കണ്ണൂരിലെ ഭൂമിയേറ്റെടുക്കൽ ദീർഘകാല വികസനത്തിന്; യുഡിഎഫ് സർക്കാർ നടപ്പാക്കുന്നത് ബിജെപി അജണ്ടയെന്ന് പ്രതിപക്ഷ നേതാവ് പിണറായി വിജയൻ

കണ്ണൂർ: (KVARTHA) വികസന പദ്ധതികൾക്കായി കിഫ്ബി വഴി ഭൂമി ഏറ്റെടുത്തത് അതിൻ്റേതായ നിയമങ്ങൾ പാലിച്ചാണെന്നും, ഇന്നത്തെയും നാളത്തെയും മാത്രം വികസനമല്ല ദീർഘ ഭാവി കൂടി മുന്നിൽക്കണ്ടാണ് ഭൂമി ഏറ്റെടുത്തതെന്നും പ്രതിപക്ഷ നേതാവ് പിണറായി വിജയൻ പറഞ്ഞു. സി.പി.എം. കണ്ണൂർ വിപുലീകരിച്ച ജില്ലാ കമ്മിറ്റി യോഗം ജില്ലാ കമ്മിറ്റി ഓഫീസിലെ എ.കെ.ജി. സ്മാരക ഓഡിറ്റോറിയത്തിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ഭാവിയിലെ കാര്യങ്ങൾ കൂടി മുൻകൂട്ടി കണ്ടാണ് ഭരണാധികാരികൾ പ്രവർത്തിക്കേണ്ടത്. കണ്ണൂർ വിമാനത്താവളത്തിന് സമീപം മാത്രമാണ് നിലവിൽ കേരളത്തിൽ കൂടുതൽ ഭൂമി ലഭ്യതയുള്ളത്. അതുകൊണ്ടാണ് അവിടെ കൂടുതൽ ഭൂമി ഏറ്റെടുത്തത്. 

കണ്ണൂർ എന്ന് കേൾക്കുമ്പോൾ എന്തിനാണ് ഇപ്പോഴത്തെ മുഖ്യമന്ത്രിയുൾപ്പെടെയുള്ളവർ ഇത്രയേറെ വിഷമിക്കുന്നതെന്നും അദ്ദേഹം ചോദിച്ചു. വിമാനത്താവളം, തുറമുഖം എന്നിവയുള്ള ജില്ല എന്നതിനാൽ കണ്ണൂരിൽ ഏറെ വികസന സാധ്യതയുണ്ട്. ഇക്കാര്യം മുന്നിൽക്കണ്ടാണ് ഭൂമി ഏറ്റെടുത്തത്.

വിവാദങ്ങൾക്ക് പിന്നിൽ അജണ്ട

നേരത്തെ മെട്രോ റെയിൽ, വാട്ടർ മെട്രോ, ഇൻഫോപാർക്ക് എന്നിവയ്ക്കായി കൊച്ചിയിലും തിരുവനന്തപുരത്തുമൊക്കെ സ്ഥലം ഏറ്റെടുത്തപ്പോഴൊന്നും ഉയരാത്ത ചോദ്യങ്ങളാണ് ഇപ്പോൾ ചിലർ ഉയർത്തുന്നത്. കണ്ണൂർ കേരളത്തിൻ്റെ ഭാഗമല്ലേയെന്നും പ്രതിപക്ഷ നേതാവ് ചോദിച്ചു. 

കണ്ണൂരിൽ ഭൂമി ഏറ്റെടുത്തതുമായി ബന്ധപ്പെട്ട് വിമർശനം ഉയർത്തുന്നവർക്ക് ഇക്കാര്യങ്ങൾ അറിയാഞ്ഞിട്ടല്ല. മനഃപൂർവം വിവാദങ്ങൾ ഉണ്ടാക്കാൻ ശ്രമിക്കുകയാണ്. ഇക്കാര്യത്തിൽ നിഷ്പക്ഷ മാധ്യമങ്ങൾ എന്നവകാശപ്പെടുന്നവരും മൗനം പാലിക്കുകയാണ്. ഇതിനു പിന്നിൽ പ്രത്യേക അജണ്ടയുണ്ടെന്നും അദ്ദേഹം ആരോപിച്ചു.

