നെറ്റ് പരീക്ഷ റദ്ദാക്കിയതിൽ പ്രതിഷേധം; കണ്ണൂരിൽ എസ്എഫ്ഐ പോസ്റ്റ് ഓഫീസ് മാർച്ചിന് നേരെ ജലപീരങ്കി, പൊലീസുമായി ഉന്തുംതള്ളും

കണ്ണൂർ: (KVARTHA) നെറ്റ് പരീക്ഷാ ക്രമക്കേടിൽ പ്രതിഷേധിച്ച് വിദ്യാർഥികൾ രാജ്യമാകെ നടത്തുന്ന പ്രക്ഷോഭത്തിൻ്റെ ഭാഗമായി കണ്ണൂരിലും സംഘർഷം. എസ്എഫ്ഐ കണ്ണൂർ ജില്ലാ കമ്മിറ്റിയുടെ നേതൃത്വത്തിൽ തിങ്കളാഴ്ച (ഓഗസ്റ്റ് 17) നടത്തിയ കണ്ണൂർ ഹെഡ് പോസ്റ്റ് ഓഫീസ് മാർച്ചിലാണ് പൊലീസുമായി ഉന്തുംതള്ളും ബലപ്രയോഗവും ഉണ്ടായത്. 

ഹെഡ് പോസ്റ്റ് ഓഫീസ് കവാടത്തിന് മുൻപിൽ പ്രതിഷേധ പ്രകടനവുമായെത്തിയ പ്രവർത്തകർ കണ്ണൂർ ടൗൺ പൊലീസ് ഉയർത്തിയ ബാരിക്കേഡ് മറികടന്ന് പോസ്റ്റ് ഓഫീസ് മുറ്റത്തേക്ക് പ്രവേശിച്ചു. ഇതിനിടയിലാണ് വനിതാ പ്രവർത്തകർ ഉൾപ്പെടെയുള്ളവർക്കു നേരെ പൊലീസ് ജലപീരങ്കി പ്രയോഗിച്ചത്.

പൊലീസിനെതിരെ പ്രതിഷേധം

വനിതാ പൊലീസുകാർ നോക്കിനിൽക്കെ വനിതാ പ്രവർത്തകരെ പുരുഷ പൊലീസുകാർ പിടികൂടാൻ ശ്രമിച്ചത് പ്രവർത്തകരിൽ വലിയ പ്രകോപനമുണ്ടാക്കി. ഇതിൽ പ്രതിഷേധിച്ച് വിദ്യാർഥികൾ ഹെഡ് പോസ്റ്റ് ഓഫീസിന് മുൻപിൽ കുത്തിയിരുന്ന് മുദ്രാവാക്യം വിളിച്ചു. ധർണയ്ക്കിടെ നേതാക്കൾ പൊലീസിന് നേരെ കടുത്ത വിമർശനവും മുന്നറിയിപ്പും മുഴക്കി.

യൂണിഫോമിനുള്ളിൽ സംഘപരിവാറിൻ്റെ കാക്കി ട്രൗസർ അണിഞ്ഞ ചില പൊലീസുകാർ കണ്ണൂരിലുണ്ടെന്നും ജനാധിപത്യ അവകാശങ്ങൾക്കായി സമരം ചെയ്യുന്ന തങ്ങളെ അടിച്ചാൽ അവരുടെ ചുമലിലെ നക്ഷത്രം നോക്കാതെ തിരിച്ചടിക്കുമെന്നും എസ്എഫ്ഐ ജില്ലാ നേതാക്കൾ പറഞ്ഞു. പൊലീസിന് നേരെ പട്ടാപ്പകൽ തിരിച്ചടിക്കുമെന്നും, ഇതിനെക്കാൾ വലിയ സന്നാഹങ്ങൾ നേരിട്ട സംഘടനയാണ് എസ്എഫ്ഐ എന്നും ഓർക്കണമെന്ന് നേതാക്കൾ മുന്നറിയിപ്പ് നൽകി.

ഉദ്ഘാടനവും സമാപനവും

എസ്എഫ്ഐ കണ്ണൂർ ജില്ലാ ഭാരവാഹികളായ ജോയൽ തോമസ്, ടി പി ആദർശ് എന്നിവരാണ് മാധ്യമങ്ങൾക്ക് മുൻപിൽ പൊലീസിനെതിരെ സംസാരിച്ചത്. മാർച്ച് എസ്എഫ്ഐ സംസ്ഥാന സെക്രട്ടറിയേറ്റ് അംഗം ടി പി അഖില ഉദ്ഘാടനം ചെയ്തു. 

സ്വാതി പ്രദീപ് സംസാരിച്ചു. തുടർന്ന് പൊലീസ് അറസ്റ്റ് ചെയ്യാതെ വന്നതോടെ പ്രവർത്തകർ സ്വയം പിരിഞ്ഞുപോവുകയായിരുന്നു. നെറ്റ് പുനഃപരീക്ഷ റദ്ദാക്കിയതിൽ രാജ്യതലസ്ഥാനത്തും എസ്എഫ്ഐ വൻ പ്രതിഷേധമാണ് നടത്തിയത്. ഡൽഹിയിൽ എൻടിഎ ആസ്ഥാനത്തേക്ക് എസ്എഫ്ഐയുടെ നേതൃത്വത്തിൽ പ്രതിഷേധ മാർച്ച് സംഘടിപ്പിച്ചിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം  

Article Summary: SFI's protest march to Kannur Head Post Office against NET exam cancellation turned into a scuffle with police using water cannons.

#Kvartha #SFIProtest #KannurNews #NETExam #NTA #KeralaPolice #MalayalamNews #StudentProtest #LocalNews #AmmuNews