ബിജെപിയെ തോൽപ്പിക്കാൻ ഒവൈസിയെ കൂടെക്കൂട്ടാനാവില്ല! കോൺഗ്രസ് - ആർജെഡിയുടെ മണ്ടത്തരം ചർച്ചയാകുന്നു! വോട്ടുകൾ ചിതറുമോ?

പട്‌ന: (KVARTHA) ഒവൈസിയുടെ 'ഗ്രാൻഡ് ഡെമോക്രാറ്റിക് അലയൻസ്' ബിഹാറിൽ 63% പിന്നോക്ക വോട്ടുകൾ ചിതറാനുള്ള സാധ്യതയിൽ ഇന്ത്യാ മുന്നണിക്ക് ആശങ്ക. ബിഹാർ നിയമസഭാ തിരഞ്ഞെടുപ്പിന് മുന്നോടിയായി, അസദുദ്ദീൻ ഒവൈസിയുടെ എ.ഐ.എം.ഐ.എം. (AIMIM) നേതൃത്വത്തിൽ 'ഗ്രാൻഡ് ഡെമോക്രാറ്റിക് അലയൻസ്' എന്ന പേരിൽ പുതിയ മൂന്നാം മുന്നണി രൂപീകരിച്ചത് സംസ്ഥാന രാഷ്ട്രീയത്തിൽ കനത്ത വെല്ലുവിളിയുയർത്തുന്നു. ചന്ദ്രശേഖർ ആസാദിൻ്റെ ആസാദ് സമാജ് പാർട്ടിയും സ്വാമി പ്രസാദ് മൗര്യയുടെ അഗ്നി ജനതാ പാർട്ടിയും ചേർന്നാണ് ഈ പുതിയ സഖ്യം നിലവിൽ വന്നിട്ടുള്ളത്. ഇതോടെ പിന്നോക്ക, ന്യൂനപക്ഷ വോട്ടുകൾ ചിതറിപ്പോകാനുള്ള സാധ്യത വർദ്ധിച്ചു.

മുന്നണിയുടെ ഘടനയും ലക്ഷ്യവും

പുതിയ മുന്നണിയിൽ 64 സീറ്റുകളിലാണ് ധാരണയായിട്ടുള്ളത്. ഇതിൽ എ.ഐ.എം.ഐ.എം. 35 സീറ്റുകളിലും, ആസാദ് സമാജ് പാർട്ടി 25 സീറ്റുകളിലും, അഗ്നി ജനതാ പാർട്ടി നാല് സീറ്റുകളിലും മത്സരിക്കും. ദളിതർ, പിന്നോക്ക വിഭാഗക്കാർ, ന്യൂനപക്ഷങ്ങൾ എന്നിവർക്ക് വേണ്ടി നിലകൊള്ളുക എന്നതാണ് മുന്നണിയുടെ പ്രഖ്യാപിത ലക്ഷ്യം. ബിഹാറിലെ ആകെ ജനസംഖ്യയിൽ ദളിതർ 20 ശതമാനം, ഒ.ബി.സി. വിഭാഗക്കാർ 27 ശതമാനം, ഈ.ബി.സി. (Extremely Backward Classes) വിഭാഗക്കാർ 36 ശതമാനം എന്നിങ്ങനെയാണ് കണക്കുകൾ. അതായത്, 63 ശതമാനത്തോളം വരുന്ന പിന്നോക്ക വിഭാഗങ്ങളും 18 ശതമാനത്തോളം വരുന്ന മുസ്ലിങ്ങൾ ഉൾപ്പെടെയുള്ള ന്യൂനപക്ഷങ്ങളുമാണ് ഒവൈസി മുന്നണിയുടെ പ്രധാന വോട്ട് ബാങ്ക്. ഈ ലക്ഷ്യം ഇന്ത്യാ മുന്നണിയുടെ പരമ്പരാഗത വോട്ട് അടിത്തറയെയാണ് തകർക്കാൻ ഒരുങ്ങുന്നത്.

ഇന്ത്യാ മുന്നണിയുടെ 'രാഷ്ട്രീയ മണ്ടത്തരം'

