പിണറായി ഭരണത്തിലെ വേട്ടയാടലുകൾ മറക്കില്ല; ജനങ്ങൾക്ക് നൽകിയ വാഗ്ദാനങ്ങൾ പാലിക്കുമെന്ന് മുഖ്യമന്ത്രി വിഡി സതീശൻ

പയ്യന്നൂർ: (KVARTHA) മുൻ മുഖ്യമന്ത്രി പിണറായി വിജയൻ്റെ നേതൃത്വത്തിൽ കഴിഞ്ഞ 10 വർഷക്കാലം കേരളത്തിൽ രാഷ്ട്രീയ എതിരാളികളോട് നടത്തിയ വേട്ടയാടലുകളും അക്രമങ്ങളും മറക്കില്ലെന്ന് മുഖ്യമന്ത്രി വിഡി സതീശൻ വ്യക്തമാക്കി. യുഡിഎഫ് പ്രവർത്തകർ അനുഭവിച്ച യാതനകളും പ്രയാസങ്ങളും ചെറുതല്ലെന്നും അദ്ദേഹം ഓർമിപ്പിച്ചു. മുൻ എംഎൽഎയും കെപിസിസി ജനറൽ സെക്രട്ടറിയുമായിരുന്ന കെപി കുഞ്ഞിക്കണ്ണൻ്റെ രണ്ടാം ചരമവാർഷിക ദിനാചരണത്തിൻ്റെ ഭാഗമായി പയ്യന്നൂർ ഗാന്ധി പാർക്കിൽ നടന്ന അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

എല്ലാം മറന്നു പോകുന്ന കാലം കഴിഞ്ഞെന്നും, അധികാരത്തിൽ ഇരിക്കുന്നത് സാധാരണക്കാരുടെ കഠിനാധ്വാനത്തിൻ്റെ ഫലമാണെന്നും മുഖ്യമന്ത്രി പറഞ്ഞു. അധികാരത്തിൽ വരുമ്പോൾ പഴയ പല കാര്യങ്ങളും മറന്നു പോകുന്ന പ്രവണതയുണ്ട്, എന്നാൽ അങ്ങനെ എല്ലാം മറക്കാൻ പാടില്ല. പ്രവർത്തകർ അനുഭവിച്ച വേദനയും ദുഃഖവും പ്രയാസങ്ങളും ഈ സർക്കാർ ഒരിക്കലും മറക്കില്ലെന്നും മുഖ്യമന്ത്രി കൂട്ടിച്ചേർത്തു.

പ്രിയദർശിനി യാത്രയും വികസന വാഗ്ദാനങ്ങളും

സ്ത്രീകൾക്ക് ഈ സർക്കാർ ഏർപ്പെടുത്തിയ 'പ്രിയദർശിനി' ബസ് യാത്ര കേവലമൊരു സൗജന്യമല്ലെന്ന് മുഖ്യമന്ത്രി വ്യക്തമാക്കി. ആ വണ്ടിയിൽ കയറുമ്പോൾ സർക്കാരിൻ്റെ സൗജന്യമാണെന്ന് മനസ്സിൽ പോലും വിചാരിക്കരുത്. കേരളത്തിലെ സർക്കാർ സ്ത്രീകളോട് കാണിക്കുന്ന വലിയ ആദരവാണെന്ന് വിചാരിച്ചു വേണം ആ ബസ്സിൽ കയറാനെന്നും അദ്ദേഹം പറഞ്ഞു. മുതിർന്ന പൗരന്മാർക്ക് വേണ്ടിയിട്ടുള്ള നിരവധി പദ്ധതികളുമായിട്ടാണ് ഇനി സർക്കാർ മുന്നോട്ട് വരുന്നത്. അവരെയും പൂർണമായി ചേർത്തു നിർത്തും.

രാജ്യത്തിന് മാതൃകയാകുന്ന രീതിയിൽ ഒരുപാട് കാര്യങ്ങൾ ചെയ്യാൻ കഴിയുമെന്നും അതിന് എല്ലാവരുടെയും സ്നേഹപൂർണമായ പിന്തുണ വേണമെന്നും അദ്ദേഹം അഭ്യർഥിച്ചു. പയ്യന്നൂരിൻ്റെ വികസന പ്രവർത്തനങ്ങൾക്ക് സർക്കാരിൻ്റെ പ്രത്യേക മുൻഗണന ഉണ്ടാവും. 

