'നെഹ്‌റു കുടുംബത്തെ തൊട്ടാൽ കൈയ്യും കെട്ടി നോക്കിയിരിക്കില്ല'; വി ശിവൻകുട്ടി അടക്കമുള്ള സിപിഎം നേതാക്കൾക്ക് ചെന്നിത്തലയുടെ മുന്നറിയിപ്പ്

തിരുവനന്തപുരം: (KVARTHA) സോണിയാ ഗാന്ധിക്കെതിരെ കേരളത്തിലെ സിപിഎം നേതാക്കൾ നടത്തുന്ന ദുഷ്പ്രചാരണം അടിയന്തിരമായി അവസാനിപ്പിക്കണമെന്ന് കോൺഗ്രസ് വർക്കിംഗ്‌ കമ്മറ്റി അംഗം രമേശ് ചെന്നിത്തല ആവശ്യപ്പെട്ടു. 

ഹർകിഷൻ സിംഗ് സുർജിത്ത് മുതൽ സീതാറാം യെച്ചൂരി വരെയുള്ള സിപിഎമ്മിന്റെ ദേശീയ നേതാക്കൾ വളരെ ബഹുമാനത്തോടെയും ആദരവോടെയും കണ്ട നേതാവാണ് സോണിയാ ഗാന്ധിയെന്ന് അദ്ദേഹം ഓർമ്മിപ്പിച്ചു.

2004-ൽ ഒന്നാം യുപിഎ സർക്കാർ രൂപീകരിക്കുമ്പോൾ സോണിയാ ഗാന്ധിക്ക് പിന്തുണയുമായി ആദ്യം മുന്നോട്ട് വന്നത് അന്നത്തെ സിപിഎം അഖിലേന്ത്യാ ജനറൽ സെക്രട്ടറി ഹർകിഷൻ സിംഗ് സുർജിത്തായിരുന്നു. 

പിന്നീട് സീതാറാം യെച്ചൂരിയും സോണിയാ ഗാന്ധിയുമായും രാഹുൽ ഗാന്ധിയുമായും വളരെ അടുത്ത ബന്ധം പുലർത്തിയിരുന്നു. എന്നാൽ ഇന്ന് ബിജെപിയെയും സംഘപരിവാറിനെയും നാണിപ്പിക്കുന്ന വിധത്തിലാണ് സോണിയാ ഗാന്ധിക്കെതിരെ കേരളത്തിലെ സിപിഎം നേതാക്കൾ പ്രചാരണം നടത്തുന്നതെന്ന് ചെന്നിത്തല കുറ്റപ്പെടുത്തി.

സിപിഎം അഖിലേന്ത്യാ ജനറൽ സെക്രട്ടറി എം.എ ബേബി തന്നെ ഇക്കാര്യത്തിൽ തനിക്കുള്ള അതൃപ്തി കേരളത്തിലെ സിപിഎം നേതൃത്വത്തെ അറിയിച്ചിരുന്നു. എന്നാൽ ബേബിയെപ്പോലും അവഗണിച്ചുകൊണ്ടാണ് വി. ശിവൻകുട്ടി അടക്കമുള്ള കേരളത്തിലെ സിപിഎം നേതാക്കൾ സോണിയാ ഗാന്ധിക്കെതിരെ അടിസ്ഥാനരഹിതമായ ആരോപണങ്ങൾ ഉന്നയിക്കുന്നത്.

ശബരിമല സ്വർണ്ണക്കൊള്ളക്കേസിൽ വികൃതമായ സിപിഎമ്മിന്റെ മുഖം രക്ഷിക്കാൻ സോണിയാ ഗാന്ധിയെ ഇതിലേക്ക് വലിച്ചിഴക്കുന്നത് രാഷ്ട്രീയ പാപ്പരത്തമാണ്. രക്തസാക്ഷി ഫണ്ടു പോലും കൊള്ളയടിക്കുന്ന സിപിഎം നേതാക്കളുടെ തനി നിറം പുറത്തായപ്പോൾ, അതിൽ നിന്നൊക്കെ തലയൂരാനുള്ള മാർഗമായി ഇത്തരം ദുഷ്പ്രചാരണങ്ങളെ സിപിഎം ഉപയോഗിക്കുകയാണെന്നും അദ്ദേഹം ആരോപിച്ചു.

സോണിയാ ഗാന്ധി കോൺഗ്രസിന്റെ മാത്രമല്ല രാജ്യത്തിന്റെ തന്നെ നേതാവാണെന്നും രാഷ്ട്രീയ കക്ഷി ഭേദമന്യേ എല്ലാവരും ബഹുമാനിക്കുന്ന വ്യക്തിത്വമാണെന്നും ചെന്നിത്തല പറഞ്ഞു. അവരെ ചെളിവാരിയെറിഞ്ഞു രാഷ്ട്രീയ നേട്ടമുണ്ടാക്കാൻ സിപിഎം നേതൃത്വം ശ്രമിച്ചാൽ കോൺഗ്രസ് പാർട്ടി കൈയ്യും കെട്ടി നോക്കിയിരിക്കില്ല. 

നെഹ്റു കുടുംബം കോൺഗ്രസിന്റെ രക്തത്തിന്റെ ഭാഗമാണ്. രാജ്യത്തിന് വേണ്ടി ജീവൻ ബലിയർപ്പിച്ച രാജീവ് ഗാന്ധിയുടെ സഹധർമ്മിണിക്കെതിരെ രാഷ്ട്രീയപ്രേരിതമായ ആരോപണങ്ങളുമായി സിപിഎം ഇറങ്ങിയാൽ ജനങ്ങൾ അതിന് ചുട്ടമറുപടി നൽകുമെന്നും രമേശ് ചെന്നിത്തല മുന്നറിയിപ്പ് നൽകി.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Senior Congress leader Ramesh Chennithala criticized Kerala CPM leaders for their smear campaign against Sonia Gandhi. He reminded them of the respect shown to her by past CPM leaders like Surjeet and Yechury and alleged that the current attacks are a diversionary tactic from the Sabarimala gold theft case.

#RameshChennithala #SoniaGandhi #CPM #KeralaPolitics #Congress #Sabarimala #MABaby