രാഷ്ട്രീയത്തിൻ്റെ ക്രിമിനൽവൽക്കരണത്തിനെതിരെ ജനങ്ങളുടെ ധൈര്യമാണ് ജനാധിപത്യം; പയ്യന്നൂരിൽ പൗരാവകാശ സമ്മേളനം ഉദ്ഘാടനം ചെയ്ത് എം എൻ കാരശ്ശേരി; സമാധാനത്തിനായി ഒപ്പുചാർത്തി പൗരസമൂഹം

പയ്യന്നൂർ: (KVARTHA) രാജഭരണത്തിൽ പോലുമില്ലാത്ത തരത്തിൽ അക്രമ പരമ്പരകൾ അരങ്ങേറുമ്പോൾ അതിനെ ചെറുക്കാൻ ജനങ്ങൾ ധൈര്യത്തോടെ മുന്നോട്ടുവരണമെന്ന് പ്രശസ്ത സാംസ്കാരിക പ്രവർത്തകനും എഴുത്തുകാരനുമായ എം എൻ കാരശ്ശേരി അഭിപ്രായപ്പെട്ടു. 

രാഷ്ട്രീയത്തിൻ്റെ ക്രിമിനൽവൽക്കരണത്തിനും ജനാധിപത്യാവകാശ നിഷേധത്തിനുമെതിരെ പയ്യന്നൂരിൽ സംഘടിപ്പിച്ച പൗരാവകാശ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പയ്യന്നൂരിൻ്റെ സമാധാന അന്തരീക്ഷം വീണ്ടെടുക്കുക എന്ന ലക്ഷ്യത്തോടെയാണ് സാംസ്കാരിക പ്രമുഖരുടെ നേതൃത്വത്തിൽ സമ്മേളനം നടന്നത്.

പത്മശ്രീ വി പി അപ്പുക്കുട്ട പൊതുവാൾ നൽകിയ സമാധാന സന്ദേശം സമ്മേളനത്തിൽ വായിച്ചു. പൗരാവകാശത്തിൻ്റെ പേരിൽ ഇത്തരമൊരു സദസ്സിൽ സംസാരിക്കേണ്ടി വരുന്നതിൽ ഖേദമുണ്ടെന്ന് എം എൻ കാരശ്ശേരി പറഞ്ഞു. കഴിഞ്ഞ 66 കൊല്ലമായി രാജ്യത്തെ ജനാധിപത്യത്തിൻ്റെ പ്രവർത്തനങ്ങളെ ശ്രദ്ധിച്ചുകൊണ്ടിരിക്കുന്ന ഒരു ജനാധിപത്യ പ്രേമിയാണ് താൻ. വീഴ്ചകൾ പലതുമുണ്ടെങ്കിലും ലോകരാഷ്ട്രങ്ങളുടെ മുൻനിരയിലെത്താനുള്ള എല്ലാ സാഹചര്യങ്ങളും ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യക്കുണ്ടെന്നും അദ്ദേഹം ഓർമ്മിപ്പിച്ചു.

ഇവിടെ കക്ഷിരാഷ്ട്രീയം ജനങ്ങൾക്കിടയിൽ ഭിന്നതകളെ വളർത്തുന്നുണ്ടോ എന്ന് സംശയിക്കേണ്ടിയിരിക്കുന്നു. അത്തരം ഭിന്നതകളെ അതിജീവിക്കാൻ വേണ്ട ഐക്യ നിർമ്മാണത്തിലായിരിക്കണം ഭാവിയിൽ നമ്മുടെ ശ്രദ്ധ കേന്ദ്രീകരിക്കേണ്ടത്. 

രാഷ്ട്രീയമായ അഭിപ്രായവ്യത്യാസങ്ങൾ ഒരു കാരണവശാലും അക്രമപ്രവർത്തനങ്ങളിലേക്ക് നീങ്ങാൻ അനുവദിക്കരുത്. രാഷ്ട്രീയത്തിൻ്റെ ക്രിമിനൽവൽക്കരണത്തെ ജനങ്ങളുടെ ധൈര്യം കൊണ്ടാണ് നേരിടേണ്ടതെന്നും എം എൻ കാരശ്ശേരി വ്യക്തമാക്കി.

പൗരാവകാശ സംരക്ഷണ സമിതി വൈസ് ചെയർമാൻ ഗാന്ധിയൻ കെ വി രാഘവൻ മാസ്റ്റർ സമ്മേളനത്തിൽ അധ്യക്ഷത വഹിച്ചു. ഗാന്ധിയനും സമാധാന പ്രവർത്തകനുമായ ഡോ. പി വി രാജഗോപാൽ, ഡോ. എം പി മത്തായി, ഡോ. എ കെ രാമകൃഷ്ണൻ, വി എസ് അനിൽകുമാർ എന്നിവർ സംസാരിച്ചു. 

എൻ സുബ്രഹ്മണ്യൻ സമ്മേളനത്തിൽ പ്രമേയം അവതരിപ്പിച്ചു. പയ്യന്നൂരിൽ സമാധാനത്തിൻ്റെയും സൗഹൃദത്തിൻ്റെയും അന്തരീക്ഷം നിലനിർത്താനും നിർഭയമായ രാഷ്ട്രീയ പ്രവർത്തന സ്വാതന്ത്ര്യം ഉറപ്പുവരുത്താനും രാഷ്ട്രീയ പാർട്ടികളും നിയമപാലകരും സിവിൽസമൂഹവും ഒത്തൊരുമിച്ച് പ്രവർത്തിക്കണമെന്ന് സമ്മേളനം ആഹ്വാനം ചെയ്തു.

സമ്മേളനത്തിൽ പങ്കെടുത്തവർ പയ്യന്നൂരിൻ്റെ സമാധാനത്തിനായി തയ്യാറാക്കിയ കാൻവാസിൽ ഒപ്പ് രേഖപ്പെടുത്തി. ഗണേഷ് കുമാർ കുഞ്ഞിമംഗലം, വി സി ബാലകൃഷ്ണൻ, നാരായണൻ വട്ടോളി, സതീഷ് കുമാർ പി, കെ സുനിൽ കുമാർ, അഡ്വ. കെ പി ലക്ഷ്മണൻ, ശരണ്യ എം., അഡ്വ. ടി വി രാജേന്ദ്രൻ, കെ പി രാമചന്ദ്രൻ, കെ രാജീവ് കുമാർ, ഡോ. സ്മിത പി കുമാർ, എം സുൽഫത്ത്, സി ശശി, കെ ഇ കരുണാകരൻ, കെ പി വിനോദ് തുടങ്ങിയവർ ചർച്ചകളിൽ പങ്കെടുത്തു സംസാരിച്ചു.

രാഷ്ട്രീയ അക്രമങ്ങൾക്കെതിരെ ജനങ്ങൾ ധൈര്യത്തോടെ പ്രതികരിക്കേണ്ട സമയം അതിക്രമിച്ചോ? സമാധാനപരമായ രാഷ്ട്രീയ പ്രവർത്തനത്തിൻ്റെ പ്രാധാന്യത്തെക്കുറിച്ചുള്ള നിനിങ്ങളുടെ അഭിപ്രായം ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്. ഈ വാർത്ത ഷെയർ ചെയ്യൂ.

Article Summary: M.N. Karassery addressed a civil rights convention in Payyanur against political criminalization and violence.

#PayyanurNews #Karassery #CivilRights #PoliticalViolence #PeaceMission #DemocracyIndia #KeralaPolitics #HumanRights #BreakingNews #AppukuttaPoduval