Court Order | ഡല്‍ഹി മദ്യനയ അഴിമതിക്കേസിൽ കെ കവിതയ്ക്ക് 10 ലക്ഷം രൂപയുടെ ബോണ്ടിന്മേൽ ജാമ്യം അനുവദിച്ച് സുപ്രീം കോടതി

ന്യൂഡല്‍ഹി: (KVARTHA)  ഡല്‍ഹി മദ്യനയ അഴിമതിക്കേസിൽ ബിആർഎസ് (ഭാരത രാഷ്‌ട്ര സമിതി) നേതാവ് കെ. കവിതയ്ക്ക് സുപ്രീം കോടതി ജാമ്യം അനുവദിച്ചു. ചൊവ്വാഴ്ച സുപ്രീം കോടതി കെ. കവിതയ്ക്ക് 10 ലക്ഷം രൂപയുടെ ബോണ്ടിന്മേലാണ് ജാമ്യം അനുവദിച്ചത്.

സാക്ഷികളെ സ്വാധീനിക്കരുതെന്ന് കോടതി നിർദേശിച്ചിട്ടുണ്ട്. കേസില്‍ കവിതയ്ക്ക് പങ്കുണ്ടെന്ന് എന്ത് അടിസ്ഥാനത്തിലാണ് അന്വേഷണ ഉദ്യോഗസ്ഥര്‍ തെളിയിക്കാന്‍ ശ്രമിച്ചതെന്നും കോടതി ചോദിച്ചു. ജസ്റ്റിസ് ബി.ആർ. ഗവായ്, കെ.വി. വിശ്വനാഥൻ എന്നിവരടങ്ങിയ ബെഞ്ചാണ് കവിതയുടെ ഹർജി പരിഗണിച്ചത്.

ഡല്‍ഹി മദ്യനയ അഴിമതിക്കേസിൽ എൻഫോഴ്‌സ്‌മെന്റ് ഡയറക്ടറേറ്റും (ED) സെൻട്രൽ ബ്യൂറോ ഓഫ് ഇന്‍വെസ്റ്റിഗേഷനും (CBI)  അന്വേഷണ പ്രവർത്തനങ്ങൾ നടത്തിവരികയായിരുന്നു. ഈ വിഷയത്തിൽ രണ്ട് ഏജൻസികളും അന്വേഷണങ്ങൾ പൂർത്തിയാക്കിയിട്ടുണ്ടെന്ന് സൂചിപ്പിച്ചുകൊണ്ടാണ്, കേസ് സംബന്ധിച്ച് ഡല്‍ഹി മുൻ ഉപമുഖ്യമന്ത്രി മനീഷ് സിസോദിയയ്ക്ക് ജാമ്യം അനുവദിച്ചതിന്റെ അടിസ്ഥാനത്തിലാണ് കവിത ജാമ്യം ആവശ്യപ്പെട്ടത്.
എന്നാല്‍ രണ്ട് ഏജന്‍സികളും അറസ്റ്റ് ചെയ്ത കേജ്‌രിവാള്‍ ജയിലില്‍ തുടരുകയാണ്. ഇഡി കേസില്‍ ജാമ്യം ലഭിച്ചെങ്കിലും സിബിഐയുടെ കേസില്‍ അദ്ദേഹത്തിന് ജാമ്യം ലഭിച്ചിട്ടില്ല.

#KavithaBail #SupremeCourt #DelhiLiquorPolicy #ED #CBI #PoliticalNews