കെഎസ്ആർടിസിയുടെ സൗജന്യ യാത്രാപദ്ധതിയെ സ്വാഗതം ചെയ്ത് സുരേഷ് ഗോപി; 'സ്ത്രീകളിൽ പുതിയ സ്വപ്നം വിരിഞ്ഞുതുടങ്ങി'

തിരുവനന്തപുരം: (KVARTHA) കെഎസ്ആർടിസിയിലെ സൗജന്യ യാത്രാപദ്ധതിയെ സ്വാഗതം ചെയ്ത് കേന്ദ്രമന്ത്രി സുരേഷ് ഗോപി രംഗത്തെത്തി. തനിക്ക് വളരെ ഇഷ്ടപ്പെട്ട പദ്ധതിയാണ് ഇതെന്നും പല സംസ്ഥാനങ്ങളിലും അതത് സംസ്ഥാനത്തിൻ്റെ സാമ്പത്തിക കെൽപ്പനുസരിച്ച് ഭാഗികമായും പൂർണമായും ഇത്തരം പദ്ധതികൾ നടപ്പാക്കിയിട്ടുണ്ടെന്നും അദ്ദേഹം വ്യക്തമാക്കി. സാമ്പത്തിക നില മെച്ചപ്പെടുന്നതോടെ ഇതിൻ്റെ വ്യാപ്തി കൂടുതൽ വർധിക്കുമെന്നും സുരേഷ് ഗോപി പറഞ്ഞു.

നിലവിലെ കാലത്ത് പുരുഷന്മാരേക്കാൾ കൂടുതൽ സ്ത്രീകൾ ജോലിക്കും വീട്ടിലെ ആവശ്യങ്ങൾക്കുമായി പുറത്തുപോകുന്നുണ്ട്. പണ്ട് ഇങ്ങനെയായിരുന്നില്ല. ഈ പശ്ചാത്തലത്തിലാണ് സ്ത്രീകൾക്ക് വേണ്ടി ഇങ്ങനെയൊരു സംവിധാനം ഒരുക്കുന്നത്. എല്ലാം കൊണ്ടും ഈ പദ്ധതിക്ക് വൻവിജയം ആശംസിക്കുന്നുവെന്നും ഇത് തുടർന്നു കൊണ്ടുപോകാൻ സാധിക്കട്ടെയെന്ന് പ്രാർഥിക്കുന്നുവെന്നും അദ്ദേഹം കൂട്ടിച്ചേർത്തു.

ഗതാഗതത്തേക്കാൾ കൂടുതൽ വിരുത് സാമ്പത്തിക കാര്യങ്ങളിൽ ഉള്ളയാളാണ് സി പി ജോൺ. മുഖ്യമന്ത്രിക്കും സി പി ജോണിനും ചേർന്ന് ഇത് നല്ല വഴിക്ക് കൊണ്ടുവരാനുള്ള എല്ലാ മാനസിക കരുത്തുമുണ്ട്. സംസ്ഥാനത്ത് നിലനിൽക്കുന്ന രാഷ്ട്രീയ ഇടപെടലുകൾ, ട്രേഡ് യൂണിയനുകൾ തുടങ്ങിയ എല്ലാവരെയും സമരസത്തിൽ കൊണ്ടുപോയി ജനങ്ങളിലേക്ക് എത്തിക്കേണ്ട ചുമതല ആരും മറക്കാതിരിക്കട്ടെയെന്ന് അദ്ദേഹം ഓർമിപ്പിച്ചു.

ഈ പദ്ധതിക്ക് ന്യൂനത കാണുന്ന ഒരു പക്ഷത്തിന് അതിനെ എതിർക്കുകയും ശബ്ദിക്കുകയും ചെയ്യാം. സർക്കാർ അത് തിരുത്താൻ തയാറാകുമ്പോൾ ആ തിരുത്തലിനൊപ്പം പ്രതിപക്ഷവും ഒരു തിരുത്തൽ ശക്തിയായി മാറണം. പുതിയൊരു സ്വപ്നത്തിൻ്റെ വിരിയൽ കൂടിയാണ് സ്ത്രീകൾക്ക് ഇത് നൽകുന്നത്. കഴിഞ്ഞ രാത്രി വരെ അവർക്ക് ചില ഭയാശങ്കകളോ പ്രതീക്ഷയില്ലായ്മയോ നിഴലിച്ചിട്ടുണ്ടാകാം. നേരം പുലർന്ന് കാണുന്ന കാഴ്ചകളിലൂടെ അവർക്ക് കിട്ടുന്ന സന്ദേശം പുതിയ സ്വപ്നമായി അവരിൽ വിരിഞ്ഞു തുടങ്ങിയിട്ടുണ്ടാകുമെന്നും സുരേഷ് ഗോപി പറഞ്ഞു.

കെഎസ്ആർടിസിയുടെ സൗജന്യ യാത്രാപദ്ധതിയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകളും വിശേഷങ്ങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Union Minister Suresh Gopi praised the KSRTC free travel scheme for women in Kerala, stating that it will instill new hope in them. He also urged the opposition to act as a constructive force while expressing confidence that the Chief Minister and CP John can manage the administrative aspects effectively.

#SureshGopi #KSRTC #KeralaNews #FreeTravelScheme #KeralaPolitics #MalayalamNews #AnjanaNews