കേരളത്തിൽ ബിജെപി അധികാരത്തിൽ വരും; എൽഡിഎഫും യുഡിഎഫും വികസനത്തിൻ്റെ ശത്രുക്കൾ: പ്രധാനമന്ത്രി നരേന്ദ്ര മോദി

തിരുവനന്തപുരം: (KVARTHA) കേരളത്തിൽ എൽഡിഎഫ്-യുഡിഎഫ് മുന്നണികളുടെ അഴിമതി ഭരണത്തിന് അറുതിവരുത്താനും വികസനത്തിൻ്റെ പാതയിൽ സംസ്ഥാനത്തെ നയിക്കാനും ബിജെപി അധികാരത്തിൽ വരുമെന്ന് പ്രധാനമന്ത്രി നരേന്ദ്ര മോദി. 

തിരുവനന്തപുരം പുത്തരിക്കണ്ടം മൈതാനത്ത് നടന്ന ബിജെപി പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം. പ്രസംഗത്തിനിടെ സ്റ്റേജിന് നടുവിലെത്തി പ്രവർത്തകരെ വണങ്ങിയ മോദി, പദ്മനാഭ സ്വാമിയുടെ പാവന ഭൂമിയിൽ വരാനായത് സൗഭാഗ്യമാണെന്നും പറഞ്ഞു.

ഗുജറാത്ത് മോഡൽ വിജയം

ഗുജറാത്തിലെ ബിജെപിയുടെ വിജയഗാഥ തുടങ്ങിയത് ഒരു നഗരത്തിൽ നിന്നാണ്. 1987-ന് മുൻപ് ഗുജറാത്തിൽ ബിജെപി ഒന്നുമല്ലായിരുന്നു. 1987-ൽ അഹമ്മദാബാദ് മുനിസിപ്പാലിറ്റി പിടിച്ചു, പിന്നീട് ഗുജറാത്ത്‌ സംസ്ഥാനം പിടിച്ചടക്കി. 

ഇപ്പോൾ തിരുവനന്തപുരം കോർപറേഷനിലെ വിജയം സാധാരണ വിജയമല്ല. ഇനി കേരളം ബിജെപിയുടെ കയ്യിൽ വരുമെന്നും മോദി പറഞ്ഞു. തിരുവനന്തപുരത്തെ രാജ്യത്തെ ഏറ്റവും മികച്ച നഗരമാക്കി മാറ്റാൻ എല്ലാ പിന്തുണയും നൽകും.

ഇരുമുന്നണികൾക്കുമെതിരെ രൂക്ഷ വിമർശനം

എൽഡിഎഫും യുഡിഎഫും കേരളത്തെ നശിപ്പിച്ചു. ഇരു മുന്നണികളുടെയും ചിഹ്നങ്ങൾ രണ്ടാണെങ്കിലും അജണ്ട ഒന്നാണ്; അഴിമതിയും പ്രീണനവും മാത്രം. സർക്കാർ മാറിയാലും ഇവിടെ സിസ്റ്റം മാറുന്നില്ല. 

അഞ്ച് വർഷം കൂടുമ്പോൾ മാറി മാറി ഭരിക്കുന്ന അഡ്ജസ്റ്റ്മെന്റ് ഭരണം അവസാനിപ്പിക്കണം. ത്രിപുരയിൽ സിപിഎമ്മിന്റെ അടയാളം പോലും അവശേഷിക്കുന്നില്ലെന്നും കേരളത്തെ മോചിപ്പിക്കാൻ ഇവരെ തൂത്തെറിയണമെന്നും പ്രധാനമന്ത്രി പറഞ്ഞു.

എൽഡിഎഫ് വികസനത്തിന്റെ ശത്രുവാണ്. കേന്ദ്രപദ്ധതികളുടെ നേട്ടം ജനങ്ങൾക്ക് നിഷേധിക്കുന്നു. പിഎം ആവാസ് യോജന, പിഎം ശ്രീ തുടങ്ങിയ പദ്ധതികൾ നടപ്പാക്കാതെ പാവപ്പെട്ട വിദ്യാർത്ഥികൾക്ക് ഗുണം നിഷേധിച്ചു.

 സഹകരണ ബാങ്കുകളെ കൊള്ളയടിക്കുകയും അടിസ്ഥാന സൗകര്യ മേഖലയെ അവഗണക്കുകയും ചെയ്തു. 2014-ന് മുമ്പ് ഉണ്ടായിരുന്ന കോൺഗ്രസ് സർക്കാരും ഒന്നും ചെയ്തില്ല. കർഷകർക്കുള്ള പണം അവരുടെ പോക്കറ്റുകളിലേക്കാണ് പോയതെന്നും മോദി ആരോപിച്ചു.

