'ചാണ്ടി ഉമ്മന്റെ അഭിനയത്തിന് ഓസ്കാർ നൽകണം': പി പി ദിവ്യയുടെ രൂക്ഷവിമർശനം!

കണ്ണൂർ: (KVARTHA) കോട്ടയം മെഡിക്കൽ കോളേജിൽ പഴയ കെട്ടിടം തകർന്നു വീണ് താലയോലപ്പറമ്പിലെ ബിന്ദു എന്ന വീട്ടമ്മ മരിച്ച സംഭവത്തിൽ പ്രതിരോധത്തിലായ ആരോഗ്യ വകുപ്പ് മന്ത്രി വീണാ ജോർജിന് പിന്തുണയുമായി മുൻ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി. ദിവ്യ രംഗത്ത്. 

‘അധികാരത്തിൽ ഇരിക്കുന്നത് ഒരു പെണ്ണാകുമ്പോൾ ഉശിര് കൂടും ചിലർക്ക്. കൂടെയുള്ള ഒന്നിനെ എതിരാളികൾ വളഞ്ഞിട്ട് ആക്രമിക്കുമ്പോൾ കൂടെ നിൽക്കുകയെന്നത് ഓരോ കമ്യൂണിസ്റ്റുകാരുടെയും കടമയാണ്,’ പി.പി. ദിവ്യ തന്റെ ഫേസ്ബുക്ക് പോസ്റ്റിൽ കുറിച്ചു.

ബിന്ദുവിന്റെ മരണം പ്രതിപക്ഷം ആഘോഷിക്കുകയാണെന്നും പി.പി. ദിവ്യ കുറ്റപ്പെടുത്തി. വലതുപക്ഷ മാധ്യമങ്ങൾക്ക് കിട്ടിയ ഒരു ഇര മാത്രമാണ് കേരളത്തിലെ ആരോഗ്യ വകുപ്പ് മന്ത്രിയെന്ന് അവർ ആരോപിച്ചു. ഇടതുഭരണത്തിന്റെ തുടർച്ചയിൽ അധികാരത്തിന്റെ ചെങ്കോൽ ഇനിയും കിട്ടുമോയെന്ന ആശങ്കയിലാണ് പ്രതിപക്ഷ പാർട്ടികൾ കോപ്രായ സമരങ്ങൾ നടത്തുന്നത്. 

‘ഇത് ജനങ്ങൾ പുച്ഛിച്ചു തള്ളിക്കളഞ്ഞു. ചാണ്ടി ഉമ്മന്റെ അഭിനയത്തിന് ഓസ്കാറെങ്കിലും കൊടുക്കേണ്ടതാണ്,’ പി.പി. ദിവ്യ പരിഹസിച്ചു. കെട്ടിടം തകർന്നു വീണ സ്ഥലത്തുനിന്ന് നടത്തിയ 'ചാണ്ടി ഷോ' നിർത്തിവെച്ച് ദുരന്ത നിവാരണ പ്രവർത്തനങ്ങൾക്ക് നേതൃത്വം കൊടുക്കരുതായിരുന്നോ എന്നും ദിവ്യ ചോദിച്ചു. 

യൂത്ത് കോൺഗ്രസ് പിരിച്ചെടുത്ത മുണ്ട കൈയിലെ 30 വീടുകൾക്കുവേണ്ടിയുള്ള കോടികൾ മുക്കിയതിനെക്കുറിച്ച് ആരും ചോദിക്കരുതെന്നും പി.പി. ദിവ്യ പരിഹസിച്ചു. കോട്ടയം മെഡിക്കൽ കോളേജിലെ പഴയ കെട്ടിടം തകർന്നു വീണ ബിന്ദുവിന്റെ മരണം അത്യന്തം വേദനാജനകമാണെന്നും, അവരുടെ കുടുംബത്തിന്റെ സംരക്ഷണം സർക്കാർ ഏറ്റെടുത്തു കഴിഞ്ഞുവെന്നും പി.പി. ദിവ്യ കൂട്ടിച്ചേർത്തു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: P.P. Divya supports Veena George, criticizes opposition on Kottayam incident.

#VeenaGeorge #PPDivya #KeralaPolitics #KottayamMedicalCollege #CPIM #OppositionCriticism