മാരാർജി സ്മൃതിമണ്ഡപത്തിൽ നിന്ന് സദാനന്ദൻ മാസ്റ്റർ; 'നാടിനെ സേവിക്കുകയാണ് ലക്ഷ്യം'

കണ്ണൂർ: (KVARTHA) ബി.ജെ.പി. സംസ്ഥാന വൈസ് പ്രസിഡന്റും നിയുക്ത രാജ്യസഭാംഗവുമായ സി. സദാനന്ദൻ മാസ്റ്റർ ബി.ജെ.പി. മുൻ സംസ്ഥാന അധ്യക്ഷൻ കെ.ജി. മാരാർജിയുടെ പയ്യാമ്പലത്തെ സ്മൃതിമണ്ഡപത്തിൽ പുഷ്പാർച്ചന നടത്തി. 

തുടർന്ന് നടന്ന സ്വീകരണ പരിപാടിയിൽ സംസാരിക്കവെ, പ്രധാനമന്ത്രിയുടെ ‘എല്ലാ മേഖലയിലും വികസനം’ എന്ന കാഴ്ചപ്പാട് പൂർത്തിയാക്കാൻ താൻ പ്രയത്നിക്കുമെന്ന് അദ്ദേഹം വ്യക്തമാക്കി. പ്രധാനമന്ത്രിയുടെ ദൗത്യം ഏറ്റെടുത്ത്, ‘വികസിത ഭാരതം, വികസിത കേരളം’ എന്ന ലക്ഷ്യത്തിനായിരിക്കും തന്റെ തുടർപ്രവർത്തനങ്ങളെന്നും സദാനന്ദൻ മാസ്റ്റർ ഊന്നിപ്പറഞ്ഞു. 

രാഷ്ട്രത്തിന്റെ പരമവൈഭവവും സമൂഹത്തിന്റെ സർവോന്നതിയും ഓരോ വ്യക്തിക്കും ക്ഷേമവും ഉറപ്പാക്കുക എന്ന സംഘദർശനം, മോദിജി തന്നെയേൽപ്പിച്ച ദൗത്യം പൂർത്തിയാക്കാൻ സഹായകമാകുമെന്നും അദ്ദേഹം പ്രത്യാശിച്ചു. ഗർഭസ്ഥ ശിശുക്കൾ മുതൽ വയോധികർക്ക് വരെ പ്രയോജനപ്പെടുന്ന ഒട്ടനവധി പദ്ധതികൾ മോദി സർക്കാർ രാജ്യത്ത് നടപ്പാക്കുന്നുണ്ടെന്നും അദ്ദേഹം കൂട്ടിച്ചേർത്തു.

തന്നെ നിയോഗിച്ചവർക്ക് തന്റെ കഴിവും പ്രവർത്തനങ്ങളും അറിയാമെന്നും, നാടിനെ സേവിക്കുന്നവരുടെ അനുഗ്രഹം മാത്രമാണ് തനിക്ക് ആവശ്യമെന്നും അത് ലഭിക്കുമെന്നുറപ്പാണെന്നും സദാനന്ദൻ മാസ്റ്റർ പറഞ്ഞു. തന്റെ രാജ്യസഭാ നാമനിർദ്ദേശവുമായി ബന്ധപ്പെട്ട വിവാദങ്ങൾ സൃഷ്ടിക്കുന്നവർക്ക് നല്ല നമസ്കാരവും, വിമർശകർക്ക് നല്ലതുവരട്ടെ എന്നും അദ്ദേഹം ആശംസിച്ചു. 

മറക്കാൻ ശ്രമിക്കുന്ന കാര്യങ്ങൾ വീണ്ടും ചികഞ്ഞെടുക്കുന്നതിൽ നിന്ന് മാധ്യമങ്ങൾ പിന്മാറണമെന്നും, ഇനിയൊരു മുറിവുണ്ടാകരുതെന്നും അദ്ദേഹം അഭ്യർത്ഥിച്ചു. രാഷ്ട്രീയത്തിന്റെ പേരിൽ ഇനിയൊരു സഹോദരന്റെ മനസ്സും അസ്വസ്ഥമാകരുത്, കുടുംബങ്ങളുടെ കണ്ണുനീർ ഇനിയുണ്ടാവരുത്; നാട് ശാന്തിയുടെയും സമാധാനത്തിന്റെയും സ്വച്ഛതയുടെയും നാടായി മാറണമെന്നും അദ്ദേഹം പറഞ്ഞു.

പുഷ്പാർച്ചനയിലും സ്വീകരണ ചടങ്ങിലും ബി.ജെ.പി. മുൻ സംസ്ഥാന അധ്യക്ഷൻ സി.കെ. പത്മനാഭൻ, ദേശീയ നിർവാഹക സമിതിയംഗം പി.കെ. കൃഷ്ണദാസ്, സംസ്ഥാന സെക്രട്ടറി കെ. രഞ്ജിത്ത്, ദേശീയ സമിതിയംഗങ്ങളായ സി. രഘുനാഥ്, പി.കെ. വേലായുധൻ, ബി.ജെ.പി. നോർത്ത് ജില്ലാ അധ്യക്ഷൻ കെ.കെ. വിനോദ്കുമാർ എന്നിവർ പങ്കെടുത്തു.

സദാനന്ദൻ മാസ്റ്ററുടെ വാക്കുകളെക്കുറിച്ച് നിങ്ങളുടെ അഭിപ്രായം പങ്കുവെക്കൂ!

Article Summary: C. Sadanandan Master pledges to serve nation as Rajya Sabha member.

#KeralaPolitics #BJP #RajyaSabha #SadanandanMaster #DevelopedIndia #Kannur