'വെള്ളരിക്കാ പട്ടണമാണോ ഇത്?': അനർട്ട് അഴിമതിയിൽ രമേശ് ചെന്നിത്തല

കണ്ണൂർ: (KVARTHA) വൈദ്യുതി വകുപ്പിനെതിരെ ഞെട്ടിക്കുന്ന അഴിമതി ആരോപണവുമായി മുൻ പ്രതിപക്ഷ നേതാവ് രമേശ് ചെന്നിത്തല രംഗത്ത്. സോളാർ പദ്ധതികളുടെ മറവിൽ അനർട്ട് (ANERT - Agency for Non-conventional Energy and Rural Technology) വഴി 100 കോടിയിലേറെ രൂപയുടെ വൻ അഴിമതിയാണ് നടക്കുന്നതെന്ന് ചെന്നിത്തല ആരോപിച്ചു.

കഴിഞ്ഞ നാല് ദിവസമായി താൻ ഈ വിഷയത്തിൽ തെളിവുകൾ സഹിതം ആരോപണം ഉന്നയിച്ചിട്ടും വൈദ്യുതി വകുപ്പ് മന്ത്രി പ്രതികരിക്കാത്തതിൽ രമേശ് ചെന്നിത്തല എം.എൽ.എ. കണ്ണൂർ ഡി.സി.സിയിൽ വിളിച്ചുചേർത്ത വാർത്താ സമ്മേളനത്തിൽ ശക്തമായ പ്രതിഷേധം രേഖപ്പെടുത്തി.

ഇതുമായി ബന്ധപ്പെട്ട് വൈദ്യുത മന്ത്രി മറുപടി നൽകേണ്ട ഒമ്പത് തുറന്ന ചോദ്യങ്ങൾ താൻ ഉന്നയിച്ചിരുന്നുവെന്നും, എന്നാൽ ഇതുവരെ മന്ത്രി പ്രതികരിക്കാൻ തയ്യാറായിട്ടില്ലെന്നും ചെന്നിത്തല ചൂണ്ടിക്കാട്ടി. ഈ വിഷയത്തിൽ മുഖ്യമന്ത്രിക്ക് വിശദീകരണം നൽകുമെന്ന പത്രവാർത്ത കണ്ടുവെന്നും, എന്നാൽ താൻ ഈ വിഷയം ഉന്നയിച്ചത് പരസ്യമായിട്ടാണെന്നും അത് മുഖ്യമന്ത്രിക്ക് വിശദീകരണം നൽകിയാൽ തീരുന്ന വിഷയമല്ലെന്നും അദ്ദേഹം പറഞ്ഞു.

ഈ വിഷയത്തിൽ പൊതുജനങ്ങളോടാണ് മന്ത്രി വിശദീകരിക്കേണ്ടതെന്നും പരസ്യമായി ഉന്നയിച്ച അഴിമതി ആരോപണങ്ങൾക്ക് പരസ്യമായി മറുപടി നൽകാനുള്ള രാഷ്ട്രീയ മര്യാദ വൈദ്യുതി മന്ത്രി പാലിക്കണമെന്നും ചെന്നിത്തല ആവശ്യപ്പെട്ടു.

കഴിഞ്ഞ ദിവസം ചേർന്ന ജനതാദൾ സംസ്ഥാന യോഗത്തിൽ പോലും ഈ വിഷയം ചർച്ചയായെന്നും, മന്ത്രി ഈ വിഷയത്തിൽ മൗനം വെടിയണമെന്നും രമേശ് ചെന്നിത്തല ആവശ്യപ്പെട്ടു. സ്വന്തം പാർട്ടിക്കാരോടും ജനങ്ങളോടും മറുപടി പറയേണ്ട ഉത്തരവാദിത്വം മന്ത്രിക്കുണ്ടെന്നും അല്ലെങ്കിൽ മന്ത്രിയുടെ കൈകളിൽ അഴിമതിക്കറ പുരണ്ടുവെന്ന് ജനം ഉറപ്പിക്കുമെന്നും അദ്ദേഹം കൂട്ടിച്ചേർത്തു.