ബി.ജെ.പി. വിരുദ്ധ വോട്ടുകൾ ഭിന്നിക്കുന്നതിൻ്റെ പൂർണ്ണ ഉത്തരവാദിത്തം ഇന്ത്യാ മുന്നണിക്കാണെന്ന് രാഷ്ട്രീയ നിരീക്ഷകർ വിലയിരുത്തുന്നു. 243 സീറ്റുകളുള്ള ബിഹാറിൽ തനിക്ക് ആറ് സീറ്റുകൾ മാത്രം നൽകിയാൽ മതിയെന്ന് ഒവൈസി കഴിഞ്ഞ മൂന്ന് മാസമായി നിരന്തരം ഇന്ത്യാ മുന്നണിയോട് പരസ്യമായി അഭ്യർത്ഥിച്ചിരുന്നു. 2020-ലെ തിരഞ്ഞെടുപ്പിൽ 20 സീറ്റുകളിൽ മത്സരിച്ച് എ.ഐ.എം.ഐ.എം. അഞ്ച് സീറ്റുകളിൽ വിജയിച്ചിരുന്നു എന്ന പശ്ചാത്തലത്തിലും, ആർ.ജെ.ഡി.യിലെയും കോൺഗ്രസ്സിലെയും ഉന്നത നേതാക്കൾ ഒവൈസിയെ തഴയുകയായിരുന്നു.

പ്രതികരണമെന്ന നിലയിൽ, ആർ.ജെ.ഡി. വക്താവ് മൃത്യുഞ്ജയ് തിവാരി 'ഞങ്ങൾ തിരഞ്ഞെടുപ്പിൽ മത്സരിക്കാൻ ഹൈദരാബാദിലേക്ക് വരുന്നില്ലല്ലോ, പിന്നെ എന്തിനാണ് ഒവൈസി ബിഹാറിലേക്ക് വരുന്നത്' എന്ന് ചോദിച്ചത് ഇവരുടെ രാഷ്ട്രീയ മനോഭാവത്തെ സൂചിപ്പിക്കുന്നു. ഈ നിലപാടിനെ കോൺഗ്രസ് എം.പി. അഖിലേഷ് പ്രസാദ് സിംഗ് നൂറ് ശതമാനം ശരിവെക്കുകയും ചെയ്തു. 

ഒവൈസിയെ ഒഴിവാക്കുന്നത്, വോട്ട് ഭിന്നിച്ച് ബി.ജെ.പി.ക്ക് നേട്ടമുണ്ടാക്കുന്നതിന് തുല്യമായ 'ആത്മഹത്യാപരമായ സമീപനം' ആണെന്നാണ് വിമർശനം.

ഒവൈസിക്കെതിരെ പതിവ് ആരോപണങ്ങളും ഭയവും

ഒവൈസിക്കെതിരെ പല തിരഞ്ഞെടുപ്പുകളിലും ഉയരുന്ന പ്രധാന ആരോപണം അദ്ദേഹം ബി.ജെ.പി.യുടെ 'ബി ടീം' ആണെന്നതാണ്. മുസ്ലിം വോട്ടുകൾ വിഭജിച്ച് മതേതര കക്ഷികളുടെ വിജയ സാധ്യത ഇല്ലാതാക്കി പരോക്ഷമായി ബി.ജെ.പി.യെ സഹായിക്കുന്നു എന്നാണ് ആരോപണം.

എന്നാൽ, ഒവൈസിയെ മുന്നണിയിൽ ഉൾപ്പെടുത്താൻ ഇന്ത്യാ മുന്നണിയിലെ കക്ഷികൾ മടിക്കുന്നതിന് പിന്നിൽ രണ്ട് പ്രധാന ഭയങ്ങളാണുള്ളത്:

ഹിന്ദു വോട്ട് ഭയം: ഒവൈസിയെ കൂടെ കൂട്ടിയാൽ ഹിന്ദു വോട്ടുകൾ നഷ്ടപ്പെടുമെന്ന ആശങ്ക. സത്യത്തിൽ ബിജെപി വോട്ടുകൾ ഒവൈസിയെ ഒപ്പം കൂട്ടിയാലും ഇല്ലെങ്കിലും ഇന്ത്യ മുന്നണിക്ക് കിട്ടുകയില്ല എന്നാണ് ഈ വാദത്തെ ഖണ്ഡിക്കുന്നവർ പറയുന്നത്. നഷ്ടപ്പെട്ടാൽ തന്നെ ഏതാനും ഹിന്ദുത്വ വോട്ടുകൾക്ക് പകരം മറ്റുവോട്ടുകൾ പെട്ടിയിൽ വീഴുന്നത് കോൺഗ്രസും ആർജെഡിയും മന:പൂർവ്വം വിസ്മരിക്കുന്നു.