യു.ഡി.എഫ്. നടപ്പാക്കുന്നത് ബി.ജെ.പി. അജണ്ട

എസ്.ഐ.ആറിലൂടെ ജനാധിപത്യം അട്ടിമറിക്കാൻ ശ്രമിച്ച മുഖ്യ തെരഞ്ഞെടുപ്പ് കമ്മീഷണർക്കെതിരെയുള്ള പ്രക്ഷോഭം ശക്തമാണ്. ബി.ജെ.പി-സംഘപരിവാറിനു വേണ്ടി പ്രവർത്തിച്ച ഗ്യാനേഷ് കുമാറിനെ സംരക്ഷിക്കാനാണ് ബി.ജെ.പി. ശ്രമിക്കുന്നത്. എന്നാൽ എത്രതന്നെ സംരക്ഷിക്കാൻ ശ്രമിച്ചാലും അത് നടക്കില്ല. ജനങ്ങളുടെ കരുത്താണ് പരമപ്രധാനം. ഗ്യാനേഷ് കുമാറിനെതിരെ ബി.ജെ.പിയും സംഘപരിവാർ ബന്ധമുള്ള സംഘടനകളും ഒഴികെ മറ്റുള്ളവരെല്ലാം സമരത്തിലാണ്. ഇവരെ ഏകോപിപ്പിച്ച് സമരം നടത്തുന്നതിൽ സി.പി.എം. ഫലപ്രദമായി പ്രവർത്തിക്കുന്നുണ്ടെന്നും അദ്ദേഹം പറഞ്ഞു.

കേരളത്തിൽ യു.ഡി.എഫ്. സർക്കാർ ബി.ജെ.പി. അജണ്ടയാണ് നടപ്പാക്കാൻ ശ്രമിക്കുന്നത്. എൽ.ഡി.എഫ്. സർക്കാരിൻ്റെ കാലത്ത് കേരളത്തിൽ പി.എം. ശ്രീ പദ്ധതി നടപ്പാക്കാൻ ശ്രമിച്ചപ്പോൾ അന്ന് അതിനെ എതിർത്തിരുന്നു. എന്നാൽ ഇപ്പോൾ യു.ഡി.എഫ്. സർക്കാർ തികച്ചും ബി.ജെ.പി. അനുകൂല നിലപാടാണ് പുലർത്തുന്നത്. പുതിയ സർക്കാരിൻ്റെ സത്യപ്രതിജ്ഞാ ചടങ്ങിൽ വന്ദേമാതരം പൂർണമായി ആലപിച്ചത് മുതൽ ഇത് പ്രകടമാണെന്നും അദ്ദേഹം കൂട്ടിച്ചേർത്തു.

തിരിച്ചടികളെ മറികടക്കും

കേരളത്തിലെ നിയമസഭാ തെരഞ്ഞെടുപ്പിൽ സി.പി.എമ്മിനുണ്ടായ പരാജയത്തിനെ വലതുപക്ഷ ശക്തികൾ പാർട്ടിയുടെ വലിയ തകർച്ചയായാണ് പ്രചരിപ്പിച്ചത്. എന്നാൽ തെരഞ്ഞെടുപ്പ് വിജയത്തിൽ മതിമറന്ന് ആഹ്ലാദിക്കുകയോ തോൽവിയിൽ നിരാശയിലാകുകയോ ചെയ്യുന്ന പാർട്ടിയല്ല സി.പി.എം. തെറ്റുകൾ സംഭവിച്ചിട്ടുണ്ടെങ്കിൽ അത് പൂർണമായും തിരുത്തി മുന്നോട്ട് പോകും. ആ രീതിയിലാണ് പാർട്ടി പ്രവർത്തിച്ചു വന്നത്.

തിരിച്ചടികൾ മറികടക്കാമെന്ന് വലിയ ആത്മവിശ്വാസം പാർട്ടിക്കുണ്ട്. അടുത്തിടെ നടന്ന തദ്ദേശ ഉപതെരഞ്ഞെടുപ്പ് ഫലം സി.പി.എമ്മിനെ എഴുതിത്തള്ളാമെന്ന് പറഞ്ഞവരെ അമ്പരപ്പിച്ചിട്ടുണ്ടെന്നും പ്രതിപക്ഷ നേതാവ് പിണറായി വിജയൻ വ്യക്തമാക്കി.

ഈ രാഷ്ട്രീയ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: Leader of Opposition Pinarayi Vijayan defended the land acquisition in Kannur through KIIFB, stating it was done with long-term development goals in mind. Inaugurating the CPI(M) Kannur expanded district committee meeting, he questioned why such acquisitions draw criticism only in Kannur, unlike Kochi or Thiruvananthapuram. 

#Kvartha #PinarayiVijayan #CPIMKerala #KannurNews #KeralaPolitics #KIIFB #UDFGovernment #BJP #MalayalamNews #PoliticalNews #AmmuNews