സസ്‌പെൻഷൻ ശിക്ഷയല്ല; പോലീസുകാരെ സർവീസിൽനിന്ന് പുറത്താക്കി ക്രിമിനൽ കേസെടുക്കണമെന്ന് കെപിസിസി പ്രസിഡൻ്റ് സണ്ണി ജോസഫ് എംഎൽഎ
 

കണ്ണൂർ: (KVARTHA) യൂത്ത് കോൺഗ്രസ് നേതാവ് വി.എസ്. സുജിത്തിനെ കുന്നംകുളം പോലീസ് സ്റ്റേഷന് അകത്തും പുറത്തും വെച്ച് ഗുരുതരമായി മർദ്ദിച്ച് പരിക്കേൽപ്പിച്ച സബ് ഇൻസ്പെക്ടർ ഉൾപ്പെടെയുള്ള പോലീസുകാരെ സസ്പെൻഡ് ചെയ്തത് മതിയായ ഒരു ശിക്ഷാ നടപടിയല്ലെന്ന് കെപിസിസി പ്രസിഡൻ്റ് സണ്ണി ജോസഫ് എംഎൽഎ. 

കണ്ണൂർ ഇരിട്ടിയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. പോലീസ് ഉദ്യോഗസ്ഥർക്കെതിരെ ക്രിമിനൽ കേസ് രജിസ്റ്റർ ചെയ്ത് അവരെ സർവീസിൽനിന്ന് പിരിച്ചുവിടണമെന്നും സണ്ണി ജോസഫ് ആവശ്യപ്പെട്ടു.

സുജിത്തിനെ അന്യായമായി കസ്റ്റഡിയിലെടുക്കുകയും ക്രൂരമായി മർദ്ദിക്കുകയും വസ്ത്രാക്ഷേപം നടത്തുകയും ചെയ്ത ശേഷം മദ്യപിച്ചെന്ന് കാണിച്ച് കള്ളക്കേസെടുക്കുകയാണ് പോലീസ് ചെയ്തത്. വൈദ്യപരിശോധനയുടെ അടിസ്ഥാനത്തിൽ അത് തെറ്റാണെന്ന് കണ്ടെത്തിയ കോടതി അദ്ദേഹത്തിന് ജാമ്യം നൽകിയിരുന്നു.

 സുജിത്തിൻ്റെ പരാതിയിൽ തൃശ്ശൂരിലെ അസിസ്റ്റന്റ് പോലീസ് കമ്മീഷണർ ക്രൈം ബ്രാഞ്ച് മതിയായ അന്വേഷണം നടത്തിയ റിപ്പോർട്ട് സർക്കാരിന്റെ കൈവശമുണ്ട്. പോലീസുകാരുടെ കുറ്റകൃത്യം ബോധ്യപ്പെട്ടതിൻ്റെ അടിസ്ഥാനത്തിൽ അവരുടെ ഇൻക്രിമെൻ്റ് കട്ട് ചെയ്തിട്ടുണ്ടെന്നാണ് തൃശ്ശൂർ ഡിഐജി വ്യക്തമാക്കിയത്. പോലീസ് ഉദ്യോഗസ്ഥർ ചെയ്ത കുറ്റവുമായി താരതമ്യം ചെയ്യുമ്പോൾ ഇതൊരു മതിയായ ശിക്ഷയല്ലെന്ന് സണ്ണി ജോസഫ് ചൂണ്ടിക്കാട്ടി.

സുജിത്ത് നടത്തിയ നിയമപോരാട്ടത്തിലൂടെ രണ്ടുവർഷത്തിനു ശേഷം മർദ്ദനത്തിൻ്റെ സിസിടിവി ദൃശ്യങ്ങൾ പുറത്തുവന്ന സാഹചര്യത്തിൽ, കുറ്റകൃത്യത്തിന് അനുസരിച്ചുള്ള ശിക്ഷ നൽകിയില്ലെന്ന അപാകത തിരിച്ചറിഞ്ഞ് ഈ ഉദ്യോഗസ്ഥരെ സർവീസിൽനിന്ന് പിരിച്ചുവിടുകയാണ് സർക്കാർ ചെയ്യേണ്ടത്. 

