സുപ്രീം കോടതിയിലെ ചെരുപ്പേറ് ഭരണഘടനയ്ക്ക് നേരെ; തദ്ദേശ തിരഞ്ഞെടുപ്പിൽ എൽഡിഎഫുമായി ധാരണയിലെന്ന് പിഡിപി

കണ്ണൂർ: (KVARTHA) വരുന്ന തദ്ദേശ സ്വയംഭരണ തെരഞ്ഞെടുപ്പിൽ എൽഡിഎഫുമായി ധാരണ നിലനിർത്തി പരമാവധി വാർഡുകളിൽ മത്സരിക്കുമെന്ന് പിഡിപി സംസ്ഥാന വൈസ് ചെയർമാൻ മുഹമ്മദ് ബിലാൽ. കണ്ണൂരിൽ വെച്ച് നടത്തിയ വാർത്താ സമ്മേളനത്തിലാണ് അദ്ദേഹം ഇക്കാര്യം അറിയിച്ചത്. സുപ്രീം കോടതി ചീഫ് ജസ്റ്റിസ് ബി.ആർ. ഗവായ്ക്ക് നേരെയുണ്ടായ ചെരുപ്പേറ് ഇന്ത്യൻ ഭരണഘടനയ്ക്കും നീതിന്യായ വ്യവസ്ഥയ്ക്കും നേരെയുള്ള ആക്രമണമാണെന്നും മുഹമ്മദ് ബിലാൽ അഭിപ്രായപ്പെട്ടു.

അതേസമയം, ചെരുപ്പേറ് യാഥാർത്ഥത്തിൽ ചീഫ് ജസ്റ്റിസിനെതിരെയല്ല, മറിച്ച് ഇന്ത്യൻ ഭരണഘടനയ്ക്കും നീതിന്യായ വ്യവസ്ഥയ്ക്കും നേരെയുള്ള ആക്രമണമാണെന്ന് പിഡിപി നേതാക്കൾ ചൂണ്ടിക്കാട്ടി. സുഘ് പരിവാർ പ്രചരിപ്പിക്കുന്ന വിദ്വേഷ രാഷ്ട്രീയത്തിൻ്റെ പ്രതിഫലനമാണ് കഴിഞ്ഞ ദിവസം സുപ്രീം കോടതി ചീഫ് ജസ്റ്റിസിനു നേരെയുണ്ടായ ആക്രമണം എന്നും അദ്ദേഹം പറഞ്ഞു. തങ്ങൾക്ക് അനിഷ്ടകരമായ അഭിപ്രായം ആരു പറഞ്ഞാലും അവരെ ഇല്ലായ്മ ചെയ്യുകയെന്ന ഫാസിസ്റ്റ് നിലപാട് എല്ലാ മേഖലയിലും നടമാടുകയാണ്.

എൽഡിഎഫുമായി തെരഞ്ഞെടുപ്പ് ധാരണ

വരുന്ന തദ്ദേശ സ്വയംഭരണ സ്ഥാപന തെരഞ്ഞെടുപ്പിൻ്റെ മുന്നൊരുക്ക പ്രവർത്തനങ്ങളുടെ ഭാഗമായി സംസ്ഥാനമാകെ പരമാവധി വാർഡുകളിൽ മത്സരിക്കും. ഈ തെരഞ്ഞെടുപ്പിൽ എൽഡിഎഫുമായി തെരഞ്ഞെടുപ്പ് ധാരണ നിലനിർത്തുമെന്നും മുഹമ്മദ് ബിലാൽ അറിയിച്ചു. ഇതിൻ്റെ ഭാഗമായി ഈ മാസം 14 വരെ സംസ്ഥാനത്തെ പഞ്ചായത്തുകളിൽ പാർട്ടി നേതാക്കൾ സമ്പർക്ക യാത്ര നടത്തിവരികയാണെന്നും അദ്ദേഹം കൂട്ടിച്ചേർത്തു.

ഇന്ത്യൻ സ്വാതന്ത്ര്യ സമര കാലത്ത് ബ്രിട്ടീഷുകാരുടെ പാദസേവകരായി കഴിഞ്ഞവർ ഇപ്പോഴും അതു തുടരുന്നുവെന്നാണ് ചെരുപ്പേറിലൂടെ പ്രതിഫലിക്കുന്നത്. ഇത്തരത്തിൽ ഭരണഘടനാ സ്ഥാപനങ്ങളെ ഇല്ലാതാക്കാനുള്ള ഫാസിസ്റ്റ് ശക്തികളുടെ ശ്രമങ്ങളെ ചെറുത്തുതോൽപ്പിക്കുമെന്നും പിഡിപി നേതൃത്വം വ്യക്തമാക്കി. വാർത്താ സമ്മേളനത്തിൽ അജിത്ത് കുമാർ, ആസാദ് ഹുസൈൻ കാടാമ്പുഴ, സുബൈർ പുഞ്ചവയൽ, ഷാജഹാൻ കീഴ്പ്പള്ളി എന്നിവർ പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: PDP condemns attack on Supreme Court CJ, links it to fascism, and confirms alliance with LDF for local body polls.

#PDP #LDF #LocalBodyPolls #SupremeCourt #IndianConstitution #KeralaPolitics