വി ഡി സതീശന്റെ 'പുതുയുഗ യാത്ര'യ്ക്ക് ശശി തരൂരിന്റെ ആശംസ; പങ്കെടുക്കാൻ കഴിയാത്തതിൽ ഖേദം

തിരുവനന്തപുരം: (KVARTHA) കാസർകോട് കുമ്പളയിൽ നിന്ന് വൈകുന്നേരം ആരംഭിക്കുന്ന യുഡിഎഫിന്റെ 'പുതുയുഗ യാത്ര'യ്ക്ക് ആശംസകളുമായി മുതിർന്ന കോൺഗ്രസ് നേതാവും എംപിയുമായ ശശി തരൂർ. തന്റെ ഫേസ്ബുക്ക് പേജിലൂടെയാണ് അദ്ദേഹം പ്രതിപക്ഷ നേതാവ് വി.ഡി സതീശൻ നയിക്കുന്ന യാത്രയ്ക്ക് പിന്തുണ അറിയിച്ചത്.

യാത്രയുടെ ഉദ്ഘാടന ചടങ്ങിൽ നേരിട്ട് പങ്കെടുക്കാൻ സാധിക്കാത്തതിൽ അദ്ദേഹം ഖേദം പ്രകടിപ്പിച്ചു. എങ്കിലും തന്റെ മനസ്സും പൂർണ്ണ പിന്തുണയും യാത്രയുടെ ഓരോ ചുവടിലും കൂടെയുണ്ടാകുമെന്ന് അദ്ദേഹം ഉറപ്പുനൽകി. 

‘എന്റെ സുഹൃത്തും സഹപ്രവർത്തകനുമായ പ്രതിപക്ഷ നേതാവ് വി.ഡി സതീശന്റെ നേതൃത്വത്തിൽ, സാമ്പത്തിക വികസനത്തിലും സാമൂഹിക മൈത്രിയിലും നമ്മുടെ സംസ്ഥാനത്തിന്റെ പ്രതാപം തിരികെപ്പിടിച്ച് കേരളത്തെ വീണ്ടെടുക്കാൻ ഈ യാത്രയ്ക്ക് സാധിക്കട്ടെ,’ എന്ന് തരൂർ കുറിച്ചു.

മാറ്റത്തിനായുള്ള പടയോട്ടമായി യാത്ര മാറട്ടെയെന്നും അദ്ദേഹം ആശംസിച്ചു. വി.ഡി സതീശന്റെ നേതൃത്വത്തിൽ യുഡിഎഫ് നടത്തുന്ന ഈ രാഷ്ട്രീയ മുന്നേറ്റത്തിന് ശശി തരൂരിന്റെ പിന്തുണ ആവേശം പകരും.

ശശി തരൂരിന്റെ ഫേസ്ബുക് പോസ്റ്റിന്റെ പൂർണരൂപം  

കാസർഗോഡ് കുമ്പളയിൽ നിന്ന് ഇന്ന് വൈകുന്നേരം ആരംഭിക്കുന്ന യുഡിഎഫിന്റെ ‘പുതുയുഗ യാത്ര’യ്ക്ക് എല്ലാവിധ ആശംസകളും നേരുന്നു. എന്റെ സുഹൃത്തും സഹപ്രവർത്തകനുമായ പ്രതിപക്ഷ നേതാവ് വി.ഡി സതീശന്റെ നേതൃത്വത്തിൽ, സാമ്പത്തിക വികസനത്തിലും സാമൂഹിക മൈത്രിയിലും നമ്മുടെ സംസ്ഥാനത്തിന്റെ പ്രതാപം തിരികെപ്പിടിച്ച് "കേരളത്തെ വീണ്ടെടുക്കാൻ" ഈ യാത്രയ്ക്ക് സാധിക്കട്ടെ.

​ഇന്നത്തെ ഉദ്ഘാടന ചടങ്ങിൽ നേരിട്ട് പങ്കെടുക്കാൻ സാധിക്കാത്തതിൽ എനിക്ക് ഖേദമുണ്ട്. എങ്കിലും, എന്റെ മനസ്സും പൂർണ്ണ പിന്തുണയും യാത്രയുടെ ഓരോ ചുവടിലും കൂടെയുണ്ടാകും. മാറ്റത്തിനായുള്ള ഈ പടയോട്ടം ആരംഭിക്കട്ടെ!

കോൺഗ്രസ് നേതൃത്വവുമായുള്ള ഐക്യവും പുതുയുഗ യാത്രയും

അടുത്ത കാലത്തായി കോൺഗ്രസ് നേതൃത്വവും ശശി തരൂരും തമ്മിൽ ചില അഭിപ്രായവ്യത്യാസങ്ങൾ നിലനിന്നിരുന്നെങ്കിലും, വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി പാർട്ടിയിൽ പൂർണ്ണമായ ഐക്യം സ്ഥാപിക്കപ്പെട്ടിരിക്കുകയാണെന്ന സന്ദേശം കൂടിയാണ് തരൂരിൻ്റെ പോസ്റ്റ് എന്നാണ് വിലയിരുത്തൽ.. ജനുവരി അവസാനം ഡൽഹിയിൽ വെച്ച് രാഹുൽ ഗാന്ധിയുമായും മല്ലികാർജുൻ ഖാർഗെയുമായും തരൂർ നടത്തിയ കൂടിക്കാഴ്ചയും, തുടർന്ന് പ്രതിപക്ഷ നേതാവ് വി.ഡി സതീശൻ തിരുവനന്തപുരത്തെ തരൂരിന്റെ വസതിയിലെത്തി നടത്തിയ ചർച്ചകളും പാർട്ടിക്കുള്ളിലെ 'മഞ്ഞുരുകലിന്' കാരണമായി. കൊച്ചിയിലെ മഹാപഞ്ചായത്ത് വേദിയിലുണ്ടായ ചില പ്രോട്ടോക്കോൾ തർക്കങ്ങളും അവഗണനകളും തരൂരിനെ ചൊടിപ്പിച്ചിരുന്നെങ്കിലും, ഹൈക്കമാൻഡിന്റെ നേരിട്ടുള്ള ഇടപെടലിലൂടെ ഈ പരാതികൾ പരിഹരിക്കപ്പെട്ടു. യുഡിഎഫിന്റെ 'വിഷൻ 2026' പ്രകടനപത്രിക തയ്യാറാക്കുന്നതിലും 140 മണ്ഡലങ്ങളിലും പ്രചാരണം നടത്തുന്നതിലും തരൂർ ഇനി സജീവമായ പങ്കുവഹിക്കുമെന്നാണ് കോൺഗ്രസ് കേന്ദ്രങ്ങളിൽ ചിലർ നൽകുന്ന സൂചന. പാർട്ടിക്കുള്ളിലെ ഈ പുതിയ ഉണർവ് കുമ്പളയിൽ നിന്ന് ആരംഭിക്കുന്ന പുതുയുഗ യാത്രയ്ക്ക് ഇരട്ടി കരുത്ത് പകരും.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Shashi Tharoor MP wished success to V.D. Satheesan’s 'Puthuyuga Yatra' starting from Kumbla, despite missing the event.

#ShashiTharoor #VDSatheesan #PuthuyugaYatra #UDFKerala #Congress #KeralaPolitics #KVARTHA