പയ്യന്നൂരിൽ സിപിഎം വിഭാഗീയത തെരുവിലേക്ക്; എംഎൽഎക്കെതിരെ ആരോപണം ഉന്നയിച്ച വി കുഞ്ഞികൃഷ്ണന് വി എസിന്റെ ചിത്രത്തിനൊപ്പം പിന്തുണ

പയ്യന്നൂർ: (KVARTHA) ധനരാജ് രക്തസാക്ഷി ഫണ്ട് തിരിമറി വിവാദത്തെത്തുടർന്ന് പയ്യന്നൂരിൽ സിപിഎം വിഭാഗീയത തെരുവുയുദ്ധത്തിലേക്ക് നീങ്ങുന്നു. സാമ്പത്തിക ക്രമക്കേട് ആരോപിച്ച് ടി.ഐ മധുസൂദനൻ എംഎൽഎക്കെതിരെ പരസ്യമായി രംഗത്തുവന്ന സിപിഎം കണ്ണൂർ ജില്ലാ കമ്മിറ്റി അംഗം വി. കുഞ്ഞികൃഷ്ണന് പിന്തുണയുമായി നഗരത്തിൽ ഫ്ലക്സ് ബോർഡുകൾ പ്രത്യക്ഷപ്പെട്ടു. 

പയ്യന്നൂർ നഗരസഭാ പരിധിയിലെ തായിനേരിയിലാണ് വി.എസ് അച്യുതാനന്ദന്റെയും വി. കുഞ്ഞികൃഷ്ണന്റെയും ചിത്രങ്ങൾ ഉൾക്കൊള്ളിച്ച ബോർഡുകൾ സ്ഥാപിച്ചിരിക്കുന്നത്.

പോസ്റ്റർ യുദ്ധം മുറുകുന്നു

'നിങ്ങൾ കാട്ടിയ പാതയിലൂടെ മുന്നോട്ട് ഇനിയും മുന്നോട്ട്' എന്ന വാചകമാണ് കുഞ്ഞികൃഷ്ണനെ അനുകൂലിച്ചുള്ള ബോർഡിൽ രേഖപ്പെടുത്തിയിരിക്കുന്നത്. ധനരാജ് രക്തസാക്ഷി ഫണ്ടിൽ ക്രമക്കേട് നടന്നുവെന്ന വിവരം മാധ്യമങ്ങളിലൂടെ വെളിപ്പെടുത്തിയതിന് പിന്നാലെ, വി. കുഞ്ഞികൃഷ്ണനെ 'ഒറ്റുകാരനായി' ചിത്രീകരിച്ച് പയ്യന്നൂർ നഗരസഭയുടെ വിവിധ ഭാഗങ്ങളിൽ സിപിഎം ഔദ്യോഗിക പക്ഷം ഫ്ലക്സ് ബോർഡുകൾ സ്ഥാപിച്ചിരുന്നു. 

ഇതിന് ശക്തമായ മറുപടിയെന്നോണമാണ് ഇപ്പോൾ തായിനേരിയിൽ അദ്ദേഹത്തെ അനുകൂലിക്കുന്ന വിഭാഗം പുതിയ ബോർഡുകൾ ഉയർത്തിയിരിക്കുന്നത്. ഇതോടെ പാർട്ടിക്കുള്ളിലെ ചേരിപ്പോര് പരസ്യമായ പോസ്റ്റർ യുദ്ധത്തിലേക്ക് വഴിമാറിയിരിക്കുകയാണ്.

വിവാദത്തിന്റെ തുടക്കം

ഡിവൈഎഫ്ഐ നേതാവായിരുന്ന പയ്യന്നൂർ കുന്നരുവിലെ ധനരാജിന്റെ രക്തസാക്ഷി ഫണ്ടിൽ വൻ തിരിമറി നടന്നുവെന്ന് സിപിഎം കണ്ണൂർ ജില്ലാ കമ്മിറ്റിയംഗമായ വി. കുഞ്ഞികൃഷ്ണൻ കഴിഞ്ഞ ദിവസം മാധ്യമങ്ങളിലൂടെ ആരോപിച്ചിരുന്നു. ടി.ഐ മധുസൂദനൻ എംഎൽഎക്കെതിരെയായിരുന്നു പ്രധാന ആരോപണം. ഇത് ജില്ലയിൽ വലിയ രാഷ്ട്രീയ വിവാദങ്ങൾക്ക് തിരികൊളുത്തി.

സംഘർഷവും പൊലീസ് കേസും

അഴിമതി ആരോപണവിധേയനായ എംഎൽഎ രാജിവെക്കണമെന്നാവശ്യപ്പെട്ട് കോൺഗ്രസും ബിജെപിയും എംഎൽഎ ഓഫീസിലേക്ക് നടത്തിയ പ്രതിഷേധ മാർച്ചുകൾ പയ്യന്നൂരിൽ വലിയ സംഘർഷത്തിന് വഴിവെച്ചിരുന്നു. 

പ്രതിഷേധ മാർച്ചിനെ സിപിഎം പ്രവർത്തകർ കായികമായി നേരിട്ടതാണ് സംഘർഷത്തിന് കാരണമായത്. അക്രമസംഭവങ്ങളിൽ നിരവധി പേർക്ക് പരിക്കേറ്റിരുന്നു.

സംഭവവുമായി ബന്ധപ്പെട്ട് ഇരുന്നുറോളം പേർക്കെതിരെ പയ്യന്നൂർ പൊലീസ് കേസെടുത്തിട്ടുണ്ട്. പ്രതിഷേധക്കാരെ ആക്രമിച്ച സിപിഎം പ്രവർത്തകർക്കെതിരെയും, ഗതാഗതം തടസ്സപ്പെടുത്തി മാർച്ച് നടത്തിയതിന് കോൺഗ്രസ്, ബിജെപി പ്രവർത്തകർക്കെതിരെയുമാണ് കേസ്.

അതേസമയം, തനിക്കെതിരെ അക്രമ ഭീഷണി നിലനിൽക്കുന്നുണ്ടെന്ന് വി. കുഞ്ഞികൃഷ്ണൻ പ്രതികരിച്ചു. സത്യം തുറന്നുപറഞ്ഞതിന്റെ പേരിൽ ആരെങ്കിലും തന്നെ അപായപ്പെടുത്തുമെന്ന് ഭയമില്ലെന്നും അദ്ദേഹം വ്യക്തമാക്കി. സിപിഎമ്മിന്റെ ശക്തികേന്ദ്രമായ പയ്യന്നൂരിൽ വിഭാഗീയത തെരുവിലെത്തിയത് നേതൃത്വത്തിന് വലിയ തലവേദനയായിട്ടുണ്ട്.

ഈ വാർത്ത വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Factionalism within CPM in Payyannur escalates as flux boards supporting V. Kunhikrishnan appear featuring V.S. Achuthanandan's image. This comes as a counter to official faction's posters calling him a traitor over Dhanraj martyr fund allegations.

#Payyannur #CPM #VKunhikrishnan #VSAchyuthanandan #KannurPolitics #KeralaNews #PosterWar