മുസ്ലിം വോട്ട് നിയന്ത്രണം നഷ്ടപ്പെടുമെന്ന ഭയം: മുസ്ലിങ്ങളുടെ 'രക്ഷകരും മൊത്ത കച്ചവടക്കാരും' തങ്ങളായിരിക്കണം എന്ന സ്വാർത്ഥ താൽപ്പര്യം. ഒവൈസി വരുന്നതോടെ മുസ്ലിം ഭൂരിപക്ഷ പ്രദേശങ്ങളിൽ തങ്ങൾക്ക് നിയന്ത്രണം നഷ്ടമാകുമെന്നും, മുസ്ലിം വോട്ടുകൾ മേലുള്ള മേൽക്കൈ നഷ്ടപ്പെടുമെന്നും ആർ.ജെ.ഡി.യും കോൺഗ്രസ്സും ഭയപ്പെടുന്നു. തോറ്റുതൊപ്പിയിട്ട് പിന്നെ എന്ത് ന്യൂനപക്ഷസംരക്ഷണമാണ് ബിജെപി രാഷ്ട്രീയത്തിനെതിരെ ഇവർ പയറ്റാൻ പോകുന്നതെന്നും ചോദ്യമുയരുന്നുണ്ട്.

ദളിത്-ഒ.ബി.സി. വോട്ടുകളിൽ വിള്ളൽ

പുതിയ മുന്നണിയിൽ ചന്ദ്രശേഖർ ആസാദിൻ്റെ പാർട്ടി ഉൾപ്പെട്ടതോടെ ദളിത് വോട്ടുകൾക്കിടയിലും, യു.പി.യോട് ചേർന്നുകിടക്കുന്ന ബക്സർ, കെയ്മൂർ തുടങ്ങിയ ജില്ലകളിൽ ഒ.ബി.സി. നേതാവായ സ്വാമി പ്രസാദ് മൗര്യയുടെ സ്വാധീനത്തിലൂടെ ഒ.ബി.സി. വോട്ടുകളിലും വിള്ളൽ വീഴാൻ സാധ്യതയുണ്ട്. മുസ്ലിം, ദളിത്, ഒ.ബി.സി. വോട്ടുകൾ ഒരുമിച്ച് ഭിന്നിക്കുന്നത് ഇന്ത്യാ മുന്നണിയുടെ വിജയ സാധ്യതകളെ പൂർണ്ണമായും തകർക്കാൻ സാധ്യതയുണ്ടെന്ന് രാഷ്ട്രീയ നിരീക്ഷകർ മുന്നറിയിപ്പ് നൽകുന്നു.

ചെറുപാർട്ടികളെ കൂടെകൂട്ടാനുള്ള ബി.ജെ.പി.യുടെ തന്ത്രം

പ്രതിപക്ഷത്തിൻ്റെ ഈ പിടിവാശിക്ക് വിപരീതമായി, ചെറുകക്ഷികളെ കൂടെക്കൂട്ടാനുള്ള ബി.ജെ.പി.യുടെ ബുദ്ധിപരമായ നീക്കത്തെ രാഷ്ട്രീയ നിരീക്ഷകർ ചൂണ്ടിക്കാണിക്കുന്നു. കഴിഞ്ഞ ബിഹാർ തിരഞ്ഞെടുപ്പിൽ എൻ.ഡി.എ.യുടെ വോട്ടുകൾ ഭിന്നിപ്പിച്ച് ജെ.ഡി.യു.വിന് നഷ്ടമുണ്ടാക്കിയ ചിരാഗ് പാസ്വാനെ തിരഞ്ഞെടുപ്പിന് ശേഷം നരേന്ദ്ര മോദിയും അമിത് ഷായും സഖ്യത്തിൽ ചേർക്കുകയാണ് ചെയ്തത്. വോട്ടുകൾ ഭിന്നിക്കാതിരിക്കാൻ 'ബി ടീം' ആണെങ്കിൽ പോലും അവരെ 'എ ടീമാക്കാൻ' ശ്രമിക്കുന്ന ഈ തന്ത്രം പ്രതിപക്ഷം പഠിക്കാത്തത് ആത്മഹത്യാപരമാണെന്നും വിമർശനമുണ്ട്.

അടുത്ത ഘട്ടം നിർണ്ണായകം

ബിഹാറിലെ ഇപ്പോഴത്തെ രാഷ്ട്രീയ സാഹചര്യത്തിൽ, ഒവൈസിയുടെ മുന്നണിക്ക് ലഭിക്കുന്ന പിന്തുണയും ഇന്ത്യാ മുന്നണിക്കുള്ളിലെ തർക്കങ്ങളും ബിഹാർ തിരഞ്ഞെടുപ്പിൻ്റെ ഗതിയെ നിർണ്ണയിക്കുന്നതിൽ നിർണ്ണായകമാകും.

ബിഹാർ രാഷ്ട്രീയത്തിലെ നിർണായകമായ ഈ നീക്കത്തെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Owaisi's alliance in Bihar threatens to split backward and minority votes, creating a crisis for the INDIA Alliance.

#BiharPolitics #Owaisi #INDIAAlliance #AIMIM #VoteSplit #Election2025