കേന്ദ്ര അവഗണന കേരളം നേരിടുന്ന ഏറ്റവും വലിയ വിപത്തെന്ന് മുഖ്യമന്ത്രി പിണറായി വിജയൻ; എൽഡിഎഫ് വികസന മുന്നേറ്റ ജാഥ കുമ്പളയിൽ ഉദ്ഘാടനം ചെയ്തു

കാസർകോട്: (KVARTHA) കേരളം ഇന്ന് നേരിടുന്ന ഏറ്റവും ഗുരുതരമായ പ്രശ്നം കേന്ദ്ര സർക്കാരിൻ്റെ അവഗണനയാണെന്ന് മുഖ്യമന്ത്രി പിണറായി വിജയൻ. ഇടതുമുന്നണി സംസ്ഥാന കമ്മിറ്റിയുടെ ആഭിമുഖ്യത്തിൽ സിപിഎം സംസ്ഥാന സെക്രട്ടറി എം വി ഗോവിന്ദൻ മാസ്റ്റർ നയിക്കുന്ന വികസന മുന്നേറ്റ ജാഥ കുമ്പളയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേന്ദ്ര ബജറ്റിൽ കേരളം വലിയ പ്രതീക്ഷകൾ വെച്ചിരുന്നുവെങ്കിലും അതിവേഗ റെയിൽപ്പാത ഉൾപ്പെടെയുള്ള വികസന പദ്ധതികൾ നിഷേധിച്ച് സംസ്ഥാനത്തെ തഴയുകയായിരുന്നുവെന്ന് അദ്ദേഹം ചൂണ്ടിക്കാട്ടി.

പല കിഴക്കൻ സംസ്ഥാനങ്ങൾക്കും അതിവേഗ റെയിൽപ്പാതകൾ അനുവദിച്ചപ്പോൾ കേരളത്തെ കടലാമ സംരക്ഷണം പോലുള്ള നിസ്സാര പദ്ധതികളുടെ പട്ടികയിൽ മാത്രം ഉൾപ്പെടുത്തിയത് വേദനാജനകമാണ്. 'കേരളത്തിന് കേന്ദ്രം കാണുന്ന അയോഗ്യത എന്താണ്?' എന്ന് ചോദിച്ച മുഖ്യമന്ത്രി, ബിജെപിയെ സ്വീകരിക്കാൻ തയ്യാറാകാത്ത ജനത കേരളത്തിലുള്ളതാകാം കേന്ദ്രത്തിൻ്റെ രാഷ്ട്രീയ പകപോക്കലിന് കാരണമെന്ന് അഭിപ്രായപ്പെട്ടു. ലഹളകൾ സൃഷ്ടിച്ച് രാഷ്ട്രീയ നേട്ടം കൊയ്യാൻ ശ്രമിക്കുന്ന ചിലരുടെ നീക്കങ്ങളെ അവഗണിക്കാനാവില്ലെന്നും അദ്ദേഹം മുന്നറിയിപ്പ് നൽകി.

ക്ഷേമ പെൻഷനുകളുടെ കാര്യത്തിൽ യുഡിഎഫ് സ്വീകരിച്ച നിലപാടിനെ മുഖ്യമന്ത്രി രൂക്ഷമായി വിമർശിച്ചു. മുൻ ഭരണകാലത്ത് പെൻഷൻ 500 രൂപയിൽ നിന്ന് വെറും 100 രൂപ വർദ്ധിപ്പിച്ച് 600 ആക്കിയതു മാത്രമാണ് യുഡിഎഫിൻ്റെ സംഭാവനയെന്ന് അദ്ദേഹം പരിഹസിച്ചു. അതേസമയം, കേരളത്തിൽ നിർമ്മാണം പൂർത്തിയായ ദേശീയപാതകളുടെ ഉദ്ഘാടനം ഫെബ്രുവരി മാസത്തിൽ തന്നെ നടത്തുമെന്ന് കേന്ദ്ര ഉപരിതല ഗതാഗത മന്ത്രാലയം അറിയിച്ചതായും മുഖ്യമന്ത്രി വ്യക്തമാക്കി.

കേരള വികസനത്തിൻ്റെ 'മിനിയേച്ചർ' രൂപം ജാഥാ ക്യാപ്റ്റൻ എം വി ഗോവിന്ദൻ മാസ്റ്റർക്ക് കൈമാറിയാണ് മുഖ്യമന്ത്രി ജാഥ ഉദ്ഘാടനം ചെയ്തത്. എം വി ഗോവിന്ദൻ, ബിനോയ് വിശ്വം, ജോസ് കെ മാണി എന്നിവർ നയിക്കുന്ന മൂന്ന് മേഖലാ ജാഥകളാണ് സംസ്ഥാനത്ത് നടക്കുന്നത്. ഇതിൽ ആദ്യ ഘട്ടമായ കാസർകോട്-പാലക്കാട് മേഖലയിലെ യാത്രയാണ് കുമ്പളയിൽ ആരംഭിച്ചത്. സിപിഐ ദേശീയ എക്സിക്യൂട്ടീവ് അംഗം അഡ്വ. പി സന്തോഷ് കുമാർ എംപിയാണ് ജാഥാ മാനേജർ. വിവിധ ഘടകകക്ഷി നേതാക്കളായ കെ എസ് സലീഖ്, മാത്യു കുന്നപ്പള്ളി തുടങ്ങി പത്തോളം സ്ഥിരം അംഗങ്ങൾ ജാഥയിലുണ്ട്. ചടങ്ങിൽ എംഎൽഎ ഇ ചന്ദ്രശേഖരൻ അധ്യക്ഷത വഹിച്ചു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: CM Pinarayi Vijayan inaugurated the LDF Vikasana Munneta Jatha in Kumbla, accusing the Central Government of neglecting Kerala in the Union Budget.

#PinarayiVijayan #LDFVikasanaMunnetaJatha #KeralaPolitics #CentralNeglect #KumblaNews #MVGovindan #KeralaDevelopment #UDFCriticism