പിഎം ശ്രീ തർക്കം: സിപിഐയെ അനുനയിപ്പിക്കാൻ സിപിഎം നീക്കം

കണ്ണൂർ: (KVARTHA) മുഖ്യമന്ത്രി പിണറായി വിജയൻ ഇടപെട്ടതോടെ പി എം ശ്രീ വിഷയത്തിൽ ഇടഞ്ഞുനിൽക്കുന്ന സി പി ഐ ഒത്തുതീർപ്പിന് വഴങ്ങിയേക്കും. തദ്ദേശസ്വയംഭരണ തിരഞ്ഞെടുപ്പ് അടുത്തു വരുന്ന സാഹചര്യത്തിൽ സർക്കാരിനെതിരെ കൂടുതൽ കടുത്ത നടപടികളിലേക്ക് പോകുന്നതിൽ സി പി ഐ അഖിലേന്ത്യാ നേതൃത്വത്തിനും താൽപര്യമില്ല. 

കേരളത്തിലെ മുന്നണി ബന്ധങ്ങളിലുണ്ടായ അസ്വാരസ്യം തീർക്കാൻ സംസ്ഥാന നേതൃത്വം അടിയന്തിരമായി ഇടപെടണമെന്ന് സി പി എം പോളിറ്റ് ബ്യൂറോ അംഗം എം എ ബേബിയും നിർദേശിച്ചിട്ടുണ്ട്.

ഇതോടെയാണ് പി എം ശ്രീ വിഷയത്തിൽ സമവായത്തിന് സി പി എം ശ്രമം തുടങ്ങിയത്. ഉടൻ ഇടതുമുന്നണി യോഗം വിളിച്ച് വിഷയം ചർച്ച ചെയ്യാനാണ് തീരുമാനം. സി പി ഐ വിഷയത്തിൽ നിലപാട് കടുപ്പിച്ചതോടെയാണ് ഈ നീക്കം. 

അതേസമയം, പി എം ശ്രീ പദ്ധതിയുമായി മുന്നോട്ട് പോകാൻ തന്നെയാണ് സി പി എം തീരുമാനം. പദ്ധതി നടപ്പിലാക്കുന്നതിനെ എതിർക്കുന്ന സി പി ഐ നിലപാടിനെ മയപ്പെടുത്തലാണ് മുന്നണി യോഗത്തിന്റെ ലക്ഷ്യം.

എന്നാൽ, ഈ വിഷയത്തിൽ വിട്ടുവീഴ്ച വേണ്ടെന്ന നിലപാടാണ് സി പി ഐ സംസ്ഥാന നേതൃത്വത്തിന് ഇപ്പോഴുള്ളത്. അതുകൊണ്ടുതന്നെ സി പി എം നടത്തുന്ന സമവായ ശ്രമം വിജയിക്കുമോ എന്ന കാര്യത്തിൽ മുന്നണിയിലെ മറ്റു ഘടകകക്ഷികൾക്കും ആശങ്കയുണ്ട്. 

പി എം ശ്രീ പദ്ധതിയിൽ നിന്ന് സർക്കാർ പിന്മാറുന്നത് വരെ മന്ത്രിസഭാ യോഗത്തിൽ നിന്ന് വിട്ടുനിൽക്കാനാണ് സി പി ഐ ആലോചിക്കുന്നത്. മാസങ്ങളോളം മാറിനിൽക്കേണ്ടി വരുമെന്നാണ് നേതൃത്വം വിലയിരുത്തുന്നത്. മന്ത്രിമാരായ കെ രാജൻ, പി പ്രസാദ്, ജി ആർ അനിൽ, ജെ ചിഞ്ചുറാണി എന്നിവരുമായി നേതൃത്വം സംസാരിച്ചിട്ടുണ്ട്. 

മന്ത്രിസഭയുടെ കൂട്ടുത്തരവാദിത്വം നഷ്ടപ്പെടുന്ന സാഹചര്യത്തിൽ സി പി എം പിന്നോട്ട് പോകുമെന്നാണ് സി പി ഐയുടെ വിലയിരുത്തൽ. എക്സിക്യൂട്ടീവിൽ കൂടി ചർച്ച ചെയ്ത ശേഷമാകും അന്തിമ തീരുമാനം.

