'ഉണ്ടയില്ലാ വെടിപോലുള്ള ആരോപണങ്ങൾ കൊണ്ട് പാർട്ടിയെ തകർക്കാമെന്ന വ്യാമോഹം വേണ്ട'; പിണറായി വിജയൻ

കണ്ണൂർ: (KVARTHA) ഉണ്ടയില്ലാത്ത വെടിപോലെ അടിസ്ഥാനരഹിതമായ ആരോപണങ്ങള്‍ ഉന്നയിച്ച് പാർട്ടിയെ തകര്‍ത്തുകളയാമെന്ന ദുര്‍മോഹം ആർക്കും വേണ്ടെന്ന് പ്രതിപക്ഷ നേതാവും സി.പി.എം. പൊളിറ്റ്ബ്യൂറോ അംഗവുമായ പിണറായി വിജയന്‍. സി.പി.എം. കണ്ണൂർ ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിൽ നടത്തിയ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ലക്ഷ്യം പ്രസ്ഥാനം; തകർക്കാനാകില്ല

വ്യക്തിപരമായ വിഷയങ്ങള്‍ വാർത്താസമ്മേളനം നടത്തി വിശദീകരിക്കാറില്ലെന്നും, സി.പി.എമ്മിന്റെ സംസ്ഥാന സെക്രട്ടറിയായി പ്രവർത്തിക്കുന്നതിന് മുൻപും പിൻപും പലതരത്തിൽ കടന്നാക്രമങ്ങൾ ഉണ്ടായിട്ടുണ്ടെന്നും അദ്ദേഹം ഓർമ്മിപ്പിച്ചു.

അതൊക്കെ താനെന്ന വ്യക്തിയെ ഉദ്ദേശിച്ചല്ലെന്നും പ്രസ്ഥാനത്തിന് നേരെയുള്ളതാണെന്ന തിരിച്ചറിവാണ് എപ്പോഴുമുള്ളത്. പ്രസ്ഥാനത്തെ തളര്‍ത്താനും തകര്‍ക്കാനും ആകുമോയെന്നാണ് പലരും ശ്രമിച്ചത്. എന്നാൽ ചരിത്രം പരിശോധിച്ചാല്‍ ഒരു ഘട്ടത്തിലും അത്തരം കടന്നാക്രമങ്ങള്‍ക്ക് വിജയിക്കാനായിട്ടില്ല.

2016-ൽ അധികാരത്തില്‍ വന്നപ്പോള്‍ മുതൽ ശക്തമായ ആക്രമണങ്ങൾ നേരിട്ടു. കൊവിഡ് മഹാമാരിക്കാലത്ത് പോലും അതിനെ അട്ടിമറിക്കുന്ന തരത്തിലുള്ള ഇടപെടലുകളുണ്ടായി. ഡാറ്റാ ചോര്‍ത്തൽ, ബിരിയാണി ചെമ്പിലെ സ്വർണക്കടത്ത് തുടങ്ങിയ ആരോപണങ്ങൾ എത്ര ഹീനമാണെന്ന് വ്യക്തമാക്കുന്നതാണ്. ഒരു ആരോപണവും നിയമത്തിന് മുന്നില്‍ നിലനിന്നില്ല. ജനങ്ങള്‍ അതെല്ലാം ചവിട്ടിക്കൂട്ടി ചവറ്റുകൊട്ടയിൽ ഇട്ടതുകൊണ്ടാണ് 2021-ൽ ചരിത്രത്തിലാദ്യമായി ഒരു തുടർഭരണം ജനങ്ങൾ സമ്മാനിച്ചതെന്നും പിണറായി വിജയൻ പറഞ്ഞു.

ഇ.ഡി. ആരോപണങ്ങൾ അസംബന്ധം

പുതിയ വിവാദങ്ങളെയും കേന്ദ്ര ഏജൻസികളുടെ നീക്കങ്ങളെയും അദ്ദേഹം രൂക്ഷമായി വിമർശിച്ചു. തന്റെ മകൾ വീണ ഇ.ഡി.ക്ക് നൽകിയ മൊഴിയിൽ താനും പണം കൈപ്പറ്റിയെന്ന് പറഞ്ഞുവെന്ന ആരോപണം ശുദ്ധ കളവും അസംബന്ധവുമാണെന്ന് അദ്ദേഹം വ്യക്തമാക്കി. വീണയുടെ വീട്ടിൽ നിന്നും യാതൊരുവിധത്തിലുള്ള റെഡ് ഡയറിയോ ബ്ലാക്ക് ബോക്സോ പിടികൂടിയിട്ടില്ലെന്ന് പിണറായി വിജയൻ കൂട്ടിച്ചേർത്തു.

സർക്കാരിനെതിരെ രൂക്ഷവിമർശനം

2021-ൽ എൽ.ഡി.എഫിനെതിരെ ബി.ജെ.പിയും കോൺഗ്രസും ഒന്നിച്ച് വലതുപക്ഷ ശക്തികളായി സംഘടിത ആക്രമണമാണ് നടത്തിയത്. 2026-ൽ യു.ഡി.എഫ് അധികാരത്തിലേറിയതോടെ ഒരു മാറ്റം ഇക്കാര്യങ്ങളിൽ വരുന്നുണ്ടോയെന്ന് സംശയിക്കണം. യു.ഡി.എഫ് സഹകരണത്തോടെയാണ് ബി.ജെ.പി. ആക്രമണം നടത്തിയിരുന്നത്. എന്നാൽ ഇപ്പോൾ സർക്കാരിന്റെ ഔദ്യോഗിക പങ്കാളിത്തം തന്നെ ആവശ്യപ്പെടുന്ന സാഹചര്യമാണുള്ളതെന്നും പിണറായി വിജയൻ കുറ്റപ്പെടുത്തി.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Pinarayi Vijayan dismissed ED allegations against his family as baseless.

#PinarayiVijayan #CPIM #KeralaPolitics #KannurNews #EnforcementDirectorate #MalayalamNews #LDF #Kvartha #AnjanaNews