സിയോൾ: (KVARTHA) ദക്ഷിണ കൊറിയൻ പ്രസിഡന്റ് യൂൻ സുക് യോലിന്റെ ഓഫീസിലും പൊലീസ് ആസ്ഥാനത്തും ദക്ഷിണ കൊറിയൻ പൊലീസ് ബുധനാഴ്ച റെയ്ഡ് നടത്തിയതായി യോൻഹാപ്പ് വാർത്താ ഏജൻസി റിപ്പോർട്ട് ചെയ്തു. സിയോൾ മെട്രോപൊളിറ്റൻ പൊലീസിന്റെയും നാഷണൽ അസംബ്ലി പൊലീസ് ഗാർഡിന്റെയും ഓഫീസുകളും റെയ്ഡ് ചെയ്തതായി പോലീസ് സ്ഥിരീകരിച്ചു.

പ്രസിഡന്റ് യൂൻ സുക്-യോൽ പട്ടാള നിയമം ഏർപ്പെടുത്തിയതിന് പിന്നാലെ നടക്കുന്ന അന്വേഷണത്തിന്റെ ഭാഗമായാണ് ഈ റെയ്ഡ്. റെയ്ഡ് സമയത്ത് പ്രസിഡന്റ് യൂൻ ഓഫീസിൽ ഉണ്ടായിരുന്നില്ല. കഴിഞ്ഞ ആഴ്ച ചൊവ്വാഴ്ചയ്ക്കും ബുധനാഴ്ചയ്ക്കും ഇടയിൽ, ദക്ഷിണ കൊറിയൻ പ്രസിഡന്റ് രാജ്യത്ത് പട്ടാള നിയമം ഏർപ്പെടുത്തിയിരുന്നു. 

എന്നാൽ, വലിയ പ്രതിഷേധത്തെ തുടർന്ന് ആറ് മണിക്കൂറിനുള്ളിൽ അദ്ദേഹം തീരുമാനം പിൻവലിച്ചു. യൂനിന്റെ ഈ നടപടിക്ക് ശേഷം, ദക്ഷിണ കൊറിയയിൽ അദ്ദേഹം വളരെയധികം എതിർപ്പുകൾ നേരിടുന്നു, അദ്ദേഹത്തിനെതിരെ അന്വേഷണം നടക്കുന്നു. 

അതിനിടെ, പ്രസിഡന്റ് യൂൻ സുക് യോലിന്റെ വിദേശയാത്ര നിയമമന്ത്രാലയം തടഞ്ഞിരിക്കുകയാണ്. രാജ്യദ്രോഹക്കുറ്റത്തിന് യൂനിനെതിരായ അന്വേഷണം തുടരുമെന്നും നിയമമന്ത്രാലയം അറിയിച്ചു.
ശനിയാഴ്ച പ്രതിപക്ഷം കൊണ്ടുവന്ന ഇംപീച്ച്മെന്റ് നടപടിയെ അതിജീവിച്ചെങ്കിലും വീണ്ടും പ്രമേയം കൊണ്ടുവരുമെന്ന് പ്രതിപക്ഷം അറിയിച്ചിട്ടുണ്ട്. 

സൈന്യത്തിന്റെ സുപ്രീം കമാൻഡർ പദവി നിയമപരമായി ഇപ്പോഴും യൂനിനാണെങ്കിലും മന്ത്രിമാരും മറ്റു പ്രമുഖരും രാജ്യം വിടുന്നതു തടയാൻ ഉന്നതർക്കെതിരായ അഴിമതി അന്വേഷിക്കുന്ന ഓഫീസിന്റെ തലവൻ ഡോങ് വൂൻ സൈന്യത്തോട് ആവശ്യപ്പെട്ടിട്ടുണ്ട്. പട്ടാളനിയമം പ്രഖ്യാപിച്ചതിനെ തുടർന്ന് മുൻ പ്രതിരോധമന്ത്രി കിം യോങ് ഹ്യൂനിനെ അറസ്റ്റ് ചെയ്തിട്ടുമുണ്ട്.

#SouthKorea #YoonSukYeol #PoliceRaid #Impeachment #Protests #Corruption