യു കെ കുഞ്ഞിരാമൻ രക്തസാക്ഷി സ്തൂപം കരി ഓയിൽ ഒഴിച്ച് വികൃതമാക്കി; ആർഎസ്എസ് പ്രവർത്തകർക്കെതിരെ സിപിഎം ആരോപണം

കൂത്തുപറമ്പ്: (KVARTHA) കൂത്തുപറമ്പ് - മട്ടന്നൂർ സംസ്ഥാന പാതയിലെ നീർവേലിയിൽ സ്ഥാപിച്ചിട്ടുള്ള സി പി എം രക്തസാക്ഷി സ്തൂപം അജ്ഞാതർ വികൃതമാക്കിയതായി പരാതി.

തലശേരി കലാപ സമയത്ത് മുസ്‌ലിം പള്ളിക്ക് നേരെ നടന്ന അക്രമങ്ങൾ തടയാൻ കാവൽ നിൽക്കുന്നതിനിടെ കൊല്ലപ്പെട്ട സി പി എം പ്രവർത്തകൻ യു കെ കുഞ്ഞിരാമന്റെ രക്തസാക്ഷി സ്മൃതിമണ്ഡപമാണ് വികൃതമാക്കിയ നിലയിൽ കണ്ടെത്തിയത്. ചൊവ്വാഴ്ച രാത്രി 12 മണിയോടെയാണ് സംഭവം നടന്നതെന്നാണ് പ്രാഥമിക നിഗമനം.

അക്രമത്തിന് പിന്നിൽ ആർ എസ് എസ് പ്രവർത്തകരാണെന്ന് സി പി എം ആരോപിച്ചു. യു കെ രക്തസാക്ഷി മണ്ഡപത്തിൽ കരി ഓയിൽ ഒഴിച്ചും സമീപത്തുണ്ടായിരുന്ന കൊടിമരം പിഴുതെറിഞ്ഞുമാണ് സ്മാരകം വികൃതമാക്കിയിരിക്കുന്നത്.

മട്ടന്നൂർ നഗരസഭയിലെ നീർവേലി അളകാപുരി എന്ന പ്രദേശത്താണ് യു കെ കുഞ്ഞിരാമന്റെ സ്മാരകം സ്ഥാപിച്ചിട്ടുള്ളത്. ഈ പ്രദേശം സി പി എം സ്വാധീന മേഖലയാണ്.

സംഭവത്തിൽ മട്ടന്നൂർ പോലീസ് അന്വേഷണം ആരംഭിച്ചു. പ്രദേശത്തെ സി സി ടി വി ദൃശ്യങ്ങൾ പരിശോധിക്കുമെന്ന് പോലീസ് അറിയിച്ചു.

രാഷ്ട്രീയ സ്മാരകങ്ങൾ വികൃതമാക്കുന്ന ഈ പ്രവണതയെ നിങ്ങൾ എങ്ങനെ കാണുന്നു? നിങ്ങളുടെ പ്രതികരണം കമൻ്റ് ചെയ്യുക. 

Article Summary: CPM martyr column of U K Kunhiraman vandalized in Koothuparamba with black oil; CPM blames RSS.

#Koothuparamba #PoliticalViolence #CPMKerala #RSS #MartyrColumn #KeralaNews