ന്യൂഡൽഹി: (KVARTHA) ധനമന്ത്രി നിർമല സീതാരാമൻ അവതരിപ്പിച്ച പുതിയ ആദായ നികുതി നിർദേശത്തെ ട്രോളി കോൺഗ്രസ് നേതാവ് ശശി തരൂർ എംപി. 12 ലക്ഷം രൂപ വരെ വരുമാനമുള്ളവർക്ക് ആദായ നികുതിയില്ലെന്ന പ്രഖ്യാപനം സ്വാഗതാർഹമാണെങ്കിലും, തൊഴിലില്ലായ്മ രൂക്ഷമായ ഇന്ത്യയിൽ ഇതിന്റെ പ്രയോജനം ആർക്കാണ് ലഭിക്കുകയെന്ന് അദ്ദേഹം ചോദിച്ചു. ആദായ നികുതി ഇളവ് ലഭിക്കണമെങ്കിൽ ആദ്യം വരുമാനം ഉണ്ടാകണം, അതിന് തൊഴിൽ ഉണ്ടാകണമെന്നും തരൂർ പറഞ്ഞു.

ശമ്പളമില്ലെങ്കിൽ ആദായ നികുതി ആർക്കാണ് ബാധകമാകുകയെന്നും അദ്ദേഹം ചോദിച്ചു. 'ധനമന്ത്രിയുടെ ബജറ്റ് പ്രസംഗത്തിൽ തൊഴിലില്ലായ്മയെക്കുറിച്ച് പരാമർശമൊന്നുമില്ല. ശമ്പളമുണ്ടെങ്കിൽ കുറഞ്ഞ നികുതി അടയ്ക്കാം എന്നത് ശരിയാണ്, പക്ഷേ ശമ്പളമില്ലെങ്കിലോ?', ശശി തരൂർ കുറ്റപ്പെടുത്തി. രാജ്യത്ത് വർധിച്ചു വരുന്ന തൊഴിലില്ലായ്മയെക്കുറിച്ച് ബജറ്റിൽ പരാമർശമില്ലെന്നും അദ്ദേഹം പ്രതികരിച്ചു. 

ബീഹാറിനുള്ള പാക്കേജുകളെയും ശശി തരൂർ വിമർശിച്ചു. ഒരു രാജ്യം, ഒരു തെരഞ്ഞെടുപ്പ് എന്ന ആശയം ഉന്നയിക്കുന്ന പാർട്ടി ഓരോ സംസ്ഥാനത്തെയും തിരഞ്ഞെടുപ്പിനനുസരിച്ച് സൗജന്യങ്ങൾ നൽകുന്നുവെന്ന് അദ്ദേഹം വിമർശിച്ചു. സഖ്യകക്ഷികളിൽ നിന്ന് കൂടുതൽ കയ്യടി നേടാൻ അവർക്ക് കൂടുതൽ തിരഞ്ഞെടുപ്പുകൾ നടത്തേണ്ടിവരുമെന്നും അദ്ദേഹം കൂട്ടിച്ചേർത്തു. തിരഞ്ഞെടുപ്പ് ലക്ഷ്യമിട്ടുള്ള പ്രഖ്യാപനങ്ങളാണ് ബജറ്റിൽ അധികവുമെന്ന് തരൂർ ആരോപിച്ചു.

ഈ വാർത്ത പങ്കുവെക്കുകയും നിങ്ങളുടെ അഭിപ്രായങ്ങൾ രേഖപ്പെടുത്തുകയും ചെയ്യുക.

Congress leader Shashi Tharoor criticized the new income tax proposal presented by Finance Minister Nirmala Sitharaman. He questioned the benefit of tax cuts for the unemployed in a country facing a severe job crisis. Tharoor also criticized the budget for not addressing the issue of unemployment.

#ShashiTharoor #Budget2025 #IncomeTax #Unemployment #India #Congress #BJP #Economy #Politics