കണ്ണൂരിൽ പി വി അൻവറിനെ ഇറക്കി പ്രചാരണം കൊഴുപ്പിക്കാൻ യുഡിഎഫ് നീക്കം; 'പിണറായിസത്തിനെതിരെ തൃണമൂൽ നേതാവെത്തും'

കണ്ണൂർ: (KVARTHA) യുഡിഎഫ് അസോസിയേറ്റ് പദവി ലഭിച്ചതോടെ തൃണമൂൽ കോൺഗ്രസ് നേതാവ് പി വി അൻവറിനെ വരാനിരിക്കുന്ന നിയമസഭാ തിരഞ്ഞെടുപ്പിൽ കണ്ണൂരിൽ പ്രചാരണത്തിന് എത്തിക്കാൻ യുഡിഎഫ് നീക്കം തുടങ്ങി. സി പി എം വിജയിച്ച മണ്ഡലങ്ങളിൽ ജനുവരിയിൽ തന്നെ അൻവർ പര്യടനം നടത്തും.

മുഖ്യമന്ത്രി പിണറായി വിജയൻ പ്രതിനിധീകരിക്കുന്ന ധർമ്മടം, സി പി എം സംസ്ഥാന സെക്രട്ടറി എം വി ഗോവിന്ദന്റെ തട്ടകമായ തളിപ്പറമ്പ്, സ്പീക്കർ എ എൻ ഷംസീർ രണ്ടുതവണ വിജയിച്ച തലശ്ശേരി എന്നിവിടങ്ങളിലാണ് അൻവർ പ്രധാനമായും പര്യടനം നടത്തുക. 

'പിണറായിസത്തിനെതിരെ യുഡിഎഫിനെ വിജയിപ്പിക്കുക' എന്ന മുദ്രാവാക്യമുയർത്തിയായിരിക്കും അൻവർ കണ്ണൂരിലെത്തുക. നിലവിൽ എൽഡിഎഫ് വിജയിച്ച കണ്ണൂർ, അഴീക്കോട് മണ്ഡലങ്ങളിലും അൻവർ പ്രചാരണത്തിനിറങ്ങിയേക്കും.

ജനുവരിയിൽ കണ്ണൂരിലെത്തുന്ന അൻവറിനെ അഭിവാദ്യം ചെയ്തുകൊണ്ട് തൃണമൂൽ കോൺഗ്രസ് കണ്ണൂർ ജില്ലാ കമ്മിറ്റി നഗരത്തിന്റെ വിവിധ ഭാഗങ്ങളിൽ ബോർഡുകൾ സ്ഥാപിച്ചിട്ടുണ്ട്. പിണറായിസത്തിനെതിരെ പൊരുതാനെത്തുന്ന അൻവറിന് സ്വാഗതമെന്ന അടിക്കുറിപ്പുകളോടെയാണ് ഈ ബോർഡുകൾ. 

സി പി എം കണ്ണൂർ ജില്ലാ കമ്മിറ്റി ഓഫീസ് സ്ഥിതിചെയ്യുന്ന തളാപ്പ്, പഴയ ബസ് സ്റ്റാൻഡ്, കോർപ്പറേഷൻ പരിസരം, യോഗശാല റോഡ് തുടങ്ങിയ സ്ഥലങ്ങളിലാണ് അൻവറിനായി ബോർഡുകൾ ഉയർന്നിട്ടുള്ളത്.

അതേസമയം, വരാനിരിക്കുന്ന നിയമസഭാ തിരഞ്ഞെടുപ്പിൽ തന്റെ പാർട്ടിക്കായി അൻവർ മൂന്ന് സീറ്റുകൾ ആവശ്യപ്പെടുന്നുണ്ടെങ്കിലും ബേപ്പൂർ മാത്രമേ അനുവദിക്കാൻ കഴിയുകയുള്ളൂ എന്ന നിലപാടിലാണ് കോൺഗ്രസ് നേതൃത്വം. മന്ത്രി മുഹമ്മദ് റിയാസിന്റെ സിറ്റിങ് സീറ്റായ ബേപ്പൂരിൽ മത്സരിച്ച് മണ്ഡലം പിടിച്ചെടുക്കുകയാണ് ലക്ഷ്യമിടുന്നത്.

കണ്ണൂരിലെ രാഷ്ട്രീയ മാറ്റങ്ങളെ കുറിച്ചുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം താഴെ രേഖപ്പെടുത്തൂ. 

Article Summary: PV Anvar to lead UDF campaign in CPM strongholds of Kannur against Pinarayi Vijayan.

#PVAnvar #KannurPolitics #UDF #PinarayiVijayan #KeralaElection2025 #CPM