ജനപ്രതിനിധികളുടെ കൂടി പിന്തുണയോടെ വികസന കാര്യങ്ങൾ സമയബന്ധിതമായി പൂർത്തിയാക്കുമെന്നും അദ്ദേഹം ഉറപ്പുനൽകി. ഈ നാടിന് പുതിയ സർക്കാരിനെ കുറിച്ച് ഒരുപാട് സ്വപ്നങ്ങളും വലിയ പ്രതീക്ഷയുമുണ്ട്. ആ സ്വപ്നങ്ങളെ യാഥാർഥ്യമാക്കാൻ കഠിനാധ്വാനം ഉണ്ടാകുമെന്നും അദ്ദേഹം പറഞ്ഞു.

വാക്കുകൾ പാലിക്കപ്പെടാനുള്ളതാണ്

ജനങ്ങൾക്ക് സർക്കാർ കുറേ വാക്കുകൾ നൽകിയിട്ടുണ്ട്, ആ ഉറപ്പുകൾ പാലിക്കപ്പെടാൻ ഉള്ളതാണ്. രാഷ്ട്രീയക്കാരെ കുറിച്ചും ഭരണാധികാരികളെ കുറിച്ചും ജനങ്ങൾക്ക് പൊതുവെ സംശയമുണ്ട്. എന്നാൽ പറഞ്ഞ ഓരോ വാക്കും സർക്കാരിന് ഓർമയുണ്ടെന്നും അവ ഹൃദയത്തിൽ കുറിച്ചിട്ടുണ്ടെന്നും അദ്ദേഹം വ്യക്തമാക്കി. 

തെരഞ്ഞെടുപ്പ് പ്രകടന പത്രികയിൽ പറഞ്ഞിട്ടുള്ള മുഴുവൻ കാര്യങ്ങളും ഘട്ടംഘട്ടമായി നടപ്പിലാക്കുമെന്നും അദ്ദേഹം ഉറപ്പുനൽകി. ഇന്ത്യൻ നാഷണൽ കോൺഗ്രസിൻ്റെ അടിത്തറ വിപുലമാക്കുന്നതിൽ നിർണായകമായ പങ്കുവഹിച്ച പ്രഗത്ഭനായ നേതാവായിരുന്നു കെപി കുഞ്ഞിക്കണ്ണനെന്നും അദ്ദേഹത്തെ അനുസ്മരിച്ചുകൊണ്ട് വിഡി സതീശൻ പറഞ്ഞു.

പ്രമുഖരുടെ സാന്നിധ്യം

അനുസ്മരണ പരിപാടിയിൽ കണ്ണൂർ ഡിസിസി പ്രസിഡൻ്റ് അഡ്വ. മാർട്ടിൻ ജോർജ് അധ്യക്ഷത വഹിച്ചു. കാസർകോട് എംപി രാജ്‌മോഹൻ ഉണ്ണിത്താൻ, എംഎൽഎമാരായ സന്ദീപ് വാര്യർ, വി കുഞ്ഞികൃഷ്ണൻ, അഡ്വ. ടിഒ മോഹനൻ, കെപിസിസി ഭാരവാഹികളായ വിഎ നാരായണൻ, അഡ്വ. സോണി സെബാസ്റ്റ്യൻ, ബാലകൃഷ്ണൻ പെരിയ, കാസർകോട് ഡിസിസി പ്രസിഡൻ്റ് പികെ ഫൈസൽ, എംപി ഉണ്ണിക്കൃഷ്ണൻ, എപി നാരായണൻ, കെ ജയരാജ് എന്നിവർ പ്രസംഗിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: Chief Minister VD Satheesan inaugurated the 2nd death anniversary commemoration of KP Kunhikannan at Payyanur, where he strongly criticized the political violence during the previous 10-year rule and affirmed his government's commitment to fulfilling all promises, including the 'Priyadarshini' bus scheme for women.

#Kvartha #VDSatheesan #KeralaPolitics #UDF #Payyanur #MalayalamNews #PoliticalNews #AmmuNews