കണ്ണൂരിൽ സി പി എം ജില്ലാ സെക്രട്ടറിയുടെ പഞ്ചായത്തിൽ എൽ ഡി എഫ് വോട്ട് അസാധുവായി: മുണ്ടേരിയിൽ യു ഡി എഫ് ഭരണം പിടിച്ചു

കണ്ണൂർ: (KVARTHA) സി പി എമ്മിന് ഒരു ഗ്രാമപഞ്ചായത്ത് ഭരണം കൂടി നഷ്ടമായി. ഏറെക്കാലമായി എൽ ഡി എഫ് ഭരിച്ചുവരുന്ന മുണ്ടേരി പഞ്ചായത്തിൽ ഭരണം യു ഡി എഫ് പിടിച്ചെടുത്തു. എൽ ഡി എഫിന്റെ ഒരു വോട്ട് അസാധുവായതാണ് ഭരണ നഷ്ടത്തിന് കാരണമായത്. ഇതോടെ പത്തിനെതിരെ 11 വോട്ടുകൾക്ക് യു ഡി എഫ് ഇവിടെ വിജയിച്ചു.

എൽ ഡി എഫ് അംഗത്തിന്റെ വോട്ട് അസാധുവായതിനാൽ നറുക്കെടുപ്പ് ഒഴിവാകുകയും യു ഡി എഫ് നേരിട്ട് അധികാരം നേടുകയുമായിരുന്നു. വർഷങ്ങൾക്ക് ശേഷമാണ് ഇവിടെ യു ഡി എഫ് അധികാരത്തിലെത്തുന്നത്. 

മുണ്ടേരി പഞ്ചായത്തിൽ എൽ ഡി എഫിന്റെ വോട്ട് അസാധുവായതല്ല, ബോധപൂർവം അസാധുവാക്കിയതാണെന്ന് യൂത്ത് കോൺഗ്രസ് മുൻ നേതാവ് റിജിൽ മാക്കുറ്റി ആരോപിച്ചു. സി പി എം കണ്ണൂർ ജില്ലാ സെക്രട്ടറി കെ കെ രാഗേഷിനോടുള്ള പ്രതിഷേധമാണിതെന്നും അദ്ദേഹം പറഞ്ഞു.

സി പി എം കണ്ണൂർ ജില്ലാ സെക്രട്ടറി കെ കെ രാഗേഷിന്റെ വീട് സ്ഥിതി ചെയ്യുന്ന പഞ്ചായത്തായ മുണ്ടേരിയിലെ ഭരണനഷ്ടം പാർട്ടിക്ക് കനത്ത തിരിച്ചടിയാണ്. മുസ്ലിം ലീഗിലെ സി കെ റസീന പഞ്ചായത്ത് പ്രസിഡന്റായി തിരഞ്ഞെടുക്കപ്പെട്ടു. പടന്നോട്ട് വാർഡിൽ നിന്നുള്ള അംഗമാണ് റസീന. 

22 വാർഡുകളുള്ള പഞ്ചായത്തിൽ യു ഡി എഫിനും എൽ ഡി എഫിനും 11 സീറ്റുകൾ വീതമാണ് തിരഞ്ഞെടുപ്പിൽ ലഭിച്ചിരുന്നത് (ഒരംഗം കുറഞ്ഞതോടെ വോട്ട് നില മാറി). ഒടുവിൽ തിരഞ്ഞെടുപ്പിൽ റസീനയ്ക്ക് 11 വോട്ടും എതിർ സ്ഥാനാർഥി സി പി എമ്മിലെ ഷമ്മി കൊമ്പന് 10 വോട്ടും ലഭിച്ചു.

തദ്ദേശ സ്വയംഭരണ തിരഞ്ഞെടുപ്പ് ഫലം വന്നപ്പോൾ തന്നെ സി പി എമ്മിന് ഇവിടെ തിരിച്ചടികൾ നേരിട്ടിരുന്നു. മുൻ പഞ്ചായത്ത് പ്രസിഡന്റും കെ കെ രാഗേഷിന്റെ സഹോദര ഭാര്യയുമായ കെ അനിഷ ഒൻപതാം വാർഡിൽ യു ഡി എഫ് സ്ഥാനാർഥി അഷ്റഫിനോട് പരാജയപ്പെട്ടിരുന്നു. 

പഞ്ചായത്തിലെ ആകെ വോട്ടുകളുടെ കണക്കിൽ യു ഡി എഫ് ബഹുദൂരം മുന്നിലാണ്. യു ഡി എഫ് 12,913 വോട്ടുകൾ നേടിയപ്പോൾ എൽ ഡി എഫിന് 10,831 വോട്ടുകളാണ് ലഭിച്ചത്. അതേസമയം, മുണ്ടേരിയിലെ അട്ടിമറിക്ക് പിന്നിൽ മുസ്ലിം ലീഗ് - ജമാഅത്തെ ഇസ്‌ലാമി കൂട്ടുകെട്ടാണെന്നാണ് കെ കെ രാഗേഷിന്റെ ആരോപണം. 

സ്ഥാനാർഥി നിർണയത്തിലുണ്ടായ പ്രതിഷേധം പാർട്ടിയെ പ്രതിസന്ധിയിലാക്കിയിരുന്നു. തോറ്റ മുൻ പ്രസിഡന്റ് കെ അനിഷയെ വീണ്ടും മത്സരിപ്പിക്കുന്നതിനെതിരെ പാർട്ടിക്കുള്ളിൽ തന്നെ എതിർപ്പുണ്ടായിരുന്നുവെന്നും റിപ്പോർട്ടുകളുണ്ട്. ഇതിനോടൊപ്പം മുസ്ലിം ലീഗ് - ജമാത്തെ ഇസ്ലാമി പ്രവർത്തകർ നടത്തിയ വിഭാഗിയത നിറഞ്ഞ പ്രചരണപ്രവർത്തനങ്ങളും സോഷ്യൽ മീഡിയ ക്യാംപയിനും വൻ തോൽവിക്ക് ഇടയാക്കി.

മുണ്ടേരിയിലെ രാഷ്ട്രീയ മാറ്റത്തെക്കുറിച്ച് നിങ്ങളുടെ അഭിപ്രായം താഴെ കമന്റ് ചെയ്യൂ. ഷെയർ ചെയ്യൂ.

Article Summary: UDF captures Munderi Panchayat in Kannur after LDF vote becomes invalid in a major blow to CPM.

#KannurNews #CPM #UDF #MunderiPanchayat #KeralaPolitics #LDF