തിരുവനന്തപുരം: (KVARTHA) കേരളത്തിലെ ബി.ജെ.പി.യുടെ പുതിയ സംസ്ഥാന അധ്യക്ഷനായി രാജീവ് ചന്ദ്രശേഖറിനെ കേന്ദ്ര നേതൃത്വം നിയമിച്ചതോടെ സംസ്ഥാന രാഷ്ട്രീയം പുതിയ വഴിത്തിരിവിലേക്ക് നീങ്ങുകയാണ്. പ്രത്യയശാസ്ത്രത്തിനപ്പുറം കേരളത്തിലെ പ്രബലമായ ഇടത്തരക്കാരെ സ്വാധീനിക്കാൻ കഴിവുള്ള വ്യക്തിയെന്ന നിലയിലാണ് അദ്ദേഹത്തെ കേന്ദ്രം പരിഗണിച്ചത്. മികച്ച വിദ്യാഭ്യാസം, വിജയിച്ച ബിസിനസുകാരൻ, രാഷ്ട്രീയത്തിനപ്പുറം ആശയവിനിമയം നടത്താനുള്ള കഴിവ് എന്നിവ രാജീവ് ചന്ദ്രശേഖറിൻ്റെ പ്രധാന കരുത്താണ്. കഴിഞ്ഞ ലോക്‌സഭാ തിരഞ്ഞെടുപ്പിൽ തിരുവനന്തപുരത്ത് ശശി തരൂരിനെ ‘വിറപ്പിച്ച’ പ്രകടനം അദ്ദേഹത്തിൻ്റെ ജനപിന്തുണയുടെ തെളിവാണ്. അതേസമയം, സംഘടനാപരമായ വെല്ലുവിളികളും അദ്ദേഹത്തിന് മുന്നിലുണ്ട്.

സംഘടനാപരമായ വെല്ലുവിളികൾ

സംഘടനയിൽ പുതുമുഖമായ രാജീവ് ചന്ദ്രശേഖറിന്, കേന്ദ്രമന്ത്രിയാകുന്നതിന് മുൻപ് പാർട്ടി ദേശീയ വക്താവ് സ്ഥാനം അലങ്കരിച്ചതൊഴിച്ചാൽ സംഘടനാതലത്തിൽ വലിയ അനുഭവപരിചയമില്ല. കേരളത്തിലെ ബി.ജെ.പി.യിൽ നിലനിൽക്കുന്ന ഗ്രൂപ്പ് രാഷ്ട്രീയം അദ്ദേഹത്തിന് വലിയ വെല്ലുവിളിയാണ്. കേന്ദ്രത്തിൻ്റെ പിന്തുണയോടെയാണ് അദ്ദേഹത്തിൻ്റെ വരവെങ്കിലും, സംസ്ഥാനത്തിനകത്തെ ഗ്രൂപ്പുകളുടെ എതിർപ്പ് മറികടക്കേണ്ടതുണ്ട്. മന്ത്രിയായോ എം.പിയായോ പ്രവർത്തിക്കുന്നത് പോലെയല്ല സംഘടനാ ചുമതല. 24x7 ലഭ്യമായിരിക്കുകയെന്നത്, പ്രത്യേകിച്ച് കേരളത്തിലെ സാഹചര്യത്തിൽ, അനിവാര്യമാണ്. കമ്പനി എം.ഡിയെപ്പോലെ സംഘടനാ ജോലികൾ മറ്റുള്ളവർക്ക് വീതിച്ചു നൽകി ഓഫീസിൽ ഇരുന്ന് പ്രവർത്തനം നിരീക്ഷിക്കാൻ കഴിയില്ല. അതിനാൽ സ്വന്തം ശൈലിയിൽനിന്ന് പുറത്തുകടക്കാതെ, പൂർണ്ണമായും സംഘടന പ്രവർത്തനങ്ങൾക്കായി ഉഴിഞ്ഞു വയ്ക്കാതെ രാജീവ് ചന്ദ്രശേഖരന് അധ്യക്ഷസ്ഥാനത്ത് ഇരിപ്പ് ഉറപ്പിക്കാൻ കഴിയില്ല.

