ചുവപ്പിൽ നിന്ന് വെളുപ്പിലേക്ക്: പി കെ ശശിയെ റാഞ്ചാൻ കോൺഗ്രസ് നീക്കം!

പാലക്കാട്: (KVARTHA) ചുവപ്പ് ഷർട്ടുകൾക്ക് പകരം വെള്ളവസ്ത്രം അണിഞ്ഞു പൊതുവേദികളിൽ പ്രത്യക്ഷപ്പെട്ടു തുടങ്ങിയ സി.പി.എം. നേതാവും കെ.ടി.ഡി.സി. ചെയർമാനുമായ പി.കെ. ശശി കോൺഗ്രസിലേക്ക് ചേക്കേറുമെന്ന അഭ്യൂഹങ്ങൾ ശക്തമാകുന്നു. 

യു.ഡി.എഫ്. ഭരിക്കുന്ന മണ്ണാർക്കാട് നഗരസഭയുടെ വേദിയിൽ വെച്ച് സി.പി.എമ്മിനെതിരെ ശശി വിമർശനം ഉന്നയിച്ചത് പാർട്ടിക്കുള്ളിൽ വലിയ ചർച്ചകൾക്ക് വഴിവെച്ചിരുന്നു. ’താൻ നഗരസഭയുടെ പരിപാടിയിൽ പങ്കെടുക്കുന്നതിന് ആർക്കാണിത്ര ബേജാറെന്ന്’ ശശി വേദിയിൽ വെച്ച് ചോദിക്കുകയുണ്ടായി. 

വെള്ള ഷർട്ടണിഞ്ഞ് പരിപാടിക്കെത്തിയ ശശിയെ വി.കെ. ശ്രീകണ്ഠൻ എം.പി. സ്വാഗതം ചെയ്തതും ശ്രദ്ധേയമായി. മണ്ണാർക്കാട് നഗരസഭയുടെ ആയുർവേദ ഡിസ്പെൻസറി ഉദ്ഘാടനത്തിൽ പി.കെ. ശശി പങ്കെടുത്തതിനെ സി.പി.എം. ജില്ലാ നേതൃത്വം നേരത്തെ വിമർശിച്ചിരുന്നു. ഈ വിമർശനങ്ങൾക്ക് അതേ വേദിയിൽ വെച്ച് അദ്ദേഹം സി.പി.എം. നേതാക്കൾക്ക് മറുപടി നൽകി.

നഗരസഭയുടെ അഴിമതി മറയ്ക്കാനാണ് ശശിയെ പരിപാടിക്ക് ക്ഷണിച്ചതെന്ന ഡി.വൈ.എഫ്.ഐയുടെ പരാമർശത്തിന്, ‘കഴുത്തോളം ചെളിയിൽ മുങ്ങിനിൽക്കുന്നവർ മറ്റുള്ളവരുടെ കുപ്പായത്തിലെ ചെളിയെ വിമർശിക്കുകയാണെന്ന്’ ശശി തിരിച്ചടിച്ചു. 

ശശിയുടെ വെള്ള ഷർട്ടിനെക്കുറിച്ച് പരാമർശിച്ചുകൊണ്ട് വി.കെ. ശ്രീകണ്ഠൻ എം.പി. അദ്ദേഹത്തെ കോൺഗ്രസിലേക്ക് പരോക്ഷമായി ക്ഷണിച്ചു. എൻ. ഷംസുദ്ദീൻ എം.എൽ.എയും ശശിയുടെ വെള്ള ഷർട്ടിനെ പ്രശംസിച്ചു. പരിപാടി ഉദ്ഘാടനം ചെയ്ത പ്രതിപക്ഷ ഉപനേതാവ് പി.കെ. കുഞ്ഞാലിക്കുട്ടി, വികസന കാര്യങ്ങളിൽ പി.കെ. ശശിയുടെ പിന്തുണയുണ്ടെന്നും വ്യക്തമാക്കി.

ജില്ലാ നേതൃത്വത്തിന്റെ നിർദ്ദേശപ്രകാരം സി.പി.എം. നേതാക്കളും ആയുർവേദ ഡിസ്പെൻസറി ഉദ്ഘാടന ചടങ്ങിൽ പങ്കെടുത്തിരുന്നു. യു.ഡി.എഫ്. നഗരസഭയുടെ പരിപാടിയിൽ ശശി പങ്കെടുത്തതോടെ സി.പി.എമ്മും ശശിയും തമ്മിൽ കൂടുതൽ അകലുകയും യു.ഡി.എഫും ശശിയും അടുക്കുകയും ചെയ്ത സാഹചര്യത്തിൽ, ശശിയെ കോൺഗ്രസിലേക്ക് ക്ഷണിക്കാൻ പാർട്ടി നേതൃത്വം തീരുമാനമെടുത്തിട്ടുണ്ട്. 

ശശി കോൺഗ്രസിൽ വരികയാണെങ്കിൽ മണ്ണാർക്കാട് അദ്ദേഹത്തെ അനുകൂലിക്കുന്നവരും കൂടെ വരുമെന്നും, അത് തദ്ദേശ തെരഞ്ഞെടുപ്പിൽ ഗുണം ചെയ്യുമെന്നുമാണ് നേതൃത്വത്തിന്റെ വിലയിരുത്തൽ. കെ.പി.സി.സി. പാലക്കാട്ടെ ജില്ലാ കോൺഗ്രസ് നേതൃത്വത്തിന് പി.കെ. ശശിയെ പാർട്ടിയിലേക്ക് കൊണ്ടുവരാൻ പച്ചക്കൊടി കാണിച്ചിട്ടുണ്ട്.

പി.കെ. ശശിയുടെ ഈ നീക്കം കേരള രാഷ്ട്രീയത്തിൽ എന്ത് മാറ്റങ്ങൾ കൊണ്ടുവരും? നിങ്ങളുടെ അഭിപ്രായം പങ്കുവെക്കൂ!

Article Summary: P.K. Sasi's potential move to Congress creates political buzz in Kerala.

#PKSasi #KeralaPolitics #CongressKerala #CPM #PoliticalShift #Palakkad