അവസാനം രാഹുൽ 'വേടൻ' കുരുക്കിൽ; കോൺഗ്രസിനുള്ളിലെ കൊടുങ്കാറ്റിൽ സ്ഥാനമൊഴിയേണ്ടിവന്നു

ഭാമനാവത്ത്

(KVARTHA) തനിക്കെതിരെയുയർന്ന ഗുരുതര ആരോപണങ്ങളെത്തുടർന്ന് യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാഹുൽ മാങ്കൂട്ടത്തിൽ രാജിവെച്ചത് കോൺഗ്രസ് പാർട്ടിയെ വലിയ പ്രതിസന്ധിയിൽ നിന്ന് താൽക്കാലികമായി രക്ഷിച്ചിരിക്കുകയാണ്. പത്തനംതിട്ടയിലെ വീട്ടിൽവെച്ച് മാധ്യമങ്ങളെ കണ്ടാണ് അദ്ദേഹം രാജി വിവരം അറിയിച്ചത്.

നിലവിലെ വിവാദങ്ങൾ പുറത്തുവരുന്നതിന് മുൻപുതന്നെ രാഹുലിനെതിരെ ഹൈക്കമാൻഡിന് പരാതി ലഭിച്ചിരുന്നു. ഇത് സംബന്ധിച്ച് അന്വേഷണം നടത്താൻ എഐസിസി ജനറൽ സെക്രട്ടറി ദീപ ദാസ് മുൻഷി കെപിസിസി നേതൃത്വത്തിന് നിർദേശം നൽകിയിരുന്നു. 

അന്വേഷണത്തിൽ ആരോപണങ്ങളിൽ കഴമ്പുണ്ടെന്ന് കണ്ടെത്തിയതിനെത്തുടർന്നാണ് യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാജിവെക്കാൻ ഹൈക്കമാൻഡ് നിർദേശിച്ചത്.

കഴിഞ്ഞ ദിവസമാണ് യുവ മാധ്യമപ്രവർത്തക നടത്തിയ വെളിപ്പെടുത്തലുകൾ വലിയ ചർച്ചയായത്. ഈ വെളിപ്പെടുത്തലുകൾ രാഹുൽ മാങ്കൂട്ടത്തിനെതിരെയെന്നായിരുന്നു സോഷ്യൽ മീഡിയയിൽ അടക്കം ചർച്ച നടന്നത്. 

ഇതിനിടയിൽ രാഹുൽ മാങ്കൂട്ടത്തിനെതിരെ ഗുരുതര ആരോപണവുമായി ഹണി ഭാസ്‌കരനും രംഗത്തെത്തിയിരുന്നു. 'രാഹുൽ മാങ്കൂട്ടം-അനുഭവം' എന്ന തലക്കെട്ടോടെ ഫേസ്ബുക്കിൽ പങ്കുവെച്ച കുറിപ്പിലായിരുന്നു ഹണി ഭാസ്‌കരൻ രാഹുലിനെതിരെ തുറന്നെഴുതിയത്.

ഇതിനുപുറമെ, യുവതിയെ ഗർഭച്ഛിദ്രത്തിന് നിർബന്ധിക്കുന്ന രാഹുൽ മാങ്കൂട്ടത്തിലിന്റെ ശബ്ദ സംഭാഷണം ഒരു മാധ്യമം പുറത്തുവിട്ടിരുന്നു. സ്വകാര്യത മാനിച്ച് യുവതിയുടെ ശബ്ദം എഡിറ്റ് ചെയ്താണ് ഈ സംഭാഷണം പുറത്തുവിട്ടത്.

രാഹുൽ മാങ്കൂട്ടത്തിൽ എംഎൽഎ രാജിവെച്ചെങ്കിലും കോൺഗ്രസിന് അത് വലിയ ക്ഷീണമായിരിക്കുകയാണ്. രാഹുലിന്റെ ഗോഡ്ഫാദറായ പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ളവർ ഇപ്പോൾ അദ്ദേഹത്തെ കൈവിട്ടിരിക്കുകയാണ്. 

നടിയും മാധ്യമപ്രവർത്തകയുമായ റിനി ആൻ ജോർജ് മാത്രമല്ല, മറ്റു പലരും രാഹുലിനെതിരെ ആരോപണങ്ങളുമായി രംഗത്തെത്തിയിട്ടുണ്ട്. റാപ്പർ വേടന്റെ അവസ്ഥയുമായി സാമ്യമുള്ള ഒന്നാണ് ഈ യുവ നേതാവിന്റെ ഇപ്പോഴത്തെ അവസ്ഥ. 

രാഹുൽ രാജിവെക്കണമെന്ന് യൂത്ത് കോൺഗ്രസിലെ വനിതാ നേതാക്കളും ആവശ്യപ്പെട്ടിരുന്നു. അതുകൊണ്ടുതന്നെ പാർട്ടിയിൽ അദ്ദേഹത്തിന് പിടിച്ചുനിൽക്കാനാകാത്ത അവസ്ഥയായി.

ഇതിനിടെ രാഹുലിന്റെ എംഎൽഎ സ്ഥാനം രാജിവെക്കണമെന്നാവശ്യപ്പെട്ട് പാലക്കാട് മണ്ഡലത്തിലെ എംഎൽഎ ഓഫീസിലേക്ക് മാർച്ച് ഉൾപ്പെടെയുള്ള പ്രക്ഷോഭങ്ങളുമായി സിപിഎമ്മും ബിജെപിയും രംഗത്തെത്തിയിട്ടുണ്ട്. മൂന്ന് വർഷം മുൻപ് നടന്ന സംഭവങ്ങളാണ് റിനി ആൻ ജോർജിന്റെ വെളിപ്പെടുത്തലിലൂടെ ഇപ്പോൾ വീണ്ടും ചർച്ചയായിരിക്കുന്നത്. 

ഇതിന് മുൻപ് മാധ്യമപ്രവർത്തകയെ പീഡിപ്പിച്ച് ഗർഭിണിയാക്കിയെന്ന ആരോപണവും രാഹുലിനെതിരെ ഉയർന്നിരുന്നു. അതിൽനിന്ന് കഷ്ടിച്ച് രക്ഷപ്പെട്ടുവരുമ്പോഴാണ് പുതിയ ആരോപണങ്ങളിൽ കുരുങ്ങുന്നത്.

 രാഹുലിനെതിരെയുയർന്ന ആരോപണങ്ങൾ കോൺഗ്രസ് പാർട്ടിക്ക് വലിയ നാണക്കേടുണ്ടാക്കിയിരിക്കുകയാണ്. കെപിസിസി അധ്യക്ഷൻ പോലും മാധ്യമങ്ങളോട് നേർക്ക് നേർ നിന്ന് മറുപടി പറയാൻ കഴിയാത്തത് പാർട്ടിയുടെ ഗതികേട് വ്യക്തമാക്കുന്നു.
 

രാഹുൽ മാങ്കൂട്ടത്തിലിന്റെ രാജിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Rahul Mankootathil resigns as Youth Congress president.

#RahulMankootathil, #YouthCongress, #Politics, #KeralaCongress, #Resignation, #PoliticalCrisis