'മാവോ-കോൺഗ്രസ്'

കോൺഗ്രസിനെതിരെയും രൂക്ഷമായ ഭാഷയിലാണ് പ്രധാനമന്ത്രി പ്രതികരിച്ചത്. കോൺഗ്രസിൽ ഇപ്പോൾ മുസ്ലിം ലീഗിനേക്കാൾ വർഗീയവാദികളാണുള്ളത്. കോൺഗ്രസ് രാജ്യത്തെ വർഗീയതയുടെ പരീക്ഷണ ശാലയാക്കി. കോൺഗ്രസ് ഇപ്പോൾ 'മുസ്ലിം ലീഗ് - മാവോ കോൺഗ്രസ്' ആയി മാറി. 

മുസ്ലിം ലീഗിന്റെ അജണ്ടയാണ് കോൺഗ്രസ് നടപ്പാക്കുന്നതെന്നും മോദി പറഞ്ഞു. സ്വർണ്ണക്കടത്ത്, സഹകരണ ബാങ്ക് കൊള്ള എന്നിവയിൽ ഉൾപ്പെട്ട പ്രതികളെ ബിജെപി സർക്കാർ അധികാരത്തിൽ വന്നാൽ ജയിലിൽ അടയ്ക്കുമെന്നും ഇത് മോദിയുടെ ഗ്യാരൻ്റിയാണെന്നും അദ്ദേഹം കൂട്ടിച്ചേർത്തു.

വമ്പൻ പ്രഖ്യാപനങ്ങളില്ല; അമൃത് ഭാരത് ട്രെയിനുകൾ ഫ്ലാഗ് ഓഫ് ചെയ്തു

തലസ്ഥാന നഗരം കാത്തിരുന്ന വമ്പൻ പ്രഖ്യാപനങ്ങളൊന്നും നടത്താതെയാണ് പ്രധാനമന്ത്രി മടങ്ങിയത്. അതിവേഗ റെയിൽ പാത ഉൾപ്പെടെയുള്ള പദ്ധതികൾ പ്രഖ്യാപിക്കുമെന്ന് സൂചനകളുണ്ടായിരുന്നെങ്കിലും അതുണ്ടായില്ല. 

എന്നാൽ, കേരളത്തിന് അനുവദിച്ച മൂന്ന് അമൃത് ഭാരത് ട്രെയിനുകളുടെയും ഒരു പാസഞ്ചർ ട്രെയിനിന്റെയും ഫ്ലാഗ് ഓഫ് വെള്ളിയാഴ്‌ച പ്രധാനമന്ത്രി നിർവഹിച്ചു.

തോന്നയ്ക്കലിലെ ബയോ 360 ലൈഫ് സയൻസസ് പാർക്കിൽ നടപ്പാകുന്ന സിഎസ്ഐആർ-എൻഐഐഎസ്‌ടി ഇന്നവേഷൻ ടെക്നോളജി എൻ്റർപ്രണർഷിപ്പ ഹബ്ബ്, ശ്രീ ചിത്തിര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജിയിൽ പുതിയ റേഡിയോ സർജറി സെൻ്റർ, പൂജപ്പുര ഹെഡ് പോസ്റ്റ് ഓഫീസിൻ്റെ പുതിയ കെട്ടിടം എന്നിവയും ഉദ്ഘാടനം ചെയ്‌തു. പിഎം സ്വാനിധി പദ്ധതിയുടെ കീഴിൽ ഒരു ലക്ഷം ഗുണഭോക്താക്കൾക്ക് ക്രെഡിറ്റ് കാർഡും വായ്‌പയും നൽകുന്ന പദ്ധതിക്കും തുടക്കം കുറിച്ചു.

ന്യായമായ ആവശ്യങ്ങൾ പരിഗണിക്കണം: മുഖ്യമന്ത്രി

കേരളത്തിൻ്റെ ന്യായമായ ആവശ്യങ്ങൾ കേന്ദ്രസർക്കാർ വരുംകാലങ്ങളിൽ പരിഗണിക്കുമെന്ന് പ്രതീക്ഷിക്കുന്നതായി ചടങ്ങിൽ പങ്കെടുത്ത മുഖ്യമന്ത്രി പിണറായി വിജയൻ പറഞ്ഞു. പ്രധാനമന്ത്രി ഉദ്ഘാടനം ചെയ്ത‌ പല പദ്ധതികളും കേരളം നിരന്തരമായി ആവശ്യപ്പെട്ടതാണെന്നും അവ യാഥാർത്ഥ്യമാകുന്നതിൽ സന്തോഷമുണ്ടെന്നും മുഖ്യമന്ത്രി വ്യക്തമാക്കി. അയ്യങ്കാളി, മന്നത്ത് പത്മനാഭൻ, ശ്രീനാരായണ ഗുരു എന്നിവരെ പരാമർശിച്ചുകൊണ്ടായിരുന്നു പ്രധാനമന്ത്രിയുടെ പ്രസംഗം.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: Prime Minister Narendra Modi, during his visit to Thiruvananthapuram, declared that BJP will come to power in Kerala, citing the Gujarat model. He heavily criticized both LDF and UDF as enemies of development and inaugurated several projects including Amrit Bharat trains.

#NarendraModi #KeralaVisit #BJP #LDF #UDF #Thiruvananthapuram #AmritBharatTrain #PinarayiVijayan #Politics