വാഷിംഗ്ടൺ: (KVARTHA) ട്രാൻസ്‌ജെൻഡർ വ്യക്തികളെ സൈന്യത്തിൽ പ്രവേശിപ്പിക്കേണ്ടതില്ലെന്ന കർശന നിലപാടുമായി യുഎസ് സൈന്യം. ട്രാൻസ്‌ജെൻഡർ റിക്രൂട്ട്‌മെൻ്റ് ഉടനടി നിർത്തിവച്ചതായി സൈന്യം അറിയിച്ചു. മാത്രമല്ല, സൈന്യത്തിൽ നിലവിലുള്ള ട്രാൻസ്‌ജെൻഡർ വ്യക്തികളുടെ ലിംഗമാറ്റ ശസ്ത്രക്രിയകൾ ഉൾപ്പെടെയുള്ള നടപടികളും താൽക്കാലികമായി നിർത്തിവച്ചു.

യുഎസ് പ്രസിഡന്റായി ചുമതലയേറ്റത് മുതൽ ഡൊണാൾഡ് ട്രംപ് ട്രാൻസ്‌ജെൻഡറുകളോട് കർശനമായ നിലപാടുകളാണ് സ്വീകരിച്ചിട്ടുള്ളത്. പ്രസിഡന്റായി അധികാരമേറ്റയുടൻ, ജനനസമയത്തെ ലിംഗഭേദം അടിസ്ഥാനമാക്കി, ലിംഗം തിരിച്ചറിയുന്നത് പരിമിതപ്പെടുത്തുന്നതിനുള്ള ഉത്തരവ് അദ്ദേഹം പുറപ്പെടുവിച്ചിരുന്നു. അതിൻ്റെ തുടർച്ചയായി വേണം ഈ പുതിയ തീരുമാനത്തെയും വിലയിരുത്താൻ. 

ട്രാൻസ്‌ജെൻഡർ റിക്രൂട്ട്‌മെൻ്റ് നിർത്തിവച്ചതിനെക്കുറിച്ച് യുഎസ് സൈന്യം അവരുടെ ഔദ്യോഗിക എക്സ് അക്കൗണ്ടിലൂടെയാണ് അറിയിച്ചത്. ലിംഗപരമായ പ്രശ്നങ്ങളുള്ള ആളുകൾ രാജ്യത്തെ സേവിക്കാൻ സന്നദ്ധരായി മുന്നോട്ട് വന്നിട്ടുണ്ട്. അവരെ ബഹുമാനത്തോടും, അന്തസ്സോടെയും പരിഗണിക്കുമെന്നും സൈന്യം അറിയിച്ചു.

ബറാക് ഒബാമയുടെ ഭരണത്തിൽ 2016-ൽ ട്രാൻസ്‌ജെൻഡർ വ്യക്തികളെ സൈന്യത്തിൽ പ്രവേശിപ്പിക്കാൻ അനുമതി നൽകിയിരുന്നു. എന്നാൽ, ട്രംപ് ഇത് റദ്ദാക്കുമെന്ന് നേരത്തെ തന്നെ പ്രഖ്യാപിച്ചിരുന്നു. 'ലോകത്തിലെ ഏറ്റവും ശക്തമായ പോരാട്ട സേനയെ ഉറപ്പാക്കാൻ ട്രാൻസ്‌ജെൻഡർ പ്രത്യയശാസ്ത്രം നമ്മുടെ സൈന്യത്തിൽ നിന്ന് പൂർണമായും തുടച്ചുനീക്കും', എന്ന് അദ്ദേഹം ഫ്ലോറിഡയിൽ നടന്ന റിപ്പബ്ലിക്കൻ സമ്മേളനത്തിൽ പറഞ്ഞിരുന്നു.

അതേസമയം, ട്രാൻസ്‌ജെൻഡർ വിഭാഗക്കാർക്കെതിരായ വിവേചനം, ഭരണഘടനാ അവകാശങ്ങളുടെ ലംഘനം എന്നിവ ആരോപിച്ച് ട്രംപിന്റെ ഉത്തരവിനെതിരെ ഹർജി സമർപ്പിക്കപ്പെട്ടിരുന്നു. ഈ വിഷയത്തിൽ കോടതിയുടെ അന്തിമ വിധി വരാനിരിക്കുന്നതേയുള്ളു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

US military halts transgender recruitment and bans gender transition surgery, a controversial move under President Trump, facing legal challenges.

#USMilitary, #TransgenderBan, #Trump, #TransgenderRights, #USArmy, #LGBTQ