'രാഷ്ട്രീയമായി ഏറ്റവും ശരിയായ തീരുമാനം കൈക്കൊള്ളും,' എന്ന് സി പി ഐ സംസ്ഥാന സെക്രട്ടറി ബിനോയ് വിശ്വം പറഞ്ഞു. 'മുഖ്യമന്ത്രി തന്നെ വിളിച്ചില്ലെ'ന്നും ബിനോയ് വിശ്വം കൂട്ടിച്ചേർത്തു. 'ആശയപരമായും രാഷ്ട്രീയപരമായും തീരുമാനമെടുക്കും.

മുഖ്യമന്ത്രി വിളിച്ചാൽ ചർച്ച ചെയ്യും. ചർച്ചയുടെ വാതിൽ തുറന്നു കിടക്കുകയാണ്. എൽ ഡി എഫിന് ആശയ അടിത്തറയുണ്ട്. ചർച്ചകളുണ്ടാകുമെന്നും മറ്റൊന്നും പറയാനി'ല്ലെന്നും ബിനോയ് വിശ്വം വ്യക്തമാക്കി.

ഇതിനിടെ, പി എം ശ്രീ വിഷയത്തിൽ മുഖ്യമന്ത്രി പിണറായി വിജയനും സി പി ഐ സംസ്ഥാന സെക്രട്ടറി ബിനോയ് വിശ്വവും ചർച്ച നടത്തും. തിങ്കളാഴ്ച വൈകിട്ടാണ് ചർച്ച നടത്തുക. സി പി ഐ സംസ്ഥാന സെക്രട്ടേറിയറ്റ് യോഗത്തിനിടയിൽവെച്ചാണ് ചർച്ച നടത്താൻ സന്നദ്ധത അറിയിച്ചുകൊണ്ട് മുഖ്യമന്ത്രിയുടെ വിളി വന്നത്. 

ചർച്ച കഴിയുന്നതുവരെ മറ്റു തീരുമാനങ്ങളിലേക്ക് പോകരുതെന്ന് മുഖ്യമന്ത്രി അഭ്യർത്ഥിച്ചു. മുഖ്യമന്ത്രിയുമായുള്ള ചർച്ച കഴിഞ്ഞ് സി പി ഐ സംസ്ഥാന സെക്രട്ടേറിയറ്റും എക്സിക്യൂട്ടീവും വീണ്ടും ചേരും.

മുഖ്യമന്ത്രി പിണറായി വിജയനും സി പി എം പോളിറ്റ് ബ്യൂറോ അംഗം എം എ ബേബിയും പങ്കെടുത്ത അടിയന്തര സെക്രട്ടേറിയറ്റ് യോഗം തിരുവനന്തപുരത്ത് ചേർന്നിരുന്നു. പി എം ശ്രീ വിഷയത്തിൽ നിന്ന് പിന്നോട്ടില്ലെന്നാണ് സെക്രട്ടേറിയറ്റ് തീരുമാനം. പി എം ശ്രീയുമായി സി പി എം മുന്നോട്ട് പോകാൻ തീരുമാനിച്ചു.

'എൽ ഡി എഫിന്റെ ഭാഗമാണ് സി പി ഐയും സി പി എമ്മും. മുഖ്യമന്ത്രി വിളിച്ചാൽ വിഷയം ചർച്ച ചെയ്യു'മെന്നും ബിനോയ് വിശ്വം നേരത്തെ പറഞ്ഞിരുന്നു.

ഈ രാഷ്ട്രീയ നീക്കത്തെക്കുറിച്ച് നിങ്ങൾക്കെന്ത് തോന്നുന്നു? നിങ്ങളുടെ അഭിപ്രായം കമൻ്റ് ചെയ്യുക. വാർത്ത ഷെയർ ചെയ്യുക. 

Article Summary: LDF internal conflict between CPI and CPM over PM-SHRI scheme is likely to be resolved after CM's intervention.

#PMSHRI #CPMCPI #LDF #KeralaPolitics #PinarayiVijayan #BinoyViswam