ഹൈറേഞ്ചിൽ ഭാഷാപരമായ ചേരിതിരിവിന് ശ്രമം തദ്ദേശ തെരഞ്ഞെടുപ്പ് ലക്ഷ്യമിട്ട് തമിഴ്നാട് സംഘടനകൾ

ഉപ്പുതറ: (KVARTHA) തദ്ദേശ സ്വയംഭരണ തെരഞ്ഞെടുപ്പ് അടുത്തിരിക്കെ, ഹൈറേഞ്ചിലെ തോട്ടം മേഖലയിൽ ഭാഷാപരമായ ചേരിതിരിവുണ്ടാക്കാൻ തമിഴ്നാട് ആസ്ഥാനമായുള്ള ചില സംഘടനകൾ ആസൂത്രിതമായി ശ്രമിക്കുന്നതായി സൂചന. 

തമിഴ് - മലയാളം വികാരം ഇളക്കിവിട്ട് രാഷ്ട്രീയ മുതലെടുപ്പ് നടത്തുകയാണ് ഇവരുടെ പ്രധാന ലക്ഷ്യം. സാംസ്കാരിക സംഘടനകളുടെ മറവിലാണ് ഉപ്പുതറ മേഖലയിലെ തോട്ടം ഡിവിഷനുകളിൽ ഈ സംഘടനകൾ പ്രവർത്തനം ആരംഭിച്ചിരിക്കുന്നത്.

വർഷങ്ങളായി തമിഴ്നാട്ടിലെ വിവിധ രാഷ്ട്രീയ കക്ഷികൾ പ്രാദേശിക കമ്മിറ്റികൾ രൂപീകരിച്ച് ഈ മേഖലയിൽ പ്രവർത്തിച്ചുവന്നിരുന്നു. എന്നാൽ, നിലവിലെ സംഘടനകൾ ഇവരിൽ നിന്നും വ്യത്യസ്തമായ നിലപാടുകളുമായാണ് കടന്നുവന്നിരിക്കുന്നത്. 

തമിഴ്നാട്ടിൽ അടുത്ത ബന്ധുക്കളും വേരുകളുമുള്ളവരാണ് ഇവിടുത്തെ തോട്ടം തൊഴിലാളികളിൽ ഭൂരിപക്ഷവും. ഈ സാഹചര്യം മുതലെടുക്കാനാണ് പുതിയ സംഘടനകൾ 'അണിയറ നീക്കം' നടത്തുന്നത്. 

തമിഴ് സംസ്കാരത്തിൻ്റെയും ഭാഷയുടെയും പേരിൽ സംഘടിപ്പിക്കുന്ന കൂട്ടായ്മകളിൽ, മലയാളികളിൽ നിന്ന് തമിഴ് വംശജർക്ക് അവഗണന നേരിടുന്നു എന്ന മട്ടിലുള്ള പ്രചാരണങ്ങൾ നടക്കുന്നതായാണ് വിവരം.

മുല്ലപ്പെരിയാർ സമരം സജീവമായിരുന്ന കാലത്തും അതിനുശേഷവും സമാനമായ രീതിയിൽ ഇരുവിഭാഗങ്ങൾക്കുമിടയിൽ സ്പർധ വളർത്താൻ ചില കേന്ദ്രങ്ങൾ ശ്രമിച്ചിരുന്നു. എന്നാൽ, തൊഴിലാളി സംഘടനകളുടെയും രാഷ്ട്രീയ പാർട്ടികളുടെയും ശക്തമായ ഇടപെടൽ മൂലം അന്നത്തെ നീക്കങ്ങൾ പരാജയപ്പെടുകയായിരുന്നു.

തദ്ദേശ തെരഞ്ഞെടുപ്പിൽ നിർണായക സ്വാധീനം ചെലുത്താമെന്ന കണക്കുകൂട്ടലിലാണ് ഈ സംഘടനകൾ വീണ്ടും രംഗത്തിറങ്ങിയിരിക്കുന്നത്. വർഷങ്ങളായി ഭാഷാപരമായ വേർതിരിവുകളില്ലാതെ ഒരുമയോടെ കഴിയുന്ന തോട്ടം മേഖലയിലെ സമാധാന അന്തരീക്ഷം തകർക്കാൻ സാധ്യതയുള്ള ഈ നീക്കങ്ങളെ രാഷ്ട്രീയ നേതൃത്വങ്ങൾ അതീവ ഗൗരവത്തോടെയാണ് കാണുന്നത്. 

ഭാഷാപരമായ സ്പർധ വളർത്താനുള്ള ശ്രമങ്ങൾക്കെതിരെ ശക്തമായ പ്രതിരോധം തീർക്കാനുള്ള ആലോചനകൾ രാഷ്ട്രീയ കക്ഷികൾ തുടങ്ങിയിട്ടുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Tamil Nadu based groups attempt linguistic polarization in High Range for political gain during local body polls.

#HighRange #LocalBodyElections #LinguisticPolitics #KeralaNews #TamilNaduOrganizations #Upputhara