സാധ്യതകളും അനുകൂല ഘടകങ്ങളും

പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത് ഷായുടെയും പാർട്ടിയുടെ ദേശീയ നേതൃത്വത്തിൻ്റെയും പിന്തുണ അദ്ദേഹത്തിന് കരുത്താകും. ആർ.എസ്.എസിൻ്റെ പിന്തുണയും അദ്ദേഹത്തിന് ലഭിക്കും. ലോക്സഭാ തിരഞ്ഞെടുപ്പിൽ രാജീവ് ചന്ദ്രശേഖർ നടപ്പിലാക്കിയ ആധുനിക പ്രചാരണ രീതികൾ കേരളത്തിൽ ബി.ജെ.പിക്ക് പുതിയ ഉണർവ് നൽകും. ഗ്രൂപ്പ് രാഷ്ട്രീയത്തിനെതിരെ പോരാടി പുതിയൊരു ടീമിനെ വാർത്തെടുക്കാൻ അദ്ദേഹത്തിന് കഴിഞ്ഞാൽ അത് ബി.ജെ.പിക്ക് വലിയ നേട്ടമാകും. പൊതുപ്രവർത്തനത്തിൽ പുതിയ സാങ്കേതിക വിദ്യകൾ പ്രയോഗിക്കാനുള്ള അദ്ദേഹത്തിൻ്റെ കഴിവ് കേരളത്തിൽ ബി.ജെ.പിക്ക് ഗുണം ചെയ്യും. എം.ടി രമേശ്, ശോഭാ സുരേന്ദ്രൻ, കെ സുരേന്ദ്രൻ തുടങ്ങിയവരുടെ അനുകൂല പ്രതികരണങ്ങൾ രാജീവ് ചന്ദ്രശേഖരന് കൂടുതൽ കരുത്ത് നൽകുന്നു. ഇതൊക്കെ എത്രത്തോളം ആത്മാർഥതയോടെയാണെന്നത് പിന്നീട് മനസ്സിലാകുന്ന കാര്യമാണ്.

അധികാരത്തിലേക്കുള്ള വഴി: രാജീവിൻ്റെ പോരാട്ടങ്ങൾ

രാജീവ് ചന്ദ്രശേഖർ പൂർണ്ണമായും ഒരു രാഷ്ട്രീയക്കാരനാകേണ്ടതുണ്ട്. അതിന് അദ്ദേഹത്തിന് കഴിയുമോ എന്നത് കാത്തിരുന്ന് കാണേണ്ടതാണ്. ഗ്രൂപ്പുകൾക്ക് അതീതമായി സംസ്ഥാന ബി.ജെ.പിയെ നയിക്കുകയെന്ന കഠിന പരീക്ഷണമാണ് അദ്ദേഹത്തിന് മുന്നിലുള്ളത്. എങ്കിലും കേരള രാഷ്ട്രീയത്തിൽ ബി.ജെ.പിക്ക് വലിയ മുന്നേറ്റം ഉണ്ടാക്കാൻ കഴിയുന്ന നേതാവാണ് രാജീവ് ചന്ദ്രശേഖർ. അദ്ദേഹം സ്വയം മാറാനും മറ്റുള്ളവരെ മാറ്റാനും തയ്യാറായാൽ കേരള രാഷ്ട്രീയത്തിൽ ബി.ജെ.പിക്ക് വലിയ മുന്നേറ്റം ഉണ്ടാക്കാൻ കഴിയും. സ്വന്തം ശൈലിയിൽ നിന്ന് പുറത്തുകടന്ന് പൂർണ്ണമായും രാഷ്ട്രീയക്കാരനാകുക, സംസ്ഥാന പാർട്ടിക്കകത്തെ ഗ്രൂപ്പ് രാഷ്ട്രീയത്തെ മറികടക്കുക, കേന്ദ്ര നേതൃത്വത്തിൻ്റെ പിന്തുണയോടെ ശക്തമായ ഒരു ടീമിനെ വാർത്തെടുക്കുക, ആധുനിക പ്രചാരണ രീതികൾ ഉപയോഗിച്ച് പാർട്ടിയെ ജനങ്ങളിലേക്ക് എത്തിക്കുക തുടങ്ങിയ വെല്ലുവിളികളെ അതിജീവിച്ച് രാജീവ് ചന്ദ്രശേഖർ മുന്നേറിയാൽ, കേരളത്തിൽ ബി.ജെ.പിക്ക് കുറച്ചുകൂടി അടിത്തറ ഭദ്രമാക്കാൻ സാധിക്കും. കേരളത്തിൽ അധികാരത്തിലേക്കുള്ള വാതിൽ തുറക്കാൻ കഴിയുമന്നത് അത്ര പെട്ടെന്ന് നടക്കുന്ന കാര്യമല്ലെന്ന് രാജീവ് ചന്ദ്രശേഖരന് തന്നെ നന്നായി അറിയുന്ന കാര്യമാണ് താനും.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.

The central leadership appointed Rajeev Chandrasekhar as the new Kerala BJP state president, aiming to leverage his appeal beyond ideology to the middle class. His strengths include education, business success, and communication skills, evidenced by his performance in the last Lok Sabha election in Thiruvananthapuram. However, he faces organizational challenges due to his lack of extensive experience and the existing group politics within the Kerala BJP.

#RajeevChandrasekhar, #KeralaBJP, #BJPKeralaPresident, #KeralaPolitics, #PoliticalChange, #IndianPolitics