'ഒറ്റുകാരുടേതല്ല പോരാളികളുടേതാണ് ചരിത്രം'; സിപിഎം നേതൃത്വത്തിനെതിരെ ബാനറുമായി 'പയ്യന്നൂർ സഖാക്കൾ'

കണ്ണൂർ: (KVARTHA) നിയമസഭാ തിരഞ്ഞെടുപ്പ് ആസന്നമായിരിക്കെ പയ്യന്നൂരിൽ വിഭാഗീയത കൊടുമ്പിരിക്കൊള്ളുന്നത് സി.പി.എം നേതൃത്വത്തിന് വലിയ തലവേദനയാകുന്നു. പയ്യന്നൂരിൽ തുടർച്ചയായി രണ്ടാം ദിനവും സി.പി.എം നേതൃത്വത്തിനെതിരെ വീണ്ടും ബാനറുകൾ ഉയർന്നു.

'ഒറ്റുകാരുടേതല്ല പോരാളികളുടേതാണ് ചരിത്രം - പയ്യന്നൂർ സഖാക്കൾ' എന്നാണ് പുതിയ ബാനറിൽ എഴുതിയിരിക്കുന്നത്. തായിനേരി കുറിഞ്ഞി റോഡിൽ സൂര്യൻ മുക്കിലാണ് റോഡിന് കുറുകെ വലിയ ബാനർ വലിച്ചുകെട്ടിയത്.

തുടർച്ചയായ പോസ്റ്റർ പ്രതിഷേധം

തിങ്കളാഴ്ചയും നേതൃത്വത്തിനെതിരെ പോസ്റ്ററുകൾ പ്രത്യക്ഷപ്പെട്ടിരുന്നു. 'കള്ളന്മാർക്കും അടിമകൾക്കും പ്രവേശനമില്ല' എന്നായിരുന്നു ഈ പോസ്റ്ററുകളിലെ ഉള്ളടക്കം. 'കാരയിലെ സഖാക്കൾ' എന്ന പേരിലായിരുന്നു അന്ന് പോസ്റ്ററുകൾ പതിപ്പിച്ചത്. പാർട്ടി പ്രവർത്തകർ ഇടപെട്ട് ഇവ പിന്നീട് അഴിച്ചുനീക്കിയിരുന്നു.

വികസന ജാഥയ്ക്ക് മുൻപേ പടയൊരുക്കം

പയ്യന്നൂർ എം.എൽ.എ ടി.ഐ മധുസൂദനൻ ഫെബ്രുവരി 13 മുതൽ 16 വരെ മണ്ഡലത്തിൽ വികസന മുന്നേറ്റ ജാഥ നടത്തുന്നുണ്ട്. ജാഥ പ്രഖ്യാപിച്ചതിന് പിന്നാലെയാണ് പയ്യന്നൂരിൽ പോസ്റ്ററുകൾ പ്രത്യക്ഷപ്പെട്ടു തുടങ്ങിയത് എന്നത് ശ്രദ്ധേയമാണ്.

വിഭാഗീയ പ്രശ്നം നിലനിൽക്കുന്ന പയ്യന്നൂർ കാരയിൽ പാർട്ടി അനുനയ നീക്കം നടത്തിയെങ്കിലും മുൻ ഏരിയ സെക്രട്ടറി വി. കുഞ്ഞികൃഷ്ണന്റെ പുസ്തക പ്രകാശനത്തോടെ കാര്യങ്ങൾ കൂടുതൽ വഷളാകുകയായിരുന്നു.

ഫണ്ട് വിവാദവും വി. കുഞ്ഞികൃഷ്ണനും

കാരയിലെ പാർട്ടി അനുഭാവികൾക്കിടയിൽ വി. കുഞ്ഞികൃഷ്ണന് വലിയ പിന്തുണയുണ്ട്. 'കാരയിലെ സഖാക്കൾ' എന്ന ഫേസ്ബുക്ക് പേജിലൂടെയും പാർട്ടി നേതൃത്വത്തിനെതിരെ രൂക്ഷമായ പ്രചാരണം നടക്കുന്നുണ്ട്.

വി. കുഞ്ഞികൃഷ്ണൻ ആരോപണമുന്നയിച്ച ധനരാജ് രക്തസാക്ഷി ഫണ്ട് തട്ടിപ്പുമായി ബന്ധപ്പെട്ട് കൃത്യമായ മറുപടി നൽകാൻ സി.പി.എം നേതൃത്വത്തിന് സാധിക്കാത്തതാണ് വിഭാഗീയത രൂക്ഷമാക്കുന്നത്. പയ്യന്നൂരിൽ ടി.ഐ മധുസൂദനൻ തന്നെ വീണ്ടും മത്സരിക്കുമെന്ന് ഏറക്കുറെ ഉറപ്പായ സാഹചര്യത്തിൽ, അദ്ദേഹത്തിനെതിരെ ഫണ്ട് വിവാദം ആയുധമാക്കുകയാണ് ഒരു വിഭാഗം. കുഞ്ഞികൃഷ്ണന്റെ പുസ്തക പ്രകാശന ചടങ്ങിലും കാരയിൽ നിന്നുള്ള നിരവധി പ്രവർത്തകർ പങ്കെടുത്തിരുന്നു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Factionalism in Payyannur CPM escalates as fresh banners against the leadership surface ahead of MLA T.I. Madhusoodanan's march.

#PayyannurCPM #Factionalism #KannurPolitics #TIMadhusoodanan #VKunjikrishnan #KeralaElections #CPMProtest #KVARTHA