ബംഗാളിലെ വീഴ്ചയ്ക്ക് ഉത്തരം പറയേണ്ടത് ചെങ്കൊടിക്കാർ തന്നെ: സിപിഎമ്മിനെതിരെ രൂക്ഷവിമർശനവുമായി ടി പത്മനാഭൻ

കണ്ണൂർ: (KVARTHA) പശ്ചിമ ബംഗാളിൽ തകർന്നടിഞ്ഞ സി.പി.എം ഭരണത്തെയും പാർട്ടിയെയും രൂക്ഷമായി വിമർശിച്ച് കഥാകൃത്ത് ടി പത്മനാഭൻ. കണ്ണൂർ ഹോട്ടൽ ഗ്രാൻഡ് ബിനാലെയിൽ നടന്ന ചടങ്ങിൽ സംസാരിക്കുകയായിരുന്നു അദ്ദേഹം. ബംഗാളിലെ സി.പി.എമ്മിന്റെ മൂന്നര പതിറ്റാണ്ടിലെ ഉയർച്ചതാഴ്ചകൾ വിവരിക്കുന്ന, സൗർജ്യ ഭൗമിക് രചിച്ച 'ഗാങ്സ്റ്റർ സ്റ്റേറ്റ്' എന്ന പുസ്തകത്തിന്റെ മലയാളം പരിഭാഷ പ്രകാശനം ചെയ്യുകയായിരുന്നു അദ്ദേഹം.

‘ജ്യോതി ബസുവിന്റെയും ബുദ്ധദേബ് ഭട്ടാചാര്യയുടെയും കാലത്ത് ബംഗാളിൽ ഒരൊറ്റ ത്രിവർണ്ണ പതാക പോലും ഉണ്ടായിരുന്നില്ല. ജ്യോതി ബസു വിദ്യാസമ്പന്നനും പണ്ഡിതനുമായിരുന്നു, എന്നാൽ ആ പാണ്ഡിത്യം കൊണ്ട് ബംഗാളിന് എന്തെങ്കിലും പ്രയോജനം ലഭിച്ചിട്ടുണ്ടോ എന്നത് സംശയമാണ്. കവിയായിരുന്ന ബുദ്ധദേബിന് ശേഷം മമതയുടെ കാലമെത്തിയപ്പോൾ ബംഗാളിൽ ഒരിടത്തും ചെങ്കൊടി കാണാൻ കഴിയാത്ത അവസ്ഥയായി’ - ടി പത്മനാഭൻ പറഞ്ഞു.

മമത ഒരു വനിതയാണെങ്കിലും യാതൊരു മമതയുമില്ലാതെയാണ് അവർ ഭരിക്കുന്നത്. എല്ലാത്തിനും ഒരു കാലഹരണ തീയതിയുണ്ട്. എന്തുകൊണ്ടാണ് ബംഗാളിൽ കമ്യൂണിസം കാലഹരണപ്പെട്ടതെന്ന് കമ്യൂണിസ്റ്റുകൾ തന്നെ ചിന്തിക്കണം. നന്ദിഗ്രാം കേരളത്തിലും ആവർത്തിക്കാതിരിക്കാൻ ശ്രദ്ധിക്കണമെന്നും അദ്ദേഹം മുന്നറിയിപ്പ് നൽകി. 

കേരളത്തിലെ ഹോട്ടലുകളിൽ ഭൂരിഭാഗവും ജോലി ചെയ്യുന്നത് ബംഗാളികളാണ്. സി.പി.എം ഭരിച്ച ത്രിപുരയിൽ നിന്നും ജാർഖണ്ഡിൽ നിന്നുമൊക്കെ ആളുകൾ തൊഴിൽ തേടി ഇവിടേക്ക് വരുന്നുണ്ട്. കാൽ നൂറ്റാണ്ടിലേറെ കമ്യൂണിസ്റ്റ് പാർട്ടി ബംഗാൾ ഭരിച്ചിട്ടും അവിടെ ഒന്നും നടന്നില്ലെന്നാണ് ഇത് തെളിയിക്കുന്നത്.

ഇതിനെക്കാൾ വലിയ വീഴ്ച ഒരു പ്രസ്ഥാനത്തിന് ഉണ്ടാകാനുണ്ടോ എന്നും ടി പത്മനാഭൻ ചോദിച്ചു. എ.ഐ.സി.സി ജനറൽ സെക്രട്ടറി കെ സി വേണുഗോപാൽ പുസ്തകം ടി പത്മനാഭന് നൽകിയാണ് പ്രകാശനം നിർവ്വഹിച്ചത്.

ടി പത്മനാഭന്റെ ഈ രൂക്ഷ വിമർശനത്തെക്കുറിച്ച് നിങ്ങളുടെ അഭിപ്രായമെന്താണ്? വാർത്ത പങ്കുവെക്കൂ. 

Article Summary: Writer T Padmanabhan criticizes CPM for its political decline in West Bengal during a book release in Kannur.

#TPadmanabhan #CPM #WestBengalPolitics #KannurNews #GangsterState #KeralaPolitics