‘പീഡന വീരനെ താങ്ങുന്നവനെ സൂക്ഷിക്കുക’ കണ്ണൂരിൽ യൂത്ത് കോൺഗ്രസ് ജില്ലാ പ്രസിഡന്റിനെതിരെ പോസ്റ്റർ

കണ്ണൂർ: (KVARTHA) യൂത്ത് കോൺഗ്രസ് കണ്ണൂർ ജില്ലാ പ്രസിഡന്റ് വിജിൽ മോഹനനെതിരെ വ്യാപകമായി പോസ്റ്ററുകൾ. ‘പീഡന വീരനെ താങ്ങുന്നവനെ സൂക്ഷിക്കുക’ എന്ന് രേഖപ്പെടുത്തിയ പോസ്റ്ററുകളാണ് നഗരത്തിന്റെ വിവിധ ഭാഗങ്ങളിൽ പ്രത്യക്ഷപ്പെട്ടത്.

ശ്രീകണ്ഠപുരം പൊടിക്കളത്താണ് പോസ്റ്ററുകൾ ആദ്യം കണ്ടത്. ശ്രീകണ്ഠപുരം നഗരസഭ കൗൺസിലർ കൂടിയായ വിജിൽ മോഹനൻ പ്രതിനിധാനം ചെയ്യുന്ന വാർഡിലെ ഇലക്ട്രിക് പോസ്റ്റുകളിലെല്ലാം പോസ്റ്ററുകൾ പതിച്ചിട്ടുണ്ട്.

സിപിഐഎമ്മിന്റെ കുത്തക വാർഡിൽ വിജയിച്ചതുമുതൽ തനിക്കെതിരെ ആക്രമണങ്ങൾ നടക്കുന്നുണ്ടെന്ന് വിജിൽ മോഹനൻ ആരോപിച്ചു. നേർക്കുനേർ ഏറ്റുമുട്ടാൻ ധൈര്യമില്ലാത്ത ഡിവൈഎഫ്ഐക്കാരാണ് പോസ്റ്ററിനു പിന്നിലെന്നും അദ്ദേഹം പറഞ്ഞു.

യൂത്ത് കോൺഗ്രസ് മുൻ സംസ്ഥാന പ്രസിഡന്റ് രാഹുൽ മാങ്കൂട്ടത്തിൽ എംഎൽഎയെ നിയമസഭയിലേക്ക് അനുഗമിച്ചതിന് യൂത്ത് കോൺഗ്രസ് തിരുവനന്തപുരം ജില്ലാ പ്രസിഡന്റ് നേമം ഷെജീറിനെതിരെ വിമർശനം ശക്തമായിരുന്നു. ഈ സാഹചര്യത്തിൽ ഷെജീറിനെ പിന്തുണച്ച് വിജിൽ മോഹനൻ രംഗത്തെത്തിയിരുന്നു.

‘ഹൂ കെയേർസ്’ എന്ന അടിക്കുറിപ്പോടെ ഷെജീറിനൊപ്പമുള്ള ചിത്രം വിജിൽ ഫേസ്ബുക്കിൽ പങ്കുവെച്ചിരുന്നു. ഷെജീറിനെതിരെ നടപടി ആവശ്യപ്പെട്ട് ഒരു വിഭാഗം നേതാക്കൾ കെപിസിസി പ്രസിഡന്റ് സണ്ണി ജോസഫിനും യൂത്ത് കോൺഗ്രസ് ദേശീയ പ്രസിഡന്റിനും പരാതി നൽകിയിരുന്നു.

നടപടിക്ക് വിധേയനായ രാഹുലിനെ അനുഗമിച്ചത് തെറ്റായ സന്ദേശം നൽകുമെന്നാണ് പരാതിയിലുള്ളത്. പ്രതിപക്ഷ നേതാവ് വി.ഡി. സതീശന്റെ താക്കീത് അവഗണിച്ച് രാഹുൽ മാങ്കൂട്ടത്തിൽ നിയമസഭാ സമ്മേളനത്തിനെത്തിയപ്പോൾ നേമം ഷെജീറായിരുന്നു അദ്ദേഹത്തോടൊപ്പം ഉണ്ടായിരുന്നത്.

ഈ വിഷയത്തെക്കുറിച്ചുള്ള നിങ്ങളുടെ അഭിപ്രായം എന്താണ്? കമന്റ് ചെയ്യൂ. ഈ വാർത്ത നിങ്ങളുടെ സുഹൃത്തുക്കളുമായി ഷെയർ ചെയ്യൂ.

Article Summary: Posters against Youth Congress leader Vijil Mohan appear in Kannur.

#YouthCongress #Kannur #VijilMohanan #KeralaPolitics #DYFI #PosterWar