നാടിന് താങ്ങായി നിന്നവരെ അവഗണിക്കരുത്: പ്രവാസി ലീഗ്

കണ്ണൂർ: (KVARTHA) നാടിന്റെ വികസനത്തിൽ നിർണായക പങ്കുവഹിക്കുന്ന പ്രവാസികളുടെ ശേഷിച്ച ജീവിതം സുരക്ഷിതമാക്കാൻ രാജ്യത്തെ ജനാധിപത്യ സംവിധാനങ്ങൾ ശക്തമായ നിലപാടുകൾ സ്വീകരിക്കണമെന്ന് പ്രവാസി ലീഗ് സംസ്ഥാന പ്രസിഡൻ്റ് ഹനീഫ മൂന്നിയൂർ ആവശ്യപ്പെട്ടു.

പ്രവാസലോകത്തുനിന്ന് തിരിച്ചെത്തിയവരെ ഭരണകൂടങ്ങൾ വേണ്ടത്ര പരിഗണിക്കുന്നില്ലെന്നും, അവരുടെ പ്രശ്‌നങ്ങൾ പരിഹരിക്കാനും മാന്യമായി ജീവിക്കാനുമുള്ള പദ്ധതികൾ ആവിഷ്കരിക്കാനും സർക്കാരുകൾക്ക് ബാധ്യതയുണ്ടെന്നും അദ്ദേഹം ചൂണ്ടിക്കാട്ടി.

‘മടങ്ങിയെത്തിയ പ്രവാസികളെ സർക്കാരുകൾ രണ്ടാംതരം പൗരന്മാരായി കാണുകയാണ്, ഇത് അംഗീകരിക്കാനാവില്ല,’ അദ്ദേഹം പറഞ്ഞു. ഇന്ത്യയ്ക്കകത്തും വിദേശത്തുമുള്ള പ്രവാസികളുടെ പ്രശ്നങ്ങളും മടങ്ങിയെത്തിയവരുടെ വിഷയങ്ങളും വ്യത്യസ്തമായതിനാൽ, അവ പ്രത്യേകം പരിഗണിച്ച് പ്രവാസി പുനരധിവാസ പദ്ധതികൾക്ക് ആക്കം കൂട്ടണമെന്നും അദ്ദേഹം ആവശ്യപ്പെട്ടു.

പ്രവാസി ലീഗ് സംസ്ഥാന വ്യാപകമായി ജില്ലാ കളക്ടറേറ്റുകൾക്കും നോർക്ക ഓഫീസുകൾക്കും മുന്നിൽ സംഘടിപ്പിച്ച അവകാശ സമരത്തിന്റെ സംസ്ഥാനതല ഉദ്ഘാടനം കണ്ണൂർ കളക്ടറേറ്റിനു മുന്നിൽ നിർവഹിച്ചു സംസാരിക്കുകയായിരുന്നു ഹനീഫ മൂന്നിയൂർ. പ്രവാസി ലീഗ് ജില്ലാ പ്രസിഡൻ്റ് സി.പി.വി. അബ്ദുല്ല അധ്യക്ഷത വഹിച്ചു.

മുസ്ലിം ലീഗ് ജില്ലാ പ്രസിഡൻ്റ് അഡ്വ. അബ്ദുൽ കരീം ചേലേരി മുഖ്യപ്രഭാഷണം നടത്തി. ജനറൽ സെക്രട്ടറി യു.പി. അബ്ദുറഹ്‌മാൻ സ്വാഗതം പറഞ്ഞു. മുസ്ലിം ലീഗ് ജില്ലാ ഭാരവാഹികളായ ഇബ്രാഹിം മുണ്ടേരി, എം.പി. മുഹമ്മദലി, പ്രവാസി ലീഗ് സംസ്ഥാന വൈസ് പ്രസിഡൻ്റ് കെ.സി. അഹമ്മദ്, പ്രവാസി ലീഗ് ജില്ലാ ട്രഷറർ വി.പി. അബ്ദുല്ല ഹാജി, ഭാരവാഹികളായ പി.എം. മുഹമ്മദ് കുഞ്ഞി ഹാജി, ഖാദർ മുണ്ടേരി, നാസർ കേളോത്ത്, കെ.പി. ഇസ്മായിൽ ഹാജി, എം. മൊയ്തീൻ ഹാജി മട്ടന്നൂർ, ഇ.കെ. ജലാലുദ്ദീൻ, മുനവ്വർ അഹമ്മദ്, അഹമ്മദ് പോത്താം കണ്ടം എന്നിവർ പ്രസംഗിച്ചു. ധർണ്ണയ്ക്ക് മുന്നോടിയായി കണ്ണൂർ സ്റ്റേഡിയം കോർണറിൽനിന്ന് നടത്തിയ പ്രതിഷേധ മാർച്ചിൽ നൂറുകണക്കിനാളുകൾ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കളുമായി അഭിപ്രായങ്ങൾ കമന്റ് ബോക്സിൽ രേഖപ്പെടുത്തുക.

Article Summary: Pravasi League demands fair treatment for returning expats.

#PravasiLeague #KeralaPolitics #ExpatRights #Kannur #India #Discrimination