യാതൊരു വിട്ടുവീഴ്ചയ്ക്കും തയ്യാറല്ലെന്ന് തമിഴ്നാട് സർക്കാർ; മുല്ലപ്പെരിയാർ അണക്കെട്ട് വിവാദം വീണ്ടും കത്തുന്നു

ചെന്നൈ: (KVARTHA) മുല്ലപ്പെരിയാറിൽ പുതിയ ഡാം അനുവദിക്കില്ലെന്ന് തമിഴ്നാട് സർക്കാർ വ്യക്തമാക്കി. പുതിയ അണക്കെട്ട് നിർമിക്കണമെന്ന കേരളത്തിൻ്റെ ആവശ്യത്തെ ശക്തമായി എതിർക്കുമെന്ന് സംസ്ഥാനം ഭരിക്കുന്ന ടിവികെ സർക്കാർ അറിയിച്ചു. തമിഴ്നാട് നിയമസഭയിലെ നയപ്രഖ്യാപന പ്രസംഗത്തിലായിരുന്നു സർക്കാർ ഇക്കാര്യം വ്യക്തമാക്കിയത്. പുതിയ ഡാം നിർമാണവുമായി ബന്ധപ്പെട്ട് യാതൊരു വിട്ടുവീഴ്ചയ്ക്കും തയ്യാറല്ലെന്ന വ്യക്തമായ സൂചനയാണ് പുതിയ തമിഴ്നാട് സർക്കാരും ഇതിലൂടെ നൽകുന്നത്.

തമിഴ് തായ് വാഴ്ത്ത് ആലപിച്ചുകൊണ്ടാണ് നിയമസഭാ സമ്മേളനം തുടങ്ങിയത്. ആദ്യ സമ്മേളനം വലിയ വിവാദമായതിനെ തുടർന്ന് ഇത്തവണ വന്ദേമാതരം ആലപിച്ചില്ല. പുതിയതായി തിരഞ്ഞെടുക്കപ്പെട്ട അംഗങ്ങളെ അഭിനന്ദിച്ചുകൊണ്ടാണ് ഗവർണർ തൻ്റെ നയപ്രഖ്യാപന പ്രസംഗം ആരംഭിച്ചത്. പെരിയാർ, അണ്ണാദുരൈ, അംബേദ്കർ ഉൾപ്പെടെയുള്ളവരുടെ പേരുകൾ നയപ്രഖ്യാപന പ്രസംഗത്തിൽ ഗവർണർ പ്രത്യേകം പരാമർശിച്ചു.

അതേസമയം മുല്ലപ്പെരിയാർ അണക്കെട്ട് വിഷയത്തിൽ കേരളത്തിൻ്റെ നിലപാട് ജലവിഭവ വകുപ്പ് മന്ത്രി മോൻസ് ജോസഫ് വ്യക്തമാക്കിയിട്ടുണ്ട്. മുൻപ് ഉമ്മൻചാണ്ടി സർക്കാരിൻ്റെ കാലത്തുണ്ടായിരുന്ന അതേ നിലപാടിൽ ഇപ്പോഴും ഉറച്ചുനിൽക്കുകയാണെന്ന് ജൂൺ 17 ബുധനാഴ്ച അദ്ദേഹം വിശദീകരിച്ചു. കേരളത്തിലെ ജനങ്ങൾക്ക് സുരക്ഷ, തമിഴ്നാടിന് ആവശ്യമായ വെള്ളം എന്നതാണ് ഈ വിഷയത്തിൽ എക്കാലത്തും സംസ്ഥാന സർക്കാർ സ്വീകരിച്ചിട്ടുള്ള നിലപാടെന്നും മോൻസ് ജോസഫ് പറഞ്ഞു. നിലവിൽ മുല്ലപ്പെരിയാർ വിഷയം സുപ്രീം കോടതിയുടെ പരിഗണനയിലാണ്.

കൂടുതൽ  വാർത്തകളും വിശേഷങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വിഷയത്തിലുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ  പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The TVK-led Tamil Nadu government announced in the assembly that it will oppose Kerala's demand for a new Mullaperiyar dam, while Kerala's Water Resources Minister Mons Joseph stated that the state remains firm on its stance of ensuring safety for Kerala and water for Tamil Nadu.

#MullaperiyarDam #TamilNaduGovernment #KeralaNews #TVKParty #MonsJoseph #SupremeCourt #MalayalamNews#AnjanaNews