സസ്പെൻഷൻ ഒരു ശിക്ഷയല്ല. സാധാരണഗതിയിൽ കുറ്റാരോപിതൻ അന്വേഷണത്തെ സ്വാധീനിക്കാതിരിക്കാനുള്ള നടപടിക്രമം മാത്രമാണത്. പോലീസ് ഉദ്യോഗസ്ഥർ ചെയ്ത കുറ്റകൃത്യത്തിന് ആനുപാതികമായ ശിക്ഷയാണ് വേണ്ടത്. സിസിടിവി ദൃശ്യങ്ങൾ അന്വേഷണ ഉദ്യോഗസ്ഥർ കാണുകയും പ്രതികൾ കുറ്റം ചെയ്തിട്ടുണ്ടെന്ന് ബോധ്യപ്പെടുകയും ചെയ്തതാണ്. 

ഒരു കുറ്റകൃത്യം ശ്രദ്ധയിൽപ്പെട്ടാൽ ഉടൻതന്നെ പോലീസ് കേസെടുക്കണമെന്ന് ക്രിമിനൽ നടപടി നിയമത്തിൽ പറയുന്നുണ്ട്. എന്നാൽ, ഈ കേസിൽ പോലീസ് അത് ചെയ്തില്ല. അതിനാൽ കുറ്റക്കാരായ പോലീസ് ഉദ്യോഗസ്ഥർക്കെതിരെ ക്രിമിനൽ കേസെടുക്കണമെന്നും സണ്ണി ജോസഫ് ആവശ്യപ്പെട്ടു.

ഇതുമായി ബന്ധപ്പെട്ട് സുജിത്ത് കോടതിയിൽ സ്വകാര്യ അന്യായം ഫയൽ ചെയ്തിട്ടുണ്ട്. അതിൽ കോടതി നടപടികൾ നടന്നുകൊണ്ടിരിക്കുകയാണ്. അതോടൊപ്പം പോലീസ് ഒരു കേസ് രജിസ്റ്റർ ചെയ്യുകയാണെങ്കിൽ ക്രിമിനൽ നടപടി നിയമമനുസരിച്ച് ഈ രണ്ട് കേസും പോലീസ് ചാർജ് കേസായി മാറും. അതിനാൽ ക്രൈം രജിസ്റ്റർ ചെയ്ത് അന്വേഷണം നടത്തി കുറ്റവാളികൾക്ക് അർഹിക്കുന്ന ശിക്ഷ നൽകണം. 

അതിനു പകരം അവരെ സസ്പെൻഡ് ചെയ്ത് മാറ്റിനിർത്തി രക്ഷിക്കാനുള്ള സർക്കാരിന്റെ കുതന്ത്രം വിലപ്പോകില്ല. ഈ മാസം പത്താം തീയതി കേരളത്തിലെ മുഴുവൻ പോലീസ് സ്റ്റേഷനുകൾക്ക് മുൻപിലും കോൺഗ്രസ് പ്രവർത്തകർ ഇതു സംബന്ധിച്ച പ്രതിഷേധ സദസ്സ് സംഘടിപ്പിക്കും. നിയമസഭയിലും ഈ വിഷയം ഗൗരവമായിട്ട് കോൺഗ്രസ് അവതരിപ്പിക്കുമെന്നും സണ്ണി ജോസഫ് പറഞ്ഞു.

പോലീസ് അതിക്രമങ്ങൾക്കെതിരെ ശക്തമായ നിലപാട് സ്വീകരിക്കണമോ? നിങ്ങളുടെ അഭിപ്രായം കമന്റ് ചെയ്യുക.

Article Summary: KPCC President Sunny Joseph MLA demands termination of police officers.

#KeralaPolice #SunnyJoseph #YouthCongress #KeralaPolitics #PoliceBrutality #PoliceReform