അനർട്ടിലെ 'വെള്ളരിക്കാ പട്ടണം': സ്വതന്ത്ര അന്വേഷണം വേണം

അഴിമതി ആരോപണം നേരിടുന്ന അനർട്ട് സി.ഇ.ഒയെക്കൊണ്ട് തന്നെ അന്വേഷണം നടത്താൻ തീരുമാനിച്ചു എന്ന വാർത്തയെ ചെന്നിത്തല പരിഹസിച്ചു. ‘സത്യത്തിൽ ഇതെന്താ വെള്ളരിക്കാ പട്ടണമാണോ? ജനങ്ങൾ വിഡ്ഢികളും പ്രതികരണശേഷി നഷ്ടപ്പെട്ടവരും ആണെന്നാണോ കരുതുന്നത്?’ എന്ന് അദ്ദേഹം ചോദിച്ചു. ആരോപണ വിധേയനായ അനർട്ട് സി.ഇ.ഒയെ തൽസ്ഥാനത്തുനിന്ന് മാറ്റിനിർത്തി, ഈ വിഷയം നിയമസഭാ സമിതിയെക്കൊണ്ട് അന്വേഷിപ്പിക്കണമെന്ന് ചെന്നിത്തല ആവശ്യപ്പെട്ടു.

അനർട്ടിന്റെ കഴിഞ്ഞ അഞ്ച് വർഷത്തെ ഇടപാടുകൾ ഒരു സ്വതന്ത്ര ഏജൻസിയുടെ സഹായത്തോടെ ഫോറൻസിക് ഓഡിറ്റിങ്ങിന് വിധേയമാക്കണമെന്നും, ഈ ഓഡിറ്റിങ്ങിലൂടെ അനർട്ട് വഴി നടത്തിയ എല്ലാ ക്രമക്കേടുകളും പുറത്തുകൊണ്ടുവരാൻ സാധിക്കുമെന്നും അദ്ദേഹം പറഞ്ഞു.

അടിയന്തിരമായി ചെയ്യേണ്ടത് അനർട്ട് സി.ഇ.ഒയെ തൽസ്ഥാനത്തുനിന്ന് മാറ്റിനിർത്തുകയാണെന്നും, തന്റെ ആരോപണങ്ങൾ പുറത്തുവന്നതിനുശേഷം അനർട്ടിൽ ഇപ്പോൾ വൻതോതിൽ ഫയൽ നശീകരണം നടക്കുന്നുണ്ടെന്നും അഴിമതിയുടെ തെളിവുകൾ നീക്കം ചെയ്യുകയാണെന്നും ചെന്നിത്തല ആരോപിച്ചു. സി.ഇ.ഒയും കൺസൾട്ടിങ് കമ്പനിയും ചേർന്നാണ് ഇതിന് ചുക്കാൻ പിടിക്കുന്നതെന്നും അദ്ദേഹം കൂട്ടിച്ചേർത്തു.

ഈ മൊത്തം വിഷയത്തിൽ മന്ത്രിയുടെ ഓഫീസിനാണ് ഏറ്റവും വലിയ പങ്കെന്നും, അനർട്ടിന്റെ ഫിനാൻസ് വകുപ്പിനെ പൂർണ്ണമായും ഇരുട്ടിൽ നിർത്തിക്കൊണ്ട് അനർട്ട് സി.ഇ.ഒയും ഒരു താൽക്കാലിക ജീവനക്കാരനും ഇ.വൈ. കൺസൾട്ടിങ് കമ്പനിയും ചേർന്നാണ് എല്ലാ ടെൻഡറുകളും കൈകാര്യം ചെയ്തിരിക്കുന്നതെന്നും ചെന്നിത്തല ആരോപിച്ചു. ടെൻഡറുകൾ തുറക്കാൻ അധികാരമില്ലാത്തവർ അവ തുറക്കുകയും തിരുത്തുകയും ചെയ്തിട്ടുണ്ടെന്നും, തിരുത്തി എന്നത് സി.ഇ.ഒ. തന്നെ സമ്മതിച്ചിട്ടുണ്ടെന്നും ഇത് കേട്ടുകേൾവിയില്ലാത്ത കാര്യങ്ങളാണെന്നും അദ്ദേഹം പറഞ്ഞു.

