #VigilanceCleanChit #KeralaPolitics #SKHospitalCase #VeenaGeorge #Congress #UDF #KVARTHA