ഫിനാൻസ് മാനേജർ മാത്രം തുറക്കേണ്ട ടെൻഡർ ബിഡ്ഡുകൾ 89 ദിവസത്തേക്ക് മാത്രം നിയമിക്കപ്പെട്ട താൽക്കാലിക ജീവനക്കാരനായ വിനയ് കൈകാര്യം ചെയ്തതിന് തന്റെ കൈവശം തെളിവുണ്ടെന്നും ചെന്നിത്തല വ്യക്തമാക്കി. ഇതേ താൽക്കാലിക ജീവനക്കാരനെ ഇ.വൈ. നിയമിച്ചതിന് പിന്നിൽ സി.ഇ.ഒയും മന്ത്രിയുടെ ഓഫീസുമാണെന്നും, ഇത് 'സ്വപ്‌ന സുരേഷ് മോഡൽ' നിയമനമാണെന്നും അദ്ദേഹം ആരോപിച്ചു.

ഇവരെല്ലാം ചേർന്ന ഒരു നെക്സസാണ് ഈ അഴിമതിക്ക് പിന്നിലെന്നും, സി.ഇ.ഒയെ ഇതുവരെ മാറ്റാത്തതിന് കാരണം പങ്കുവെച്ച അഴിമതിപ്പണത്തിന്റെ വിവരം പുറത്തുപോകുമോയെന്ന ഭയം കൊണ്ടാണെന്നും ചെന്നിത്തല പറഞ്ഞു.

240 കോടി രൂപയുടെ ടെൻഡർ വിളിച്ചില്ല എന്ന് കഴിഞ്ഞ ദിവസം ഒരു ചാനൽ ലേഖിക തന്നോട് പറഞ്ഞത് അനർട്ട് സി.ഇ.ഒ. നൽകിയ വിവരത്തിന്റെ അടിസ്ഥാനത്തിലാണെന്ന് മനസ്സിലാക്കുന്നുവെന്നും, എന്നാൽ 240 കോടി രൂപയുടെ ഇ-ടെൻഡർ വിളിച്ച രേഖകൾ താൻ ഇതിനോടൊപ്പം വയ്ക്കുന്നുണ്ടെന്നും ചെന്നിത്തല പറഞ്ഞു.

വെറും അഞ്ച് കോടി രൂപ വരെ മാത്രം ടെൻഡറുകൾ വിളിക്കാൻ അധികാരമുള്ള അനർട്ട് സി.ഇ.ഒ. എങ്ങനെയാണ് 240 കോടി രൂപയുടെ ടെൻഡർ വിളിച്ചതെന്നും ആരുടെ നിർദ്ദേശപ്രകാരമാണിതെന്നും അദ്ദേഹം വീണ്ടും ചോദ്യം ഉന്നയിച്ചു. ഇതിനുത്തരം ലഭിച്ചാൽ അഴിമതിയിലെ പങ്കാളികൾ ആരൊക്കെയാണെന്നതിന്റെ വിശദാംശങ്ങൾ ഉടൻ പുറത്തുവരുമെന്നും രമേശ് ചെന്നിത്തല പറഞ്ഞു. വാർത്താ സമ്മേളനത്തിൽ ഡി.സി.സി. അധ്യക്ഷൻ മാർട്ടിൻ ജോർജ്, നേതാക്കളായ ടി.ഒ. മോഹനൻ, സജീവ് മറോളി എന്നിവരും പങ്കെടുത്തു.

ഈ വാർത്തയെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക!

Article Summary: Chennithala alleges Rs 100 crore corruption in ANERT solar projects.

#RameshChennithala #ANERT #CorruptionAllegations #KeralaPolitics #ElectricityDepartment #SolarScam